掃呢頁CODE去手機

2019年2月28日 星期四

【騷前要幫把聲拉筋】個唱帶囝囝去後台留回憶 蘇永康:唔知幾時至會再開騷 __,蘇永康,

已經8年冇喺香港開個人演唱會嘅蘇永康,將於嚟緊嘅6月21及22號喺紅館開騷,唔知佢開始keepfit未呢?「好多人話做演唱會前係咪要做健身,我都瘦咗啲 ...




已經8年冇喺香港開個人演唱會嘅蘇永康,將於嚟緊嘅6月21及22號喺紅館開騷,唔知佢開始keep fit未呢?「好多人話做演唱會前係咪要做健身,我都瘦咗啲,體能係重要,但對於一個歌手嚟講,其實聲音訓練都好重要,過多一個月,我諗就會經常幫自己把聲拉筋!」同聲帶拉筋,係咩玩法?真定假呀?聲帶都可以拉筋!「即係做好多基本練習,如果唔係就好難去駕馭。因為管弦樂表演,唔通我練到滿身肌肉又如何,都唔係嗰回事,但係把聲比一切嘅狀態都重要,而身體狀態只不過係個人嘅態度是否在作戰狀態。」今次個騷係同中樂團合作,會有咩驚喜先?「我可以好簡單咁形容俾你聽,係一個點樣嘅驚喜,就係一班我識咗廿幾年嘅好朋友,即係我啲舊歌,全部換晒髮型、服裝、形象,坐喺你面前,你嘅感覺係咪會好fresh?」有冇例子或者可唔可以即場示範呀?「例如你有冇聽過葉蒨文嘅《晚風》,成個爵士樂嘅鋼琴獨奏變成《晚風》,原來就已經可以,其他可以照用番原本節奏,只不過將所有元素變成中樂。」

做咗爸爸嘅阿公,唔知會唔會同囝囝嚟個crossover呢?「我個仔未到可以出嚟見咁多人嘅階段,佢仲未得,喺屋企對住我哋就蹦蹦跳,不過一多人佢就會怕醜。因為已經大個,一歲前就話未識啫,一歲後好明顯睇到佢開始對人群恐懼,一見到好多陌生人就會匿埋,需要時間熱身至可以。」Jazz有冇睇過爸爸開騷呢?「聽過,舊年四月,佢一歲左右,我喺澳門做騷佢都有嚟睇,由工人抱住,我記得當時唱《愈吻愈傷心》,一歲時同佢去台北睇陳奕迅,聽第一首歌時都無事,但唱完之後觀眾嘅歡呼聲嚇親佢,我已經要即刻抱番佢去後台睇投射。澳門嗰次比較好,因為距離舞台比較遠,佢可以遠少少咁樣睇,今次一定會帶佢嚟,等佢喺後台跑吓,紅館後台走廊好長嘛,等佢可以跑吓;其次就係唔知佢老豆幾時至會再喺紅館開騷,到時都唔知佢幾多歲,等佢有個回憶都好嘛。」

攝錄:吳斯金

採訪:肥A

髮型:Moe @ Fifth salon

化妝:Maggie Lee

場地提供:THE LUXE MANOR HOTEL @ DADA BAR


鍾意就快D Share啦!