掃呢頁CODE去手機

2019年2月9日 星期六

【老竇係王晶聽盡惡言】王子涵度身設計《大老千》對白抒發感慨? __,王子涵,王晶,

日前一集《荷里活有個大老千》,講到缽仔糕(王子涵飾)生母(馬海倫飾)想認返個女,兼帶去美國生活,令缽仔糕難以抉擇,於是肥婆四(鄭則仕飾)講咗番說話,其 ...




日前一集《荷里活有個大老千》,講到缽仔糕(王子涵飾)生母(馬海倫飾)想認返個女,兼帶去美國生活,令缽仔糕難以抉擇,於是肥婆四(鄭則仕飾)講咗番說話,其中一句係:「有個有錢阿媽並不可恥,係自己唔努力先至可恨。」嗰刻立即「叮」一聲,心諗:「咦!對白好似為王子涵度身訂造咁喎。」畢竟老竇係王晶,好多觀眾都先入為主對佢有負面睇法,想必佢都因為老竇嘅緣故,聽埋唔少惡意說話,然後有感:老竇係王晶並不可恥,最可恨係自己唔努力。再將呢個諗法,安插喺劇集對白之中。

咁佢又點努力?作為王晶女,人人都以為老竇會安排好晒工作俾佢,其實不然,外界亦因此唔邀請佢做嘢,於是簽無綫由低做起,稍為多人有印象嘅作品係主持《姊妹淘》,唔係因為做得好,而係佢不時同其他人疊聲好似搶嘢講咁,表現一般,所以特別記得佢。

主持麻麻地,拍劇都係閒角多,但喺TVB都捱到4年,直到《大老千》終於可以擔正,當然老竇係監製應該幫唔少忙,但亦不得不承認,佢把握到呢次機會,缽仔糕呢個巴渣妹演繹得幾到位,同戲中其他較新一輩演員比,其實唔遜色,反而幾搶眼。至於觀眾嘅批評,大多依然圍繞王晶女或者外表醜呢兩點,能夠清晰指出佢演技問題嘅相對較少。或者唔少人暗啞底、撇開王晶呢個扣分因素,甚至會認同新人嚟講佢算OK,如果缽仔糕唔係成日大嗌搞到有啲嘈、煩更加好。


鍾意就快D Share啦!