《蓋世寶訪問你》今集請來的嘉賓，是有「無綫御用黑社會」外號的游飈，早於多年前離開無綫外闖，近年創業搞生意，成功轉為生意人。大家對游飈這個名字很陌生，但當想起每次無綫劇集內的黑社會成員，就會發覺他很面善。
蓋世寶覺得游飈有份江湖味，原來游飈細個嘅時候已經有朵，叫做「白鴿小王子」，個朵點嚟嘅呢？他說：「小時候屋企人已經開始養白鴿，供應俾香港好多酒樓。我未出嚟社會工作，仲係讀緊中學嘅時候，屋企人已經同人合資喺深圳搞咗個大寶農場，有十萬對鴿。由嗰時開始，屋企人嘅農場已經係供應緊全香港乳鴿，即係所有香港人應該都食過屋企人提供嘅乳鴿，多謝幫襯。都經歷咗一段時間，但係有時候無辦法，隨住時移勢易，有時做生意係會有變化嘅，香港開始推行冰鮮嘅時候，令新鮮乳鴿無出路，因為價錢貴，雖然最好食一定係新鮮嘅乳鴿。推行冰鮮而唔准生劏嘅時候，變咗成個市場滑落後，後來都無得做。」對屋企人經濟影響係咪好大？「游：屋企人之後改去另外國家發展乳鴿場，不過可惜父母始終年紀比較大，經營方面真係幾吃力，最後都結束咗。不過唔緊要，佢哋年紀大咗應該係要休息吓，等我哋做仔女嘅孝順佢哋，啱嘅，我覺得無所謂。」
入咗TVB後，游飈雖然有很多拍攝機會，但幾乎全部都是做黑社會角色，對他影響深遠，游飈說：「我覺得頭幾年吸收經驗係好緊要，不過頭幾年對我嘅影響係直至現在，因為頭幾年做嘅角色，就係古裝黑社會、現代黑社會、民初黑社會，總之一係揸牛肉刀，一係揸曲尺，啲牛肉刀就黐錫紙，每日都係劈友，或者開槍殺人，形象好惡。卒之到第三年，我有一次行旺角嘅時候，有人撞到我，我第一個反應係想打佢，我心諗大鑊啦，發覺自己原來抽離唔到，我嘅感覺就好似已經加入咗黑社會三年。但我哋呢種黑社會就最大鑊，因為永遠都係借位，咁點樣同人打架呢？如果喺出面真係同人打交，就永遠都係虛位嘅，你話點算呢？雖然我唔係嗰一類型，但無形中自己嘅性格轉變咗都唔知，影響到我而家做生意，情緒一到就會拍枱，呢樣嘢係最致命。」
聽游飈講，佢做黑社會搞到自己以為有神經病，又擔心隨時俾公司炒冇得撈，游飈當時已有轉工的打算，「如果我游飈到四、五十歲嘅時候，同樣咁嘅下場，我如何生活呢？到時我可能有自己嘅家庭，要養育自己父母，我憑乜嘢去養呢？所以其實係好早嘅時候，大概九七年左右，外邊有一啲電影配音，當年仲係用緊菲林拍攝，未改用數碼，我哋已經開始出去配音。外邊有咩適合嘅工作，就算酒樓公關、售貨員，咩嘢我都會嘗試，因為我想多啲吸收外邊知識，希望搵個機會，萬一被電視台解僱嘅話，都可以解決呢個問題。所以好慶幸，當我尋覓緊外邊嘅機會時，同時亦有人欣賞我，開新公司亦都預我一份，一步步去行，呢啲路唔容易行，因為要兼顧TVB，有通告就一定要開工。但外邊嘅工作仍然營營役役去做，有時埋位嘅時候仍然要聽客人嘅電話。」
游飈一步一步將自己變成生意人，近幾年更有屬於自己嘅產品，生意愈做愈好，他說：「發展到而家，近幾年終於有個產品推出，非常好，亦可以解決好多地方而往解決唔到嘅問題。有咗呢個產品，反而令我其他生意都增長，因為我有賣工業用抽濕機，機入面唔會養菌，即係唔會放菌，其實你屋企部冷氣機就係養菌同放菌。所以呢啲抽濕機就算用喺醫院，都係比一啲大公司優勝，因為全世界嘅抽濕機或者冷氣機入面唔會養菌，即係唔會放菌，但我哋檢查過，大××連鎖飲食集團全線用緊我嘅抽濕機，風乾啲燒味，用咗幾年之後機芯仍然係藍色。」
策劃：肥A
攝錄：黃志明、吳斯金
化妝：毛毛（嫁妝）
來源 source: http://nextplus.nextmedia.com
|
鍾意就快D Share啦！
|
|
|