2019年5月12日 星期日

北京的藍天白雲 周海媚 __,周海媚,白雲,

52歲的周海媚沒有情人在身邊,一點不覺得孤單,因家中有6隻金毛尋回犬陪伴,她說:「點解要覺得我孤單呢?」
52歲的周海媚沒有情人在身邊,一點不覺得孤單,因家中有6隻金毛尋回犬陪伴,她說:「點解要覺得我孤單呢?」有些事情,自己相信便好。周海媚很愛北京的生活。 ...


有些事情,自己相信便好。

周海媚很愛北京的生活。她說:「我好耐冇睇過港劇喇……最近好似話有部《鐵探》評論幾好嘅,但係我冇睇過。」更遑論ViuTV了,「之前返香港嘅時候,有朋友話過畀我聽有個咁嘅電視台囉,但係我都冇乜點睇過。」

2002年,她到北京拍戲,那年冬天下了一場大雪,周海媚呆在窗前,恰巧又聽着刀郎的一曲《2002年的第一場雪》,就此,決定要留在北京。此情此景,拍戲都冇咁浪漫。

今天呢,當人人都說北京空氣差又霧霾又沙塵暴,周海媚卻說是大誤會。她說2008年以後,實際情況已大不同,「𠵱家喺北京係經常見到藍天白雲嘅,同埋空氣係好清新咁樣囉!」

還說她北漂嗎?早已不用漂了,幾乎已是一個在地人。輾轉在北京16年、依然說着廣東話做訪問的周海媚說:「其實我𠵱家已經好少好少返香港!」

撰文:文嘉龍



《今年飾滅絕師太》25年後再演《倚天屠龍記》,由當年的周芷若演到今天的滅絕師太,周海媚說來淡然:「真係唔算係一個好大嘅挑戰囉,只係一個角色嚟啫!」劇照 《今年飾滅絕師太》

25年後再演《倚天屠龍記》,由當年的周芷若演到今天的滅絕師太,周海媚說來淡然:「真係唔算係一個好大嘅挑戰囉,只係一個角色嚟啫!」劇照
《94年飾周芷若》

《94年飾周芷若》

個個都話北京天氣好差

晚晚在無綫播緊的《倚天屠龍記》,中港台版翻拍無數,今次的強國版輪到52歲周海媚飾演滅絕師太;二十五年前的台灣版中,她是周芷若。由周芷若變滅絕師太,就像演慣少女的,終有一天要變媽媽級,周海媚一點心理掙扎都沒有。「只係一個角色嚟啫,但係大家嘅反應好似比我本人仲要大囉,唔算係一個好大挑戰,我覺得喺我呢個年齡段,係好適合去演呢個角色囉!」

都52歲了,如果要演回周芷若,才出奇吧!她說:「喺某一方面,我覺得做人最緊要係不停咁向前行囉,我唔鍾意經常咁去睇番以前,或者係懷念過去點樣點樣,咁每個人都要向前走,一步一步咁走到今日,先有𠵱家嘅周海媚,我係好自在,亦唔會有啲乜奇怪嘅感覺囉,我覺得係好自然嘅。」

一步一步走到今天的周海媚,從香港到北京,當年為了北京一場雪而決定留下發展,她說:「北京嘅天氣,我覺得大家係有一個好深嘅誤會,個個都話北京嘅天氣好差呀,成日都有霧霾呀!其實初初我嚟到北京嘅時候,係有囉,冬天尤其是,因為燒煤,燒煤就真係會有污染嘅,但自從08年之後,搞咗奧運會啦,政府亦都治理咗好耐呢個污染問題,同埋沙塵暴嘅問題,政府係不停咁有去治理呢啲問題。𠵱家喺北京係經常見到藍天白雲嘅,同埋空氣係好清新囉!」

說到香港和北京的生活,周海媚說沒有大分別,早年初到貴境,比較不適應的只是乾燥問題。「唯一唔同係我初初嚟到北京,天氣係會比較乾燥,尤其是冬天,因為大家都會開暖氣,我就比較唔習慣冬天開暖氣,所以會流鼻血,但係經過咗兩年喺北京嘅生活,就已經習慣咗喇,冇乜呢個問題囉!」



02年因為一場雪,周海媚決定留在北京,十多年的強國生活早已習慣,近年除了拍劇,她更成立自家工作室還簽下藝人。說到最近的「限古令」,周海媚說對她影響不大。

02年因為一場雪,周海媚決定留在北京,十多年的強國生活早已習慣,近年除了拍劇,她更成立自家工作室還簽下藝人。說到最近的「限古令」,周海媚說對她影響不大。

我爸爸走嘅時候好突然

當年決定北上,周海媚的家人全部投反對票,她的胞弟更因為捨不得一向感情深厚的家姐,在家裏哭紅了眼。由細到大,周海媚與家人感情好好,前年爸爸病逝,她至今無法釋懷。

「我爸爸走嘅時候係好突然,雖然佢一直以嚟都係有cancer,係淋巴癌,但佢一直都維持得好好,同埋醫生睇驗血報告,都話佢維持得好好嘅,話冇乜特別事呀咁!平時睇佢都係好健壯,但係喺我拍緊戲嘅當中,突然間咁走囉!我真係好傷心,我當其時係拍緊《香蜜沉沉燼如霜》,我裏面演天后嘅,但係我唔可能因為父親嘅離世,而唔去做我嘅工作,咁我都要好好地去完成佢囉!」

