劉心悠在新劇中飾演保險調查員，現實中愛心滿滿的她，是兩名非洲孤兒的守護天使，她將幸福分享到各地有需要的地方，還呼籲「珍惜資源，多關心別人」，因明白幸福並不是必然。
撰文：羅慧敏
攝影：沈健程
劉心悠主演劇集《守護神之保險調查》正在播出，劇中飾演保險調查員的她，現實中，心悠亦剛成為「守護神」榮升「媽媽」，因早前到非洲探訪期間，她在當地收養了兩名孤兒。
相關新聞：家人比愛情更滋潤
克服恐懼
心悠自覺生於幸福國度，有感城市的小朋友生活富裕，她呼籲大家千萬不要浪費資源，更應多關心別人。對於將來生兒育女，教育是一門高深學問，只是感情空白的心悠，自言未有想過子女問題：「呢個係好大嘅責任，有時會諗領養會係一個選擇，領養責任係一世，諗起係一個恐怖嘅責任。」她不諱言認真考慮過領養多過自己生，家人亦沒有抗拒這個諗法。
今年除了拍電影及電視劇為主外，心悠亦一如往年定下目標，不過目標已在一個月內達成，她笑說：「每年都set目標，舊年跳咗芭蕾舞，我真係好自豪，至於2019年因為長期傾劇本，好多時因為角色都要識游水，自己唔識，所以機會畀咗第二個人。當然都有其他因素，我好想克服，幾日前已經克服咗，可能set得太低，所以我會挑戰下一步，啱啱識咗蛙式，可以游到50米，希望學埋自由式同難度高啲嘅泳式，搵咗私人教練，以前踩唔到水就失控，一定會沉，我好感恩自己好勇敢面對自己嘅恐懼。」
照顧生活
另外，早前心悠由國際培幼會安排下到非洲探訪，到當地難民營及家訪，感受良多：「今次旅途好遙遠，去咗非洲難民營同當地一個家庭，睇到佢哋所遇到嘅問題，了解草根性嘅問題，了解佢哋缺乏啲乜，我自己好享受今次經歷。探訪完會覺得自己係好幸福，人為咗生存係會做好多嘢，其中一個個案係五姊妹係孤兒，當中只有十幾歲嘅大女，為咗照顧四個妹妹，每日頭頂20塊磚頭，搬15轉，每日得2.6港幣，睇佢覺得好慘，但係佢為咗生存，我覺得佢係英雄！咁細個有咁多重擔喺身上，所以知識、求生能力好重要，我發覺最緊要係照顧佢哋嘅生活，所以固定一筆錢供佢哋返學、買營養食物，呢啲先可以全面照顧到佢哋嘅問題。」
|
鍾意就快D Share啦！
|
|
|
