即睇祖奧菲歷斯3個入波：https://bit.ly/2Ghsq54
葡超聯賽向來係球星搖藍，C朗拿度16年前由士砵亭轉投曼聯，成功踏上球王之路，所有歐洲豪門都等緊下一個C朗出現。賓菲加19歲前鋒祖奧菲歷斯今季極速彈起，周五(12號)歐霸盃53分鐘內連中三元兼貢獻1個助攻，帶領賓菲加主場4比2大破法蘭克福，成為歐霸盃史上最年輕「戴帽」球員。即使轉會費高達1億英鎊，曼聯同曼城都準備拚死搶人，以免不久將來後悔走寶。
祖奧菲歷斯係攻擊線全能球員，最初係踢進攻中場，所以被拎嚟同雷哥斯達、卡卡做比較，後來又踢內切左翼以及「9號半」位置，侵略性同瀟灑程度愈嚟愈有C朗影子。祖奧菲歷斯今季先至提升上賓菲加一隊，立即就坐穩正選位置，20次上陣就有10個入波同4次助攻，今場歐霸盃連中三元，更以19歲152日之齡成為歐霸盃史上最年輕「戴帽」球員。
祖奧菲歷斯目前合約有1.05億英鎊嘅買斷條款，據報曼聯同曼城已經展開爭奪，巴塞隆拿、祖雲達斯亦虎視眈眈，賓菲加上一圈歐霸盃對薩格勒布戴拿模，曼城總監碧格列斯坦已經入場「睇辦」，消息指「藍月亮」喺呢場爭奪戰入面暫時領先。
歐洲各大豪門驚住走寶緊急搶人，葡超勁旅波圖就最揼心，事關祖奧菲歷斯細個曾經喺波圖受訓長達6年，點知喺佢15歲嗰陣被指身型太過「排骨」，結果被波圖放棄，賓菲加冷手執個熱煎堆，而且加緊催谷佢嘅體能，依家隨時天降橫財。
東網體育FB同你追實體壇每個精彩時刻！
http://bit.ly/2ecTF2A
支持本地運動員，一齊去「睇體」！
https://bit.ly/2DxX4XI
來源 source: http://hk.on.cc
|
鍾意就快D Share啦！
|
|
|
