掃呢頁CODE去手機

2019年1月20日 星期日

創富攻略:孖妹S檔案:海味銷量跌 經濟同告急? __,周海媚,海味,

仲有兩周就到農曆新年,唔少人開始辦年貨。今年市道麻麻,唔知貴價食材嘅銷量及高級食肆嘅生意會唔會差?Kitty同彩兒專程到上環海味街,聽吓參茸海味舖老闆 ...




仲有兩周就到農曆新年,唔少人開始辦年貨。今年市道麻麻,唔知貴價食材嘅銷量及高級食肆嘅生意會唔會差?Kitty同彩兒專程到上環海味街,聽吓參茸海味舖老闆們,以及屹立於尖沙咀半世紀嘅老字號酒樓老闆點講,佢哋生意好壞絕對係股市甚至樓市嘅寒暑表。佢哋點睇行業前景及金融市場去向?

李:裕興海產貿易老闆 李釗

潘:安記海味董事總經理 潘權輝

張:頂好海鮮酒家老闆 張本立

莊:香港中文大學劉佐德全球經濟及金融研究所常務所長 莊太量

Kitty:平時睇香港零售銷售數字,冇乜感覺。今次直接問零售業嘅老行尊,香港經濟情況係點,感覺最真實!

彩兒:回望2018年港股,股民一度贏到笑,又嚇到死,事關上年一月底恒指升到33,484點歷史高位,就連唔叻炒股嘅孖妹,都賺咗幾轉機票錢。點知侵侵唔生性,一場貿易戰搞到金融市場腥風血雨,埋單計港股跌咗13%添。究竟你哋上年嘅鮑參翅肚生意又係點?

李:好差!我間舖頭主要賣中高價嘅鮑參翅肚,但2018年至今,生意少咗好多。主因少咗大量內地遊客生意,而港人本身又食得唔多。由於中美貿易戰關係,聽聞內地人旅遊後返國時,喺攜帶食品過關上受到限制,甚至被禁止攜帶魷魚、蝦米、鮑參翅肚等海味入境。我估計,內地要谷內需,故希望同胞買國貨。

李:以前嘅五一及十一假期,內地人會拖喼嚟掃貨,但依家全部冇囉!有客人試過買海味帶返內地,但被內地海關打回頭,我最後唯有退錢畀佢。我估唔止係自己舖頭,呢條上環海味街嘅生意都差咗。

莊:零售業確要諗諗計,例如提供靈活嘅送貨及付款方法,可能有助增加部分生意。

彩兒:若靠本地客撐住又掂唔掂?

李:難啲。從事中高價嘅鮑參翅肚生意特別難做。近年港人飲食習慣改變,環保團體提倡少食魚翅,故魚翅銷量只剩下高峰時期嘅十分之一。再者,雖港人知食花膠可以保身,會買多啲,年輕人亦會買嚟煲湯或燉鮮奶,但主要都係買中低價貨。

另去年花膠、海參及魚翅等食品嘅來貨價格比2017年貴咗。尤其係花膠,外國貨量減少,且內地加工費上升,來貨價貴咗幾成,故我哋去年賺少咗。

潘:喺上年下半年開始,香港就股樓齊跌,中美貿易發生摩擦,對零售生意影響必定負面。我哋2017年收到好多鮑參翅肚禮籃訂單送貨去中環,多數係金融公司送畀客人,或者係金融客戶送畀金融公司,我哋嘅送貨員穿梭中環多個寫字樓派籃。不過,上年中環禮籃訂單數量明顯減少,好彩多番非金融公司訂單。

彩兒:對於上世紀七、八十年代魚翅撈飯嘅日子,你仲有冇印象?

潘:當時股市暢旺,容易搵錢,香港人食鮑魚唔問價,有咁大隻買咁大隻,高級酒樓生意亦旺。好景不常,1987年發生股災,魚翅撈飯嘅日子不再。

Kitty:我哋比你後生幾年,只係對2008年金融海嘯較有印象。回想美國次按爆泡,雷曼兄弟宣布破產,恒指由2007年10月嘅31,958點高位,跌到2008年10月10,676點。

潘:無錯,當年股樓齊跌,好彩復原得快。當年10月,我訂嘅貨一櫃櫃送到,但見市道咁差,都驚滯銷,搞到我幾晚瞓唔着。後來決定蝕本促銷,一下子就清晒啲貨,生意出乎意料地好。

彩兒:海味生意受樓市定股市影響多啲?

潘:我覺得係樓市,因近年大家視買樓為目標,變相令消費力減弱。唔少中產家庭父母大半生慳到300萬至400萬元,卻要用七成積蓄幫下一代置業,可以話所剩無幾,但仲要留起資金應付不時之需,例如睇醫生等,點會有閒錢買海味?而下一代嘅,就要努力儲錢供樓,所以亦要慳啲使。

彩兒:張老闆,睇你咁後生,估唔到你入行22年,即係經歷過1997年金融風暴、2000年科網爆泡及2008年金融海嘯啦?上年個市大反轉,你應該唔驚啦?

