反送中修例事件由月初爆發之後，一直持續到今日仍然未有結案，縱然示威人數兩次過百萬，幾乎每日都會有示威場面，但政府仍然懶理，令一眾香港市民憤憤不平。
而於今次一連串的事件當中，新聞工作者擔任重要角色，除了將第一手資訊發放之外，更記錄下不少畫面，有監察警方及示威者的作用，將真相擺在公眾眼前，不過當中無綫的報道被不少市民質疑嚴重偏頗，鬧爆無綫是「維穩台」，更有示威者極力阻止無綫記者進行採訪工作。
今日《100毛》的老闆林日曦在社交網站分享了一段公開信，並表示內容為同事在無綫工作的前線記者朋友所寫，信中表示「我哋亦都明白，好多我哋嘅報道，寫法偏頗。你哋嬲，激氣，係合情合理。甚至我哋私下，都會希望大家鬧，最好鬧到我哋嘅高層知驚。」不過，該名前線記者認為「高層永遠唔會覺得自己錯。袁志偉根本唔在意你哋嘅聲音」，更鼓勵廣大市民就偏頗報道向無綫對外事務部投訴。
相關新聞：【引渡惡法】失蹤第11日 尋人：林鄭月娥
林日曦完整貼文如下：
很多人對TVB新聞部前線記者的不滿越演越烈，同事有位朋友在TVB新聞部工作，她有一些說話很跟大家分享讓各位以另一角度看看：
「我係TVB嘅前線記者。因為呢排嘅事，有少少嘢想同大家講。
作為新聞工作者，就算我哋有咩理由抗辯，我哋明白，最後出嚟嘅新聞，我哋都有份。我哋亦都明白，好多我哋嘅報道，寫法偏頗。你哋嬲，激氣，係合情合理。甚至我哋私下，都會希望大家鬧，最好鬧到我哋嘅高層知驚。可惜，高層永遠唔會覺得自己錯。袁志偉根本唔在意你哋嘅聲音，唔會覺得自己有問題。甚至佢會刊出投訴數字，然後表示好多人投訴我哋偏幫示威者。係呀，係好荒謬，好痴線。呢個就係高層嘅世界，佢自己創造咗一個平行時空。
新聞製作，前線記者同攝影只係佔一部分，仲要經過寫稿、剪輯、做VO、採主Check片等等工序先出到街。簡單講，喺現場做緊嘅前線同事控制唔到條稿點寫，甚至做VO嘅同事，都未必真係講緊自己想講嘅嘢。我可以好肯定咁講，我哋前線記者，絕對支持新聞自由，支持普世價值，新聞原則。採訪現場，我哋唔會，亦都唔會容許自己偏幫任何一方。我哋可以做嘅，只係將真實報返去。最後報道出街變晒樣，我哋都唔想，甚至我哋都好嬲，因為我哋出樣、出聲、出名，出到街，就變咗係自己嘅報道。
咁TVB仲有冇存在意義呢？其實我仲係覺得有。而家呢個係開Live嘅時代，多幾部Cam開Live，其實真係記錄到多一點事實。例如今次射頭，警察掟鐵支等等，其實我哋嘅攝影師都捕捉到，Live已經出晒街，亦有網民Cap到圖。至少，我哋成功記錄咗事實。同埋，關於話我哋冇用啲片，事實上係我哋內部非常混亂，612當日海量直播片傳返公司，人手上或方法上都冇好好組織點去Mark低啲重點片段，其實能做嘅，我哋都盡量做。之後組織返，我哋都盡量出返。TVB係大台，但內部真係好混亂，指揮調配真係好差。
有人話，做TVB就係共犯，有良知應該辭職。首先我想講一句唔好聽嘅，我哋都要生活，係好卑微，但呢個係事實，我唔會否認，好多同事屋企一家大細，真係唔可以話走就走。同時我哋都會諗，我哋堅守工作崗位，盡力把事實全部記錄低，點解最尾我會被逼到生計無埋、飯都冇得食？點解唔係坐喺房入面嗰啲人去承受？
仲有一點係，呢個平台真係有影響力，就算大家唔開電視，茶記都日日播，商場，醫院又會播，你點都會吸收到我哋嘅新聞。大多數同事都係堅守新聞原則，問心，我哋都有出過一啲公道嘅故仔，或者至少，我哋可以令件事唔好去到咁極端。如果我哋真係走晒，佢再換一批更易控制嘅，就會連最後少少平衡都打破埋。
我哋一直都提自己，可以做嘅，盡做。
呢幾日，已經去到一個，每位同事都好灰、好唔開心嘅地步，我先會咁樣講出嚟。之前有人喺網上將一班同事起底，我哋都好擔心。見到前線一直好努力嘅攝影同事，被攻擊同辱罵，更加係痛心。我哋都有喺崗位上，盡力為香港做事。或者我哋可以做嘅，只係防守，防守新聞價值，但我哋都真係有努力。
最後，有幾樣嘢想講埋。真心希望，大家唔好搞出去採訪嘅同事。行出去，畀大家鬧，返到去，再對住呢班老細，我哋真係好辛苦好大壓力，希望大家體諒。同埋希望大家唔好起底，真的。如果喺現場，你覺得我哋（或任何記者）有違反新聞操守嘅行為，即管質疑，但希望大家真係唔好見到TVB就圍。
大家盡量Cap低所有失實、偏頗嘅報道，然後去投訴。記得，通管局其實冇咩能力去判斷新聞，所以請同時寄埋去TVB對外事務部，我仲係相信，作為一個商營機構，群眾力量夠大嘅，佢好難置諸不理。新聞部，都係成間公司其中一個部門。同埋，希望大家接受，TVB真係大台，大家點鬧都好，好多中老年人，都真係靠TVB吸收資訊。或者可以試下，同長輩們分析下，或者見到公道嘅故仔就叫佢望多兩眼。佢哋信任TVB，我哋都可以利用呢一點。
最後我想講，我唔係叫大家唔好再鬧，大家應該鬧，甚至有行動（例如投訴）但希望大家可以明白我哋前線嘅情況，容許我哋同大家一齊努力。做到幾多得幾多，請相信我哋。多謝大家。」
-----------------------------
7月4日起 《蘋果動新聞》只限升級壹會員閱覽
繼續撐蘋果！
| | |
|
鍾意就快D Share啦！
|
|
|