新年快樂！作為今年第一擊，梗係要搵啲靚嘢畀大家醒神一番。最近嶄露頭角參與「天下為公」追擊國家級領導人梁振英UGL事件嘅民主黨靚女乳鴿梁翊婷（Edith），因為相貌標緻畀網民封為女神。嗱，女神收兵係自然定律，但原來女神都會「被收兵」，佢自爆因為一個男人踏上政途，但呢位人兄竟然係已經走入建制嘅民主思路湯家驊。
28歲嘅Edith同好多90後港女一樣，鍾意追星，但人哋追明星，佢就追政治明星，佢嘅從政起點係公民黨，佢話大律師黨有型啊嘛，中六就自薦做湯家驊（現已退黨）嘅義工助選，Edith大爆當年湯家驊曾包起間cafe同義工同事開P，仲自彈自唱，好有魅力。回憶總是美好的，對於湯狀華麗轉身走入建制，Edith都話好失望，好似有啲被騙咁。魅力嘅嘢咁虛，都係踏踏實實好啲，2016年，Edith正式加入民主黨揼石仔。
有啲嘢可能冥冥中自有主宰，天唔係要Edith遇到白馬王子，而係要佢遇上政治，佢嘅政治啟蒙嚟得十分早，小一時校長喺六四當日問咗一句知唔知今日咩日子？唔知就返屋企問，求知欲旺盛嘅Edith照做，家人就畀咗好多剪報、錄影帶佢睇，一個6歲小朋友都對事件難以忘懷，六四燭光就咁薪火相傳，一路到中五，仲走咗去做支聯會義工。
咪以為Edith搞搞震唔讀書，佢喺莊啟程預科書院畢業，之後入讀城大英文系，但都繼續「搞政治」，走去選學生會莊，點知遇着共青團入侵，畀一班內地生集體投不信任票，由任評議會主席嘅內地生兼任埋會長，女神可能多得庇佑，上莊不成佢就參加咗兩峽交流活動，結果離政治更接近，同各地華人溝通交流政局，畢業後從事傳媒；前財爺曾俊華去年選特首時，Edith都係助選薯粉之一。
女神唔識放屁，但識政治，而家喺觀塘區服務嘅Edith話做區係希望「落地生根」，喺地區收兵……啊唔係，係爭取街坊支持，積極備戰明年區選，仲話有心理準備要做多過一屆先可能成功挑戰。Edith最近當選埋民主黨新任中委，希望為黨發揮更多作用，又開始接手幫忙「天下為公」工作，唔知梁振英會唔會成為女神政途另一位重要的男人，成功狩獵呢隻狼呢？
| | | |
| | | |
| | | |
| | |
|
鍾意就快D Share啦！
|
|
|