張:上年開始嘅中美貿易戰令香港股樓受挫,而內地經濟放緩,少咗內地人來港,2018年生意係差咗,整年賺得唔多,有一個月仲要蝕本。

感受到市況轉差,客人買少咗節日糕點,包括年糕、月餅等。另外,商家嚟酒樓飲茶,叫嘢食冇咁豪爽,以前唔睇價錢,依家多數食全包宴。以往內地人嚟酒樓見隔籬枱叫鮑魚食,佢就會叫隻更大,依家點會?

Kitty:唔通佢哋身家喺呢一年內大縮水?

張:過去幾十年,股樓大致向上,大家財富亦慢慢累積,但今時唔同往日,全球充斥唔少不明朗因素,難以捉摸,客人點餐都變得精打細算。我哋留意到,酒樓近年亦迎合市場,推出簡單菜式。

彩兒:有樓便是王,你間舖頭又係自置物業,其實唔使愁噃。

張:我唔認同「一舖養三代」,即使有物業,仍應該工作,學多啲嘢,令人生活得精彩。所以我有多份正職,包括擔任演員。我原本做製衣設計,1996年決定返嚟酒樓幫手,因見舖頭生意轉差,想挑戰自己。而一做就做咗22年。

彩兒:投資股樓與營運酒樓,邊瓣易賺錢?

張:做飲食係難啲。過去多年,通脹唔算勁,食材唔係貴咗好多,但人工就貴咗好多,我哋店舖加價主要抵銷人工成本上漲。最近市道麻麻,我幾間燒味廚房都有相應減價。另外,從事飲食,咩都要親力親為,有隻老鼠入咗廚房都要理。

酒樓屹立半世紀,經歷多次股災、樓災,但都一一捱過。若要退下火線,應該係自己身體問題,或者夥記年事已高,請唔到人,就會考慮唔做。2019年相信都唔會容易過,等放完年假番嚟,三月初自有分曉。

彩兒:你哋親身感受到經濟,點睇未來嘅股市及樓市?

李及潘:我唔識睇股市,自己冇買股票。至於樓市,應該仲有短暫微調。(二人異口同聲表示。)

潘:喺股場賺得少,就覺得專心賣海味仲賺錢;若賺得多,就成日都想睇住個市,望賺得更多,以致影響心情。至於樓市,我覺得大漲小回未嘗唔係好事。

李:我覺得樓市仲會跌少少,但聯儲局加息步伐都到尾聲,所以唔會跌得太多。我有投資物業,覺得買樓可以分散投資風險。

Kitty:股樓跌到咩水平會令零售業進入寒冬?

潘:股市樓市氣氛極之影響消費意欲,若多啲正面因素,消費意欲就會增加。若負面因素較多,大家心情麻麻,自然唔買咁多鮑參翅肚喇。然而,消費意欲要「開慢火煲」,唔會一下子改變。因此,視乎政府官員、媒體點樣評述股樓市況,營造咩氣氛。

Kitty:作為專業嘅大學講師,你點睇香港零售業前景?

莊:零售市道好定差,主要睇旅客數字。自港珠澳大橋落成,2018年10月及11月旅客數量上升,相信未來旅客數字能維持。而唔理中國經濟好壞,總會有批富人,捨得來港消費。再者,人民幣匯價開始喘定向上,內地人喺香港消費意欲自然增加。

香港旅客增多,失業率持續偏低,且預計香港年內股市及樓市都會好轉,所以今年香港零售業應該會好過2018年。

彩兒:不過,中美貿易戰唔知會打幾耐,劇情未必係預料之內。

莊:只要做咗最壞打算,而最壞結果係大家承受到嘅,咁就冇問題。美國對中國貨品徵稅,其實對中國影響微。以日本為例,日圓倍升,美國對日本進口貨加徵一倍關稅,貿易順差都只係減少20%。喺今次中美貿易戰,就算落實加徵25%關稅,扣除人民幣貶值,未來中國貨可能都係貴15%。

------

《骰寶坊》誠邀各地【賭王】【賭后】挑戰神人境界,每日更有百萬籌碼等你領取!立即免費下載,體驗《骰寶坊》最真實、刺激的多人在線骰寶遊戲!

遊戲下載:

https://goo.gl/i2t1yj

想睇更多一、二手樓精彩故事,即click以下連結:

新盤置啱睇

http://money18.on.cc/newflat/

二手置啱Feel

http://money18.on.cc/usedflat/


來源 source: http://hk.on.cc
鍾意就快D Share啦!