2019年5月12日 星期日

【BossTalk】導師搶客自立門戶 草蜢蘇志威:計好數先,否則慘淡收場 __,草蜢,蘇志威,

九十年代創業慘蝕過百萬,任憑演藝圈再好搵,對任何藝人來說也非常「肉赤」。不過,生意觸礁從未打擊蘇志威要做老闆的決心。十年後東山再起,跳舞學校生意有聲有 ...


九十年代創業慘蝕過百萬,任憑演藝圈再好搵,對任何藝人來說也非常「肉赤」。不過,生意觸礁從未打擊蘇志威要做老闆的決心。十年後東山再起,跳舞學校生意有聲有色,惹來旗下導師大膽搶客另起爐灶,躊躇滿志欲嚐做老闆的滋味,卻踏上蘇老闆的舊路。



「佢哋唔明呢樣嘢,自己貿貿然開一間(跳舞學校)走去教啲學生,好慘淡收場」,正籌備開第五間跳舞學校的蘇志威說。「呢樣嘢」是甚麼? 藝人做生意,起步無疑比一般人快,但生意要長做長有,關鍵不在於有明星座鎮,而在於摸索出正確的營運模式。



導師自立門戶死症——客量不足

開辦任何課程,學生數目是基礎。然而,有多少學生才養得起一所跳舞學校?「唔係話有十幾廿個學生跟你出去,呢30個學生跟住你走,離開我舖頭唔緊要,呢30個學生點樣養你呢?佢哋唔會同一時間上你個班;一個話5點、一個話6點、一個話7點鐘,一個話3點先得閒,你點就呢啲客呀?」



蘇志威坦言,近年曾有3名導師在其舞蹈學校建立一定的學生群後,帶走學生自立門戶,不過,由於學生數目太少且分開不同時段上課,大大加重經營成本,一般營運不足一年便虧損收場。死症是忽略了客量夠多才得以支撐收入基礎的道理。



蘇志威與數名拍檔在港經營四間跳舞學校,總學生人數達3萬名,每間學校近萬呎,共3個班房。「同一時間,30,30,30,我差唔多100人,一個鐘頭有100個學生,跟我3個導師跳舞」,有足夠的學生,課堂輕易額滿,每小時收入有保證,學校才有足夠營運資金。「你幾辛苦先一班可以有10個人?30個人跟你,一班有5個人已經好開心。你一定要搞到好大,搞到連鎖店咁先得,佢哋唔明呢樣嘢」。他建議有意創業的導師們「計好數先」,否則容易焦頭爛額。



講理想先要養活自己

然而,有些導師志不在賺錢。出身於跳唱組合草蜢的蘇志威,身邊不乏辦校決心培育有潛質的舞蹈表演者的朋友。重點一對一培訓的專業課程,學費自然十級跳。「個學生會畀好多錢個導師,但一對一咁教,養唔養到自己呢?其實好大問題。個生意好有理想,好有大志,但生意角度係好危險,好難做。」



第五間位於鰂魚涌的分校預計於今年內開業,主打一對一專業課程,兼聘請國際知名導師駐校。蘇強調,這類課程收入高,但不可能成為主要的營運收入。「佢係part of個生意,而唔係生意嘅全部。」有大眾課程才能支持小班專門課。「兩樣行,就唔同你一對一」。



除了營辦跳舞學校,蘇老闆亦開設3間西裝禮服店。生意經講得頭頭是道,源於九十年代開CD舖的沉痛教訓。「嗰個經驗就係,任何地方都可以買到同一質素嘅嘢,競爭力唔夠。我只吸引到啲人上我舖頭睇一睇,但會唔會上嚟買嘢呢?其實佢冇必要幫襯我,因為佢行去屋企樓下買嗰隻CD,同特登答車去我舖頭買嘅CD嘅質素係冇分別。我冇優勢。」(蝕咗好多?)「嘩……九幾年都蝕百幾萬呀,成層樓囉,蝕咗跑馬地一層樓」。此後蘇志威提醒自己,做生意要有獨有的服務和市場定位。



談藝人的「性格缺陷」

演藝圈是個獨特的職場環境,於圈中打滾近三十年的蘇坦言,演藝事業上自己可以「話哂事」,但放諸生意層面,過於自我中心會好危險。「你一定要聽返前線人員話你知,啲客要求啲乜嘢、啲客入到嚟覺得點,唔係我話要點點點。」始終仍在演藝圈工作,投入業務的時間有限,「有啲嘢係要轉,唔係你話哂事,要個市場接受先得」,藝人做生意,或許更要學懂放下身段。



鎂光燈下不再是個人秀,做老闆更講求知人善任。「我有啲員工,畀個經理佢做,佢都唔係好想做,我想朝早晏少少返工,放工唔好O我T,我就好happy。總之我每個月收入咁上下我就夠喇,你就唔好叫我做管理人喇」,職場上有人求升職,有人求安穩,主動了解員工想法,自然合作愉快。



現時生意總算上軌道,合作伙伴功不可沒。「我哋(藝人)好多時唔喺香港,每個月嘅例會,人事上嘅嘢,我點理得咁多呢?如果我partner唔幫手follow,我點可以做到咁多嘢呢?所以行政上一定要有partner幫我管理成個團隊。但重要事情一定要一齊傾」。尤其蘇志威仍活躍於演藝圈,演唱會、節目、出唱片等工作接踵而來,正正是他選擇合資搞生意的原因。他寄語有意做生意的藝人,適時將業務放手予拍檔管理。



記者:邱曉欣

攝影:何耀勤



影片:

採訪:邱曉欣、余曉芸

編撰、旁白:余曉芸

攝影:S. Dragon

剪接:許碩允

編導:何文超



investMAN

For People of Style & Substance

掌握理財智慧 感受生活品味

http://facebook.com/investMAN.hk




鍾意就快D Share啦!
Related Posts Plugin for WordPress, Blogger...