43歲尹子維同28歲有「中國第一美胸」之稱嘅徐冬冬爆戀情，噚日佢哋拖住現身北京機場，戀情首度曝光，素顏戴黑框眼鏡兼口罩遮樣嘅徐冬冬打扮低調，反而尹子維冇口罩冇cap帽表現大方，昂首闊步，徐冬冬好似小鳥依人咁蹺實男友，sweet到漏。當兩人發現被傳媒追訪，徐冬冬即雙手合十，表現得好有禮貌。
去年兩人在電影《合約男女》扮演情侶，有一場火辣親熱戲，拍出真感情。擁35E巨胸嘅徐冬冬被封為「中國第一美胸」，有朝鮮族血統，拍過噴血寫真，又被王晶睇中演出電影《追龍》，繼童菲、胡然後被王晶力捧為大陸「晶女郎」之一；徐冬冬曾跟NBA球星林書豪、尹子維傳緋聞，去年11月，徐冬冬在微博宣佈拍拖，但冇公開男友身份：「戀愛了，他是一個簡單的普通人，他會做酸辣土豆絲和西紅柿炒雞蛋，他有一顆美好的心，他支持我，他強烈不希望我公開他，他怕我本來粉絲就不多，最後粉絲全部掉光。」原來呢位真命天子就係尹子維。
而尹子維係女星胡燕妮之子，擁有四分之一德國血統。98年同吳彥祖拍電影《美少年之戀》出道，其他電影演出還有《絕色神偷》、《新警察故事》等；05年更加入樂壇跟吳彥祖、連凱、陳子聰組成男子組合Alive出碟，近年轉戰大陸市場在北京開製作公司。尹子維外型花弗緋聞多多，曾跟貝安琪、劉美君、楊淇等傳緋聞。
精選娛聞，喺晒《娛果》
http://fb.com/appledailyent
|
鍾意就快D Share啦！
|
|
|
