掃呢頁CODE去手機

2019年4月19日 星期五

【皓鑭後緊接倚天】何解TVB播咁多大陸劇?因為點都差唔過自家製 __,TVB,中國,大陸,

《皓鑭傳》後,緊接播放《倚天屠龍記》,先不論好唔好睇,反正唔少觀眾都覺得,大台係時候減少播放大陸劇,多返啲港劇喇,例如《鐵探》(雖然都係聯合製作),收 ...




《皓鑭傳》後,緊接播放《倚天屠龍記》,先不論好唔好睇,反正唔少觀眾都覺得,大台係時候減少播放大陸劇,多返啲港劇喇,例如《鐵探》(雖然都係聯合製作),收視同口碑都唔錯吖,一播出就可以中斷《愛•回家之開心速遞》連續多周收視冠軍嘅勢頭。

不過,有時唔係大台唔想播自家劇,而係播自家劇有好多隱憂,反而播大陸劇安全之餘,隨時有賺。

首先,大家都知黃金時段中,特別係星期一至五晚8點30分至9點30分,以及9點30分至10點30分,呢兩個時段最為重要。一年嚟計,上述兩個時段一般各自都會播到10套劇左右,合共20套。咁大台每年有無20套自家製劇集可以播呢?有,但被列入「香港國際影視展推介劇」嘅只有10部,講得衰啲即係得10部見得人,《鐵探》就係其中一部。

播晒呢10部就可解決其中一個黃金時段,咁另一個時段,又邊到搵另外10部劇去填數呢?其實仲有個「無綫節目巡禮」,以2019年為例,有19部大台劇被列入,當中10部重複咗頭先講過嘅「香港國際影視展推介劇」,即係尚有另外9部。

「咁播埋嗰9部咪差唔多填埋另一個黃金時段條數囉!」啱呀,無錯。但呢9部劇,伏味可以好濃㗎喎,例如其中之一嘅《救妻同學會》,事實證明就算擺喺星期日播,一樣被觀眾插到反艇,如果喺星期一至五黃金時段播會有乜景況,大家心照。

另外,因為「安心偷食」,黃心穎套《堅離地愛堅離地》都被抽起,換上2017年拍好嘅倉底劇《婚姻合伙人》,咁佢有份拍嘅《牛下女高音》、《法證先鋒IV》都隨時播出無期,咁啱呢兩套劇都喺「2019無綫節目巡禮」入面。

換言之,伏味劇以外,又有突發搞到左減右扣,咁大家話擺喺黃金時段啲劇,點有可能全部都係大台自家製呢。

所以,大台播大陸劇無可避免,就算遲過大陸播,網上亦早已有足本版免費睇,但大台一樣播得好安全,起碼製作規模、劇本、細節等各方面,比起自家嘅倉底貨有過之而無不及,例如《皓鑭傳》都唔突出,但收視一樣好過《福爾摩師奶》咁解。更重要係,大陸劇一個唔覺意跑出,好似《延禧攻略》咁,就算播得慢,一樣可以喺香港攞晒彩,大台自己招呼班演員嚟做宣傳、做大龍鳳。

總而言之,播大陸劇,講差,唔差得過自己啲貨尾;講好,隨時上神枱。


鍾意就快D Share啦!