豹哥單立文喺《愛回家之開心速遞》入面做攝影師熊樹仁，個角色好污糟，底褲可以著足一個禮拜先洗，剪完指甲唔扔，仲生埋頭蝨搞到全家都怕咗佢。現實中豹哥當然唔係咁嘅人啦，買枝洗頭水佢都好高要求㗎！
平時成日同老婆胡蓓蔚形影不離，呢日《壹》仔難得見到佢一個人去超級市場入貨。見佢入去無耐就買咗堆熟食同冷凍食品。之後就去揀洗頭水，睇咗一輪，佢睇啱一個牌子，然後就逐隻味扭開樽蓋聞清楚。揀得咁仔細，證明現實中豹哥不知幾講究，完全唔似劇中咁污糟。揀完洗頭水，佢就去買薯片，諗都無諗過佢就放咗包薯片落購物車，但揀完後又拎起其他兩包，心思思想買埋。入夠貨，佢去排隊俾錢，條龍鬼死咁長佢都無唔耐煩，慢慢等。見到盒鮑魚佢又拎上手睇兩眼，新年就到，即食鮑魚可以大派用場，不過最後佢都係無買到。而家《愛回家》破30點，再添食180集，觀眾又可以繼續睇豹哥做污糟攝影師
來源 source: http://nextplus.nextmedia.com
|
鍾意就快D Share啦！
|
|
|
