【娛樂人物】
在商台廣播劇《十八樓C座》飾演「周老闆」的金剛已年屆85歲，但他堅持活到老，做到老，自食其力。金剛去年覓得新經理人，決意在演藝路再向前走，他希望主力賣聲，全因感覺最自在。金剛日前接受《蘋果》專訪，坦言希望趁有能力可以賺多一點錢：「我有人工嗰日，孫仔周日有茶飲。」與一對乖孫嘆茶敍天倫之樂。
採訪：比華利
攝影：沈健程
相關新聞：【諷刺時弊】《十八樓C座》紀念林彬
商台長壽廣播劇《十八樓C座》播放超過半世紀，要數劇中的靈魂角色，非「周老闆」莫屬。原名周朝杰的金剛，聲演周老闆多年，日前他在一家茶餐廳接受《蘋果》專訪。訪問當日，「周老闆」金剛跳出直播室，坐鎮收銀櫃枱，幫手聽電話落單，大過老闆癮，霸氣的金剛更向夥計大講口頭襌「你黐筋」、「你家山發！」入型入格。
| | |
茶餐廳啱香港
金剛笑言跟周老闆已連為一體，街坊跟聽眾都會這樣親暱叫他：「𠵱家好少人叫我金剛，自從做咗《十八樓C座》周老闆，好多人都叫我周老闆，我真名叫周朝杰，更加冇人知。」金剛直言對茶餐廳有着情意結：「我好鍾意茶餐廳，起碼經濟條件對我嚟講啱晒，我哋入息唔多，嚟茶餐廳食嘢又平又抵，啱晒我哋香港人。」
問到金剛打出周老闆的生招牌，可曾想過現實中也要經營一間「周記茶餐廳」？金剛說：「老實講，我只係戲裏人物，我本人邊有資格開一間舖，本錢唔少，開得一間，我就唔使去做廣播事業，為咗生計當係一份職業。之前退休幾徬徨，簽約簽咗二十幾年，𠵱家雖然唔係正職，希望繼續有得做，1954年入行到𠵱家，希望𠵱家仲咁好聲，將好聲帶畀大家，呢件係咪一件好事。」
相關新聞：85歲做Gym保體魄
小人物隨處有
周老闆在廣播劇中諷刺時弊，代表周老闆的金剛說：「我冇立場，其實周街都有周老闆，佢就係簡單一個小人物，茶餐廳老闆多數鹹鹹濕濕，鍾意打牙骹，噴口水，見靚女招呼吓，見啲阿爺阿婆就唔招呼，嗰啲小人物，香港隨處都係。」
金剛在21歲進入社會，第一份工是巴士售票員，但他越做越覺得工作古板兼沒有前途。機緣巧合下，轉到港台做藝人，1964年跳槽商台，月薪只有500元：「掹掹緊㗎，咁以前每年加啲，我咁多年資歷，無謂講加咗幾多。我𠵱家唔做，我下個月就冇糧出，咁即係冇得食，我唔係政府工，我哋冇長糧，我哋公積金唔多。」
商台視他如瑰寶，退休後繼續聘用，金剛樂於活到老，做到老，學到老，去年底他更簽約新經理人，希望今年有新發展：「我仲想有新嘗試，除咗做廣播劇，仲做出面嘢，拍戲客串乜都得，有人搵咪做。」金剛不計較薪酬：「你認為我值幾多咪畀幾多，經理人話我值幾多就幾多。我唔食得幾多，當然希望將自己嘅嘢貢獻畀大家，所以我好多謝經理人，希望佢做好啲，幫我搵多啲，互相得益。好似當年打工捉襟見肘，我就唔想啦。簽咗經理人同我搵多啲錢，我有人工嗰日，孫仔周日有茶飲，仲整多兩碟炒麵。」
聲帶靚唔戒口
中氣十足的金剛至今仍聲如洪鐘，他笑說：「我85歲啦，但唔似伯爺公聲，我講嘢好快，把聲咁好，多謝媽咪生我咁好聲帶，我感覺老咗把聲仲越響。我冇戒口，冇食補品，去飲茶必食炸春卷、炸芋角，唔係煎炸，我唔食，熱氣嘢我先食，凍熱都飲，乜都食，咖喱仲啱呀。」做廣播劇多年，金剛只試過兩、三次出現喉嚨敏感，但一日即痊癒：「我可以用丹田講嘢，用聲演繹周老闆。」
雖然天生靚聲，金剛卻不愛唱歌，也不愛做旁白，只愛聲演：「我做演員時，都唔鍾意做小生戲，小生同女主角談情說愛，傾偈咁大聲，嚇親隔籬嗰個小姐。我把聲冇辦法溫柔，開聲就咁大，𠵱家三分一聲咋，自己喺肚裏調校聲調，扮老聲沉咗，惡就大聲啲，斯文都唔斯文得去邊，我冇斯文聲。」多年來金剛都主力賣聲，全因他覺得聲演工作比較輕鬆：「最自在淨係賣聲，如果賣埋身咪拍電影囉，時間長，我最怕要等埋位，不過有錢收最緊要。」
場地提供：金記冰室
|
鍾意就快D Share啦！
|
|
|
