（互聯網）
今年一月曼聯接收阿仙奴王牌阿歷斯山齊士，一年後輪到奧斯爾？英國傳媒報道，博彩公司Carol突然收到巨額投注額，押落奧燒轉投曼聯，故已將相關賠率即時下調至1.8倍。奧斯爾於兵工廠被貶後備有迹可尋，一月轉會絕對唔奇；紅魔鬼領隊莫連奴最鍾意買貴價球星，亦有傳佢深信奧斯爾可以幫到山神回勇，曼聯或再一次將重注押到兵工廠球星身上。
奧斯爾於上季同阿仙奴續約，周薪高達35萬鎊，成為兵工廠人工最高球員。但自雲格離隊，本季由艾美利接手後，呢位主帥諗法同雲格截然不同，誓將兵工廠以往嘅花拳繡腿風格改變，改革變做鐵血雄獅。前仗聯賽對般尼茅夫，艾美利講到明係因為奧燒對抗性低，所以擺佢做後備，到今輪擊敗熱刺，奧斯爾亦無端因「背傷」而冇得出場，難免令人懷疑艾帥已放棄呢名前德國國腳。
博彩公司Carol將奧燒一月成魔賠率，下調至1.8倍，比轉會巴塞隆拿嘅4.5倍熱得多，而第三熱嘅曼城，賠率去到8倍，難怪Carol話，佢哋認為真正對奧斯爾有興趣嘅只得曼聯。
莫連奴於12年帶領皇馬奪得西甲冠軍，當時奧斯爾就係主力，其創造力令寸王留下深刻印象。本季曼聯成績下滑，失球比得球仲多，近三仗聯賽不勝，一月極希望收購球星扭轉局勢。A山轉會曼聯後盡失靈光，寸王或會視奧斯爾會解救A山嘅妙藥。
不過無論魔迷或中立擁躉，大部份都認為奧斯爾已經回塘，曼聯球迷覺得保羅普巴已經夠懶，要埋奧斯爾只會令愛隊戰鬥力進一步減弱，中立球迷就更刻薄，話曼聯已成阿仙奴垃圾桶。
支持本地運動員，一齊去「睇體」！
https://bit.ly/2DxX4XI
東網體育FB同你追實體壇每個精彩時刻！
http://bit.ly/2ecTF2A
來源 source: http://hk.on.cc
|
鍾意就快D Share啦！
|
|
|