掃呢頁CODE去手機

2019年1月15日 星期二

【大帥哥助三兄弟做到】好演員賦予角色生命 好角色令演員改頭換面 __,大帥哥,

《大帥哥》話俾我哋知,一個有血有肉有故事嘅角色,絕對可以令一個演員變得截然不同,更可以令觀眾對演員嘅演技,由唔睇好到認同。【新․反派專業戶】面目可憎到 ...




《大帥哥》話俾我哋知,一個有血有肉有故事嘅角色,絕對可以令一個演員變得截然不同,更可以令觀眾對演員嘅演技,由唔睇好到認同。

記得《大帥哥》初播時,好多人話狄奇三兄弟(冬來、羅義及馬炭)都交唔到戲俾張衛健,但隨劇情發展慢慢認識角色性格後,開始明白李嘉對白唔多唔係因為佢無名氣、被TVB投閒置散,只係冬來本身戇直唔識講嘢,後來更會覺得佢唔多說話先至可愛,李嘉兩字亦因冬來一角而開始被觀眾記住。

羅義都一樣,相信大家都曾經覺得佢聲大大、表情無乜變化,因此批徐榮演技麻麻地:「咪又係《BB來了》嗰個暴躁版徐榮,有乜分別?」但,原來羅義就係個「話一就一,話二就二」,唔多用腦思考嘅行動派,於是觀眾諗法開始變化:「呢種爽直麻甩佬,講嘢大聲語氣倔又好正常喎。」咦!最初又話徐榮演技生硬麻麻地嘅?最後咪又因為角色而認同徐榮嘅演繹方式囉。唔只,羅義更係個對大帥哥有義、對艾妞嫂有情嘅好漢,點會有觀眾不被羅義所感動、吸引?點會唔對飾演者徐榮另眼相看?

馬炭又點呢?留意得到,唔少網民本身都對洪永城持不欣賞態度,話佢演呢種衰仔角色夠晒乞人憎,更會令人越睇越唔鍾意佢。越睇越唔鍾意佢?可否理解成馬炭呢個角色其實設計得相當成功?雖然就算去到結局,大部分演員都獲得讚賞嘅時候,洪永城仍然被鬧係唯二交唔到戲嘅人(不是唯一,尚有蔡思貝),但無可否認睇住黑化馬炭,的確會喺電視機前鬧出聲。如此「成果」,飾演者洪永城嘅個人「魅力」應記一功,設定角色者更加係功不可沒,包括幕後監製、編審、編導等,當然仲有大帥哥張衛健本人,事關劇中不只一人喺訪問時講到:「Dicky哥就算放咗工,都用自己休息時間幫其他人度橋、諗對白。佢一啲都唔獨食,好肯交個波出嚟俾大家,仲話一個人無論幾好腳法都好,唔能夠齊上齊落踢整體足球,場波始終唔夠精彩。」

《大帥哥》呢場波已踢完,大家又覺得精唔精彩?


鍾意就快D Share啦!