爸爸離世後,周海媚在微博曾以「爸爸變成我的過去式」為題,發文寫下不捨之情,回憶小時候爸爸騎自行車帶她去看李小龍電影,還透露爸爸是滿族後裔,18歲那年和朋友從廣東游水偷渡到香港的往事,最後她寫下「爸爸您要去的世界……我不知道在哪?我要怎樣才能再見到您呢?」。

話走就走,人生就是很多突如其來的變化。多年來,一直有傳周海媚被「紅斑狼瘡症」困擾,對於這個醫不好的病,她一直都沒有親口承認,只說是謠傳。

今天她說,是最後一次回答。「唉,呢個話題呢,已經傳咗二十幾年喇,我唔知大家攰唔攰呢?但係我就覺得好攰喇!我最後最後一次回答,我冇大家所傳嘅呢一個病,我只係自細血小板低,我當時血小板低,學校係知道嘅,我當時係唔可以上體育課,因為血小板低會好容易撞傷撞瘀,所以我唔可以上體育課!但係我其他方面都係非常之正常同埋健康嘅!」



周海媚唯一承認的圈中男友是呂良偉,85年合演《小島風雲》撻着,兩年後更在拉斯維加斯登記結婚。資料圖片

周海媚唯一承認的圈中男友是呂良偉,85年合演《小島風雲》撻着,兩年後更在拉斯維加斯登記結婚。資料圖片

點解一定要去結婚

健康生活,最重要還是心態健康,周海媚說,常常緬懷過去是沒有意義的。被人說是美魔女,究竟怕唔怕老?「點解要怕老呢?我真係唔係好明囉,人梗係要向前走㗎啦,要不斷咁向前走,唔可以成日回頭望㗎,唔好回頭看好冇?成日去懷念有乜幫助呢?睇住前面嘅路,好好咁活好你自己,先至係正確嘅諗法囉!」

唔怕老,更加唔怕孤單。「其實好熱鬧㗎喎我屋企,我有狗狗啦,同埋屋企又有保母照顧啦,又有助手,點解要孤單呢?點解要覺得我孤單呢?」

其實周海媚在北京的日子,2015年之前一直有男友相伴,當然不孤單。2003年,她與內地建築師男友一見鍾情,愛情長跑了12年有多,可惜女方始終不想結婚,兩人三年前分手了。周海媚說:「係咪一定要結婚先至叫唔孤單呢?如果你結咗婚,但係個男方對你唔好,或者對你暴力,咁你咪又係好孤單!𠵱家我聽講有好多係寡婦式帶仔女,帶住啲小朋友,點解會咁講呢,其實有好多都係個丈夫出去工作,自己就一個人獨力帶大自己嘅小朋友,或者個丈夫係長期喺外地工作嘅,我經常聽到呢啲case囉!所以我覺得點解一定要去結一個婚,去鎖住自己嘅生活呢?我點解唔可以好自由自在、開開心心咁過我自己嘅生活呢?我覺得好正常吖!冇乜問題呀,順其自然囉做人!」

周海媚自由自在的生活,是這樣的:「我係比較宅啲嘅,我鍾意唔做嘢嘅時候就喺屋企啦,咁大家都知道我養咗啲寵物啦,係狗狗啦,咁我都希望唔工作嘅時候,過番一啲我自己想過嘅生活形式囉!」

反正結婚,周海媚又唔係未試過,大家仲記得的,是她與呂良偉的一段情。當年和呂良偉拍劇撻着,拍拖兩年就被爆曾在拉斯維加斯秘密登記結婚,周海媚當時只得21歲,不過兩人未有在一年內完成註冊,所以婚姻未有生效,周海媚亦從未後悔這段「婚姻」。



周海媚的緋聞男友,連日本的永瀨正敏都榜上有名,緣於97年拍的日本J-Phone廣告。資料圖片

周海媚的緋聞男友,連日本的永瀨正敏都榜上有名,緣於97年拍的日本J-Phone廣告。資料圖片

【後記】永瀨正敏

都說周海媚的花旦形象太深入民心,幾乎令人忘記,她其實是85年港姐出身的。關於海味的情史,最令人記得一定是呂良偉和黎明,說到最離奇,非永瀨正敏莫屬了。

時為1997年,當年周海媚到日本拍廣告,傳出戀上永瀨正敏,日本雜誌更指她介入永瀨正敏與小泉今日子的婚姻。今天說起,她依然覺得不可思議,「係呀,係奇怪得好異常囉!首先我覺得根本語言上一啲都溝通唔到,跟住只不過係拍咗一個廣告,一系列嘅廣告啦咁樣,咁就俾人炒作為一個新聞,其實當時我嘅感覺係好唔好㗎,亦都導致我後尾好唔鍾意去日本工作囉!」

不愛日本,還是覺得北京可愛。現在家有六隻金毛尋回犬相伴,雖然口說不孤單啫,但仍想有一個情人在身邊吧?周海媚說:「我覺得我頭先已經答得好詳細喇,我唔需要再答你呢個問題,所以我覺得唔需要囉!」

收到。都說周海媚演滅絕師太最好不過,峨嵋劍法就是——滴水不漏,偏重防守。




鍾意就快D Share啦!
Related Posts Plugin for WordPress, Blogger...