掃呢頁CODE去手機

2019年8月2日 星期五

【大台搞笑王背後的痛苦】戴耀明走過焦慮症:最差時lift都搭唔到 __,TVB,大台,戴耀明,

由16年《EU超時任務》動L一幕,到近日《十二傳說》嘅「了哥」,大台綠葉戴耀明,都擅演搞笑角色。但鏡頭前嘅一面,同現實有落差。「搭巴士人多時,會突然間 ...




由16年《EU超時任務》動L一幕,到近日《十二傳說》嘅「了哥」,大台綠葉戴耀明,都擅演搞笑角色。但鏡頭前嘅一面,同現實有落差。

「搭巴士人多時,會突然間透唔到氣,好似俾人鍊住係喉嚨。同埋搭lift會好驚,原來係幽閉恐懼症。我從來冇諗過自己會有情緒病,嗰一刻好驚訝點解我會有情緒病。」搞笑王走過焦慮症。

47歲戴耀明,係家中獨子,性格使然,易為明天憂慮。容怕有天失去雙親﹑擔心有冇工開,習慣報喜不報憂。到爸爸過身,誘發病因。

戴耀明:「大概七八年前左右。爸爸走咗,以後返到屋企都見唔到最親嘅人,接受唔到呢件事,有段時間經常會悶悶不樂,身體亦有啲反應,就係個心會有鬱悶感覺。最初嗰幾個月都經常失眠,同埋個人會提唔起勁。我記得試過最長記錄係三日唔出街,淨係打機,屋企雪櫃搵嘢食煮,食到無晒至肯落街。」

症狀浮現越來越嚴重,他才意識身體出問題。「有一次坐巴士,當時好多人,突然覺得喉嚨頂住,有種被人鍊住條頸嘅感覺。當刻仲以為扁桃腺有問題,因為啱啱扁桃腺發炎好番,以為咁樣導致透唔到氣。」

最後經醫生診斷,係抑鬱症引伸嘅焦慮症。 最嚴重時,戴耀明唔敢搭lift。

「嗰段時期,去旺角都好驚。遇上人多,膊頭撞膊頭,就好想盡快離開呢個環境。搭lift都唔得,就算搭lift唔多人,甚至有時無人都感不安,我唔知點解。好似有個學名,咩嘢「幽閉恐懼症」,我從來無呢樣嘢,但嗰段時間幾廿個問題嚟探訪我咁。我仲記得有一次,拍完一套戲,要去工廠區配音,反正近屋企,我索性叫阿媽陪我搭lift。

我覺得如果你睇醫生,發現自己有焦慮、恐懼,或者驚恐症,如果最初嗰段時間,真係好辛苦嘅話,某程度上藥物係幫到你。但唔好諗住長期依賴藥物。我覺得任何嘢都總有自然復元嘅功能,所以除咗藥物,當時日常我亦靠自然嘅方法去救自己。」戴耀明說。

拚盡氣力踏出黑洞服藥半年康復,但他體會這個病並非一勞永逸。「有呢個唔一定要食一世藥,或者覺得自己一定死梗,呢個唔係一個絕症。不過人生亦都係好矛盾,佢唔係絕症,但亦唔係一個可以害易完全根治嘅問題。」

情緒生病,有人選擇逃避,而戴耀明,努力幫自己搵出口,就算病發時幾咁冇力,佢都拼命爬出呢個黑洞。

「由最初發病一兩個月,真係咩嘢都唔想做,淨係攤喺度。直至要出去見朋友時,個轉接位係要少少勉強自己,踏出第一步。有時候自己唔喜歡嗰樣嘢,唔想做嗰樣嘢,原來當你勉強自己開始第一步、第二步、第三步,做到之後你會發覺,原來對我有益㗎喎!」 「於是我搵一件事做,係可以幫到自己長時間分散注意力,又令自己唔去諗嗰樣嘢,我發覺行路係幾好。好鍾意由鰂魚涌地鐵站,一直行去中環,嗰段路都有七、八個站,大概需要兩、三個鐘。過程中好似有好多嘢進入你眼內,一來沿途觀察人有助演戲,二來又可以鍛練心肺功能,所以我覺得都幾好。

有時遇到啲挫折或者唔開心嘅事情,都會有少少嗰種作感冒嘅感覺。一作感冒,就即刻外出散步。」

佢口中嘅「作感冒」,係指間中復發。

「作感冒嘅時候,我就會第一時間出去行下,有時都唔分早晚,半夜三更都試過。可能十二點、一點左右,都會行兩、三個鐘,然後三、四點至返屋企,呢個算係醫自己嘅一種方法,咁傷風時就唔需要食傷風藥。就算翻發都好,都未必係咁大件事,唔需要將事情放到咁大去睇,否則自己嚇自己。」 病發時,還要對住鏡頭搞笑逗人開心,辛苦嗎?

「工作某程度上係拯救咗我,因為工作有使命感,唔開工就無收入,無收入就無飯食,好簡單,變咗我要工作。加上工作時身邊就會有一大班工作人員,大家一齊開開心心傾偈,又嘻嘻哈哈講笑,有時又講吓鹹濕嘢笑吓,反而呢啲環境會救咗我。」說著的戴耀明,永遠有笑聲相隨。 眼前嘅佢好瘦削,雖然已經康復,但呢個病一度令佢暴瘦十幾磅。

「有啲同事見我突然間瘦咗,會話﹕「唔好意思問你,其實係咪有癌症?」我話唔係。的而且確之前有啲同事離世前,係會變得好瘦,所以好多時其他人第一個直覺,會覺得小明係咪出咗事,但又唔好意思去問,我都好多謝大家關心。我諗瘦咗主要係因為之前情緒問題。」 人唔去到病,都唔肯改變。唔想再跌番入黑洞,戴耀明開始改變自己嘅思維。

「你嘅諗法、思維會影響一生。以前好易憂慮,依家明白就算發生咗一件好苦嘅事,其實都可以喺苦中有啲得着,即塞翁失馬,焉知非福。」

佢亦唔再收埋自己嘅感受,會搵朋友傾計分擔。其中一位係「包青天」譚俊彥。

「其實除咗Shaun(譚俊彥)之外,仲有其他朋友知道,不過就唔係咁多,可能五隻手指數得晒。Shaun係其中一個圈中嘅人,感覺至少有人了解我。」

採訪:Sukey

攝錄:黃志明

場地:Chill Place 詳情:http://bit.ly/2YBCug0

鍾意就快D Share啦!