肥媽做咗太嫲自己都唔知。
藝人肥媽（Maria Cordero）今日現身力撐好友張學潤及路芙的網台節目，席間開心宣布榮升做太嫲，更自爆得悉好消息時矇查查，十分蝦碌爆笑：「尋晚半夜臨瞓前收到一張BB相，話出咗世啦，我睇完仲話好得意、咁多頭髮嘅，點知邊鬼個啫！之後佢哋就話係我個曾孫，我就話咁快？等我仲諗住做太婆先，因為孫女又結咗婚。（開心到瞓唔着？）醒咗諗住去睇佢，但佢話痛咗20個鐘之後要開刀好攰，今日做完嘢先去探，估計到出年年頭會做埋太婆。」
為賀首名曾孫出世，廚藝了得的肥媽當然要親自下廚煲薑醋，表示即刻去買材料炮製：「佢生之前冇話畀我聽，如果唔係就一早準備好。（一聲令下叫所有人幫手？）係佢哋一聲令下叫我煲薑醋，哈哈！（有冇送啲咩畀曾孫？）規矩都係送一隻玉鈪定驚同埋腳鏈，呢啲冇偏唔偏心。」
肥媽又笑稱早前胡楓向她炫耀有4名曾孫：「我依家有一粒（曾孫），年底、明年應該會多一粒（曾孫）！向住佢4粒（曾孫）呢個目標，但我應該唔止4粒（曾孫），我孫都有15個！」
來源 source: http://hk.on.cc
|
鍾意就快D Share啦！
|
|
|
