掃呢頁CODE去手機

2019年1月8日 星期二

【機場直擊】陳家樂陳瀅秘飛東京拍拖 扮等巴士轉搭機鐵返女方香閨 __,陳家樂,陳瀅,

上年,拍咗大台劇集《逆緣》飾演凍齡爺爺嘅陳家樂人氣急升,事業三級跳,點知愛情方面就啱啱相反,同年六月俾拍拖四年幾嘅余香凝狠飛,情傷到爆。感情嘅嘢,舊嘅 ...


上年,拍咗大台劇集《逆緣》飾演凍齡爺爺嘅陳家樂人氣急升,事業三級跳,點知愛情方面就啱啱相反,同年六月俾拍拖四年幾嘅余香凝狠飛,情傷到爆。

感情嘅嘢,舊嘅唔去,新嘅唔嚟!好似陳家樂咁,唔使半年,就搵到個靚過個ex嘅宅男女神陳瀅做女友。

有讀者爆料,一月三號喺東京機場見到陳家樂同陳瀅孖住等上機,雖然兩個人都戴住冷帽同口罩,但係都好易認得。經「壹仔」明查暗訪後,發現陳家樂同陳瀅喺一月三號齊齊返香港。

「壹仔」當晚喺機場等佢哋,戴住冷帽同黑色口罩拉住喼嘅陳家樂先出閘,左望右望先落地下巴士站扮等巴士,企咗幾分鐘確保無人跟蹤後,再乘升降機上機鐵站,買飛搭機鐵。 等機鐵時,陳家樂警覺性勁高,雙眼望嚟望去,一邊打量等車嘅人,一邊用handfree講住電話報告狀況,相信對方就係女友陳瀅,呢一刻,佢似乎發現「壹仔」。

一直好想會合番女友嘅佢,上咗機鐵繼續講住電話。為想撇甩「壹仔」,當去到青衣站時,佢突然離開車廂,然後行前咗幾個車廂再上車。去到陳瀅屋企嘅九龍站後,陳家樂見撇甩「壹仔」唔成功,就算只差一步就到女友屋企,都焗住敗走,上的士離開。陳家樂同陳瀅飛去東京,兩人溫馨纏綿咗四日三夜仲未夠,返到香港仲想千方百計合體,明顯係熱戀期。

上年十二月俾途人影到齊齊食壽司,再俾傳媒影到女方揸車,載埋男方返九龍站上蓋屋企,「雙陳戀」曝光後,佢哋曾經夾晒口供咁回應過。陳家樂說:「佢都係義氣仔女嚟嘅,我覺得佢有啲似Michelle,衛詩雅。佢即係都好有雷氣呀,好朋友,而家關係似係兄弟情,突然由兄弟跳去講情侶,就唔似囉!」

而陳瀅就咁答:「佢俾我嘅印象係個好勤力,同埋好捱得嘅演員,呢樣嘢係抵讚同幾欣賞嘅。合拍嘅,拍攝上、工作上,同埋劇組都有講過,話我哋兩個似樣,似兩兄妹。」

咁今次除夕同遊日本甜蜜倒數迎接2019,唔知佢兩個又點拆彈呢?

立即下載Apps,隨時隨地睇盡時政專題、深度偵查、娛樂熱話!按此連結: http://bit.ly/next28app

攝錄:吳斯金、蕭敬漁、東尼

相關新聞:【熱戀情侶】新一代男神陳家樂 vs 宅男女神陳瀅




來源 source: http://s.nextmedia.com
鍾意就快D Share啦!