蔡卓妍（阿Sa）今日喺旺角為電影《非分熟女》優先場謝票，提到佢於浴缸自慰嘅戲份，阿Sa話係向電影《鋼琴教師》致敬。
阿Sa仲喺戲中大跳鋼管舞，身型弗爆，阿Sa話個角色係普通人，所以冇特別理個身形，仲話學咗幾堂鋼管舞覺得好好玩，都想再繼續學。佢仲自爆拍嗰陣跳到傷晒：「拍嗰陣都唔知整到，之後先發現踩爆甲，真係十指痛於心。」咁係唔係繼續學，跳畀男友睇？阿Sa話：「唔係樣樣都要向呢方面諗，其實都係一種運動。」
阿Sa又坦言初初不敢着性感舞衣，上堂嗰陣發現所有同學都好性感，先放膽嘗試：「我第一堂係着運動褲去，見到個個同學都着嗰啲跳舞衫，我覺得好尷尬。」講到佢嗰條性感嘅跳舞短褲，點解冇鬼竄肉？阿Sa就分享佢嘅小秘技：「平時去啲陽光與海灘嘅地方旅行，我都會買好多泳衣，試過有件泳衣喺pat pat位中間有個褶，嗰條褲真係弗到不得了，所以之後買嘅褲仔全部都係咁樣改，我仲介紹咗好多朋友咁做添。」
另外，有報道話佢聲帶不適，有可能唔會再唱歌？阿Sa話自己聲帶過勞：「其實都冇唱咗年幾兩年，o依家唱歌嗰個位廢咗，可能唔講嘢幾個月先得，惟有專心拍戲。」至於亦有傳佢不排除再婚，阿Sa話：「我唔會衝動，結會講，瀨過一次嘢，都想得到大家祝福。」
精選娛聞，喺晒《娛果》
http://fb.com/appledailyent
|
鍾意就快D Share啦！
|
|
|
