熱爆娛樂: 【願配合驗DNA】滿懷心事開工黃子恆：我會負責任 _

2018年12月5日星期三

【願配合驗DNA】滿懷心事開工黃子恆：我會負責任 __,黃子恆,

被揭同大陸fans有親密關係兼疑似搞大對方個肚嘅黃子恆（新聞連結： https://bit.ly/2Qya8Cu ），正為電視劇《機場特警》開工，今日下午4時許由劇組人員陪同下喺荃灣現身。黃子恆未埋位嗰陣顯得眉頭深鎖，鏡頭外都好似心事重重咁，後來同劇組人員交談時先面露笑容。

今日呢場戲，係講佢、楊明同關禮傑將喺天橋企跳嘅疑犯制伏，黃子恆要用手扣扣住疑犯，拍咗兩take就順利完成。劇組對佢都好照顧，因為現身都幾大風，一拍完，劇組人員就幫佢披返件外套。而黃子恆經理人全程喺度傍住。

而到咗4點50分，黃子恆喺經理人陪同下上crew車，佢離開現場時，見到記者嗰陣雙手合十並急步離開，問到佢同個涉事女仔有冇聯絡、諗住點樣應對，同驚唔驚影響工作等問題，佢就摸一摸自己手上個道具手扣，表示要先更衣，因為着住套警察制服唔係好方便做訪問。

約5分鐘後，黃子恆再度現身，問到件事有冇影響佢今日開工嘅情緒，佢表情嚴肅話：「其實我想講嘅嘢好簡單，呢年半我冇再同佢見面，所以如果佢講嘅嗰件事有發生，我會負責任。」再問到佢會唔會就呢件事再搵番個女仔傾吓，黃子恆話：「我要回應嘅嘢我已經回應咗。」再問到點解個女仔到年半之後先有呢個舉動，黃子恆只抿一抿嘴，鬆一鬆個膊頭，表示無奈。

黃子恆其後再話自己心情點都受到啲影響，問到佢打算點，佢先係沉默約10秒，然後話：「俾我冷靜吓先。」提到佢之前話驗DNA，黃子恆話：「如果有需要，我會配合。」咁有冇為呢件事嬲自己？黃子恆將咪遞番俾記者，然後話：「唔該晒，唔該晒。」再問到佢有冇被公司「照肺」？黃子恆坦言：「有了解過呢件事。」擔唔擔心會影響形象，黃子恆冇回應就上車離開。

精選娛聞，喺晒《娛果》

http://fb.com/appledailyent

（攝影：孔志豪）	黃子恆（左）今日被揭桃色醜聞	 全程都有工作人員傍實
 黃子恆見到傳媒，一度頭耷耷避鏡頭。	 但埋位時都專心嘅，聽番工作人員講解同指示。	 埋位開工時，黃子恆冇咁頹。
 黃子恆等拍期間終於見番少少笑容。	 呢個捉賊shot，拍咗兩take就OK。	 其實個樣最嚴肅嗰個，可能係楊明。
 蔡思貝幾本上都係企埋一二邊做低頭族。	 係久唔久見佢同工作人員傾兩句。	 拍完場戲，黃子恆雙十合手離場。
 更衣後再接受傳媒訪問。	 黃子恆話自己已經冇見涉事女子，而佢亦願意配合檢驗DNA。