掃呢頁CODE去手機

2019年1月14日 星期一

張建聲:愛火重燃癡纏攬腰 張建聲買首飾冧陳嘉莉 __,張建聲,陳嘉莉,

張建聲同陳嘉莉愈難愈愛,感情仲勝過從前呀!憑爆紅網劇《反黑》中「招積」一角彈出的張建聲(Justin),與陳嘉莉(Kelly)去年4月突然宣布分手,同 ...


張建聲同陳嘉莉愈難愈愛,感情仲勝過從前呀!


憑爆紅網劇《反黑》中「招積」一角彈出的張建聲(Justin),與陳嘉莉(Kelly)去年4月突然宣布分手,同年年尾峰迴路轉重燃愛火,男方更表示要努力改變自己,兩人自此後更轉玩高調晒恩愛!

主動停低睇首飾

日前東網發現他們一同到旺角做Gym,其中身穿螢光黃色、Sharp醒衞衣配黑色Leggings的全素顏Kelly,與全黑運動裝扮的Justin前後腳步出健身室,期間二人只顧各覆電話未有交流,直至踏出大廈後即化身「糖黐豆」風騷十指緊扣行街。行到首飾店前,Justin自動拉一拉女友手示意停低,繼而企在櫥窗前望兩望,再直接入店挑選心頭好,極速於店內巡視一周便埋櫃枱試戴手鏈,全程見女方四萬咁口冧笑,果然有男友錫住心情大好!

肉緊攬腰咬耳仔

貌似「早有預謀」的Justin遂以手勢向店員形容心水手鏈,得手後更親自替Kelly戴上,服侍周到大加分!但未知是否不合女友心意,他們逗留約十分鐘便轉移陣地到旁邊的體育用品店再戰,Justin拎起多件運動衫拼落Kelly度Size,同時伸出紳士之手主動幫女友孭背囊,認真體貼又細心!未幾,見Kelly一手拎住戰利品、一手拖住愛郎幸福滿瀉離開,等候過馬路時二人無顧旁人眼光愛得轟烈,肉緊攬腰、咬耳仔、大笑樣樣齊,現場瞬間充滿粉紅泡泡!最後一對戀人於鬧市人群中消失。

見過家長

事後Kelly接受訪問,問到何時正式復合?她拒絕透露指:「多謝關心。(邊方先做主動?)主動?要問番佢啦,哈哈!唔想答咁多。(之前分手後Justin曾經傳出多段緋聞,有問番是否屬實?)哈哈,冇興趣知。」翻撻後更確定視對方為結婚對象?她笑謂:「順期自然,結婚呢啲唔強求,目前以工作為重。」追問當日Justin是否想買首飾做「箍煲」禮物?她聞言即大笑否認︰「咁啱行過睇吓啫!幫佢慳錢呀!」Kelly續自爆早已見過家長,都非常熟絡,故新年都會去男友家拜年𢭃利是。


來源 source: http://hk.on.cc
鍾意就快D Share啦!