2015年憑一首以900蚊低成本製作的《SUGAR BABY》MV，在網上爆紅的女子組合FFx，在旺角麥花臣場館開過演唱會，但入行一年已極速在娛樂圈消失。
當年人氣最高，只得16歲的周葆諭（Christy）突然離隊，隻身赴台灣高雄修讀職業治療，化身「醫療女神」。Christy早前放暑假返港，並接受《蘋果》專訪，表示無悔當初決定。Christy說：「當年經理人有留我，問『點解唔留喺香港做女神，辛苦建立咁多嘢都要放棄？』但我覺得，如果有咁嘅quali，我都會成為女神，唔應該將喺娛樂圈建立咗嘅嘢，而放棄之後嘅可能性。我覺得讀職業治療後，係一個新嘅人生，冇後悔過。」
Christy還自爆一個小秘密，說：「我讀小學時成績幾差，28名考24名。去到中四，有位英文老師發覺我寫字好慢，細個又會寫鏡像字，左右、上下掉轉，部首又會寫錯，咁老師就叫我去check，評定我係有讀寫障礙。」Christy不介意公開，還即場寫了自己的名字，十分方正，她笑說：「好似小學生寫標楷體咁，我要咁寫先啱，雖然起步比人差，但努力去練習係會有改善嘅。」
成為台灣大學生，入讀義守大學的Christy還有一年便畢業，最近香港的政治環境複雜，問她去留？她說：「唔係因為呢件事都有少少想（移民），因為好鍾意台灣，日落好靚，入𨋢叔叔婆婆都會同你打招呼，家人話如果我移民冇所謂，佢哋可以過嚟。但自己亦掛住香港，始終台灣薪金比香港少兩、三倍，到時睇吓邊度缺人手，我最初讀呢科都係想幫多啲人。」Christy自言家庭環境一般，所以選擇到較平學費的台灣讀書，而在學習過程中，有機會接觸不同病人，令她成長不少。她說：「Year 1時去過老人院帶復康活動，一位老人家突然羊癇症發作，先知原來我哋做復康都需要急救知識。之前我又好怕同人有身體接觸，驚男女授受不親，以前係幫病人抹gel都唔ok，但其實做治療師唔應該介意。」
大家或者疑惑，做過o靚模都咁怕羞？但相信FFx的粉絲們都知道，Christy由出道至今都守身如玉，從未着過泳衣出騷，她說：「我當年仲讀緊中學，都係想做勵志組合，想做好少少形象畀學校睇。嗰時副校長都有叫過我面談，都幾驚㗎，驚佢話我哋個MV拍得衰，唔知記我乜（大過）。好彩入到去，佢話知我係乖女嚟，知你會讀書，只係叫我小心外面啲人，唔好俾人呃，真係好好。」Christy坦言最怕身材成為焦點，她說：「以前經理人會叫我哋出騷時着得性感啲，但我就會着長袖衫同圓領。我真係唔想為性感而性感，女仔形態係好靚，前凸後翹，但唔刻意反而係最靚。」
Christy雖然不刻意性感，但在貼身衫下仍難掩35D逼爆身材，加上清純外貌，吸引不少宅男粉絲，但同時，亦招來拍檔的妒忌。她直認當年與楊澤怡（Shirley）不和，更被對方誣衊，爆她與經理人Sam拍拖。Christy呼冤說：「佢（Sam）冇追求過我，我成日嗌佢爸爸，我有時都講笑，如果我親生阿爸追求我都幾奇怪，一定唔會。我知佢（Shirley）唔鍾意我，覺得我搶咗佢風頭，特別呢個圈，我明嘅，我有嘗試對佢好啲......因為一個team紅唔紅都好，最少要團結先。但爆咗呢單新聞，我係好介意，因為當時我已經決定轉行，但佢仲要整衰我個名，人哋google search都仲會見到，對一個女性嚟講係好大侮辱，我都驚第二時嫁唔出。」
拆夥後，Christy與Shirley都有食過「和頭飯局」，但感覺怪怪的，Christy反而與另外兩個拍檔李詩詠（Ceci）和潘穎琳（Mizaki）仍有聯絡，她說：「佢哋都係做美容業，Ceci仲開咗間舖頭仔，做埋化妝師，幾幸福。」Christy透露剛與男友分手，在台灣3年亦一直有與fans保持聯絡，她說：「旺角嗰次都算有觀眾，以前喺商場做show真係對住空凳表演，真係好sad，所以我好珍惜呢班fans，由一開始已好支持我。」問她會否再入娛樂圈？Christy說：「睇機遇，應唔應該存在好睇觀眾，main point係有冇人睇得起我，但我都會以職業治療為主。」
採訪：嵐山
攝影：葉君海
攝錄：林德雄
------------------------------
【每周送10萬】
升級壹會員獨家尊享，立即參加10萬火急大抽獎!
*推廣生意的競賽牌照號碼：52302-9
| Christy透露中四時發現自己有讀寫障礙，但憑住加倍的努力，現於台灣修讀職業治療。 | | |
| | | |
| | | |
| | | |
| | | |
| | | |
|
鍾意就快D Share啦！
|
|
|
