掃呢頁CODE去手機

2019年1月30日 星期三

【青梅竹馬到老伴】「跟得老公」45 年越陪越愛唔會厭 65歲謝雪心:12歲就識佢 __,謝雪心,

戴晒帽,邊位呀?抬起個頭望一望,原來係心姐謝雪心。同邊個食Lunch呀,笑晒口咁冧嘅?望吓先,哦,呢個咪係心姐個老公Andy陳啟亨?心姐同老公結婚45 ...




戴晒帽,邊位呀?抬起個頭望一望,原來係心姐謝雪心。同邊個食Lunch呀,笑晒口咁冧嘅?望吓先,哦,呢個咪係心姐個老公Andy陳啟亨?心姐同老公結婚45年,仲係咁恩愛,食Lunch會邊食嘢邊講嘢,有好多話題。食完嘢,心姐拎份劇本出嚟刨,老公冇出過聲,自己玩吓電話,冇騷擾過心姐一句,亦冇顯得唔耐煩。知道老婆差唔多要走,Andy自己走去搞free parking,然後再折返餐廳,接埋老婆齊齊離開。心姐好少講老公,只係知道Andy係個生意人,賺夠就退休唔做,全天候陪老婆。Andy好樂意做心姐嘅柴可夫司機,拖埋喼做阿四都冇所謂,有個「跟得老公」,心姐真係好幸福。

想當年,20歲嘅心姐喺事業如日中天嘅時候,突然走去結婚生女,不知幾可惜。心姐同Andy係游泳隊嘅師兄妹,佢講過結婚之前,其實唔算拍拖,「我12歲就識佢,大家一齊練水,有功課唔識時,就叫佢教。到咗20歲,一齊八年喇,係唔係應該結婚?其實,我哋結婚後上街先拖手,先似拍拖。咁樣幾好,戀愛感覺反而長久啲。」Andy好低調,每次陪心姐出席活動,都係靜靜坐埋一邊,似個陌路人,「我有份做嘅劇目,佢一定捧場,佢係嗰種靜靜地坐喺度睇,唔會騷擾我嘅人。《宮心計》佢唔只睇,每晚仲幫我錄。」問心姐有咩相處之道,佢話:「兩夫妻最重要係互相信任、遷就。我拍戲嘅地方隨時歡迎佢嚟,等佢知道我冇嘢瞞佢。我亦都答應過佢做訪問時唔會多提佢,呢個係我對佢嘅尊重。」

攝錄:陳亦龍


鍾意就快D Share啦!