2019年2月23日 星期六

李佳芯爛面停工收入減 視后如何慳住拍拖? __,李佳芯,視后,

憑《BB來了》首封視后嘅李佳芯,最近因為壓力導致面部生粒粒,過緊半停工生活,搞到收入大減。不過,好處係反而有更多時間同男友陳炳銓拍拖,而且二人一向習慣 ...




憑《BB來了》首封視后嘅李佳芯,最近因為壓力導致面部生粒粒,過緊半停工生活,搞到收入大減。不過,好處係反而有更多時間同男友陳炳銓拍拖,而且二人一向習慣有情飲水飽,拍拖唔會太大支出。

柴灣公屋出身嘅李佳芯,曾經坦言最鍾意零消費活動,呢日《壹》仔撞到佢現身精品店,雖然佢睇落對好多商品都有興趣,不時攞上手研究,但最後都係擺返低,繼續一貫嘅齋睇唔買。之後發現原來男友陳炳銓都喺現場,只係去咗幫女友買咖啡。唔知係咪為男友慳荷包,買一杯兩份飲,李佳芯飲咗幾啖就遞俾男友。

其實李佳芯一向慳家,雖然孭住視后光環,但慳家本色唔改之餘,亦唔嫌棄尚未上位嘅男友,畢竟自己都係由低薪演員捱起。所以,二人拍拖仍然「貼地」,唔行名店買包包,繼續window shopping睇下就夠,完全係個「肯捱M記」嘅好女仔。

BTW,呢日見李佳芯面部皮膚情況好似好返好多喇喎,希望佢可以快啲復工,如期拍攝觀眾期待嘅《踩過界2》啦。


鍾意就快D Share啦!
Related Posts Plugin for WordPress, Blogger...