掃呢頁CODE去手機

2019年5月2日 星期四

歐聯:美斯入金球劏利物浦 巴塞九成入歐聯決賽 __,美斯,

(法新社)即睇全場入球:https://bit.ly/2J8DRxI 美斯再一次證明自己係外星人,歐聯4強首回合梅開二度,帶領巴塞隆拿主場3:0擊敗利 ...


(法新社)


即睇全場入球:https://bit.ly/2J8DRxI 

美斯再一次證明自己係外星人,歐聯4強首回合梅開二度,帶領巴塞隆拿主場3:0擊敗利物浦,大半隻腳踩入決賽!美斯今仗受到對手嚴密看管,但換邊後紅軍始終頂唔住呢位球王,先畀佢門前執雞成功,跟手阿根廷球王更射入絕妙罰球,轉個頭穆罕默德沙拿射空門唔入,紅軍連蛋都破唔到,次回合就算返到晏菲路,都好難創造奇迹。

利物浦今仗有羅拔圖法明奴有傷在身先任後備,球隊搵韋拿杜姆做後上前鋒,可惜上半場表現一般,紅軍都係靠文尼同沙拿於左、右路製造威脅。巴塞就出齊紅軍兩名舊將蘇亞雷斯及菲臘比古天奴打正選,美斯墜後些少配合攻堅。雙方快打快好快入局,4分鐘古天奴靚直線,拿傑錫迪起腳,畀祖爾麥迪比閂出底線,1分鐘後文尼於禁區內被碧基從後撞跌,球證冇判12碼。之後美斯嚟料,於禁區內畀4個敵衞圍住,期間祖爾麥迪比隻手掂到個波,球證亦冇畀12碼。15分鐘美斯獨闖龍潭被閂走皮球,古天奴禁區外一射被接。

今仗正選上陣嘅拿比基達,畀拿傑錫迪夾親,20分鐘就因傷離場,佐敦軒達臣入替。26分鐘巴塞終於憑個靚組織打開紀錄,佐迪艾巴左路插個靚直線,蘇亞雷斯衝前一鏟皮球遠柱入網領先1:0。35分鐘利物浦出現黃金入波機會,軒達臣右路彎過靚波入禁區,文尼插入禁區左腳第一時間一射可惜唔中龍,半場巴塞領先1球。

換邊後利物浦不斷谷上反撲,47分鐘韋拿杜姆入到禁區回後,米拿遠射柱,達史特根飛身撲出,6分鐘後沙拿於禁區左腳抽射,又畀達史特根又飛撲叉出底線。59分鐘沙拿右路傳地波入禁區,韋拿杜姆突登漏,米拿勁射又被接住。利物浦久攻不入輪到巴塞發威,75分鐘美斯於中路突入,法賓奴鏟番入禁區,蘇亞雷斯一射中楣,美斯門前執個靚雞,射成2:0。82分鐘美斯主射三十碼罰球省到人直飛網角,贏到3:0。之後利物浦打反擊,後備換入嘅法明奴近射被救空門,沙拿門前射空門省中柱,未能取得作客入球下輸0:3,要連續2屆殺入決賽,希望接近幻滅。




來源 source: http://hk.on.cc
鍾意就快D Share啦!