48歲古天樂噚晚憑住半首歌，奪得「叱咤我最喜愛的男歌手」獎，全場歡呼尖叫，大熱勝出，佢攬完容祖兒、張敬軒、麥浚龍同謝安琪，之後上台拎獎，古仔話：「我真係好鍾意唱歌，不過我唔識唱，呢個世界真係有奇蹟出現，我真係冇嘢好講。」
古仔仲同負責宣佈佢攞獎同頒獎畀佢嘅林海峰chit chat咗一輪，古仔同林海峰講：「不如咁搞吓氣氛頭先你咁叻！」林海峰就抵死咁話：「唔好玩我你係咪要玩呀！唱歌吖！」古仔講：「11點幾12點喎 ！」呢句之後，就好自然咁爆咗句：「X！唱囉！一齊上嚟唱！」然後叫咗張敬軒、容祖兒同麥浚龍上台。齊齊清唱古仔首經典歌《男朋友》。
唔少網民仲cap咗呢一part擺上網畀大家無限loop，又有網民講笑話古仔攞完，下年輪到黃宗澤，之不過有網民聽到係「挑」，又有網民聽到古仔個發音疑似係「X」。
另有網民指古仔係第一個稱霸歌影視嘅藝人，古仔於1999年憑《刑事偵緝檔案IV》演徐飛奪無綫視帝、2001年憑《尋秦記》演項少龍再拎視帝；2018年古天樂憑電影《殺破狼．貪狼》獲得第37屆香港電影金像獎最佳男主角(新聞連結： https://bit.ly/2qxGuiw )，噚日再拎埋「叱咤我最喜愛的男歌手」，又做緊演藝人協會會長。古仔，認真夠晒威！
當中亦有網民喺叱咤DJ麻利亞嘅Ig留言問「原來係選最有娛樂性男歌手，唔使識唱歌的！夠綽就可以。」麻利亞有回覆：「你啱！大家鍾意食吓花生、搞吓綽頭，今期真係流行有noise比所有嘢更重要，定咁多年其實都係咁，但又吹唔脹，因為係『我最喜愛』，大家喜愛就得，係咪？」
此外，古仔凌晨喺Ig貼出得獎相，留言：「感謝每位投票給我的朋友，『最喜愛』絕非一朝一夕，感謝各位對我多年來的支持，我深信大家對我的喜愛並不只是在音樂作品上，對我來說更大的意義是支持香港樂壇，支持廣東歌。」
精選娛聞，喺晒《娛果》
http://fb.com/appledailyent
| 網民指古仔係第一個稱霸歌影視嘅藝人。 | | |
| | | |
|
鍾意就快D Share啦！
|
|
|
