掃呢頁CODE去手機

2019年9月4日 星期三

【巿民身上搵錢】吳耀漢指要香港全面減稅:你個X家剷政府,加稅加到咁 __,吳耀漢,

(攝影:陳俊強)
已經是79歲的吳耀漢,年初向傳媒透露患上腎衰竭,腎功能大概剩一成功能,為了排去身體毒素,他需要每天洗肚,但他沒輕言退休。拍過賀歲片外,早前拍攝靈異驚慄 ...


已經是79歲的吳耀漢,年初向傳媒透露患上腎衰竭,腎功能大概剩一成功能,為了排去身體毒素,他需要每天洗肚,但他沒輕言退休。拍過賀歲片外,早前拍攝靈異驚慄片《雙魂》,近日準備宣傳接受訪問。他表示戲中的角色暴躁,跟戲中「太太」吳浣儀和「女兒」衛詩雅有爭執戲,加上要在馬來西亞拍外景,坦言消耗好多體力,但仍能應付:「而家拍戲第一樣嘢同製片講,我一日唔可以做多過8個鐘,之後要返屋企洗腎,喺屋企靠吊住嗰啲水洗。好多時個人係好易攰,但OK嘅,心態係點都做都要死撐,哈……」



近來吳耀漢漸覺身體機能開始退化,回想年輕時一天拍戲,休息半小時可以繼續做,但現時一休息至少兩小時,聽起來確實令人憂心,難得他解說時卻說得簡單又輕鬆:「年紀大,可能機件開始壞,感覺係個身體陸續呢樣嗰樣,除了洗腎,自己個身體都開始老化,呢隻眼(左眼)就快要做白內障,早排成日流鼻血,早幾日入醫院電個鼻入面嘅微絲血管電死晒,總之係OK啦﹗家人係十分擔心,會以為我病到攤攤腰,我話你知其實唔係,我仍然可以做嘢拍戲,可以揸車出街冇事,唯一遺憾冇啖好食。早幾日去馬來西亞拍戲,老婆都叫我諗清楚,但睇咗劇本,我覺得應付到。」他沒有停止工作,因為由始至終都喜歡演戲,在英國時修讀戲劇的他熱愛演戲:「冇第二樣嘢鍾意,每一次(拍戲)都係一個新嘅遊戲、新挑戰,唔同角色、劇本,講自己唔會講嘅對白,因為你係做緊另一個人,好似一個game,每次好似新遊戲,我玩咗好多遊戲,最鍾意做喜劇,自己做嘅時候開心,睇番片自己都忍唔住笑。」



面對近日社會上普遍巿民的上街聲討,育有一子三女的吳耀漢,跟很多父母一樣,面對樓價不斷颷升,也會主動幫手畀首期,他形容樓價「發咗癲」,吳耀漢談到時事不吐不快:「最近咁多事發生,關於香港社會我有個好簡單諗法想畀啲意見,可能第一件事要做係全面減稅,所有政府機構賺少啲錢,香港公共服務賺少啲,即係可能實質全面減10個巴仙,如果政府同大機構做呢啲,巿民生活好好多。我唔算窮,但覺得10幾元一公升電油,一大半係稅,係冇必要嘅,煙仔宜家要50幾元一包,話貴到咁要戒,廢話!我一定唔會戒,但每次買煙就心諗:『你個X家剷政府,加稅加到咁!』真係嬲,係不必要。喺大陸食煙好平,入油好平。但香港啲稅搏命咁加,咁多年來搏命喺我哋巿民身上搵錢,搵搵埋埋唔知用嚟做乜。」



富二代的吳耀漢,父親吳海霖是九巴和九龍殯儀館的創辦人,應不愁生活但亦明白民間的辛苦:「好多人都話點解咁辛苦,買樓又辛苦、交學費又係辛苦,地鐵又話加價,香港所有服務機構,每年都要賺唔知幾個億,點解一定要賺咁多錢?賺少啲吖,賺少10個巴仙,香港幾百萬巿民得益,我哋日常使嘅錢好多係稅,隧道(費)有冇必要咁貴?外國好多政府生意係蝕,為巿民蝕本都要做,我哋香港政府每一個部門都係諗緊點樣同政府搵多啲錢。嗰啲官都要減薪,香港任何一個官賺嘅錢多過我哋國家主席,有乜可能?香港政府係放縱到亂晒籠。」他感概連教育方面,很多學校要家長買學校債券,社會上的人每天起身便要想着怎樣能賺更多錢:「香港令巿民自自然要諗點搵錢,點樣搵好多,多多都唔怕,所有嘢錯晒,人生唔係話每一日做人要搏命去搵錢,我覺得政府要檢討、帶領,我講嘅係全面化。」



兒子吳嘉龍未結婚,吳耀漢覺得不用急於要一紙婚書:「現代嘅男人應該事業為先,搵啱伴侶唔使理結唔結婚,我知佢有啲恐懼,恐懼負擔、責任,尤其香港嘅環境,生仔係大禍臨頭,養大一個細路要好大筆錢、好大精神負擔。」同樣在香港電影圈工作,兩父子合作不多,吳耀漢哈哈大笑說:「一齊拍戲佢有壓力我冇,試過一齊拍完佢話驚,覺得老竇好鬼死勁,佢覺得怯場。我冇教佢(做戲),佢都唔畀,自己摸索,其實演戲好難教,只可解釋理論。」他覺得兒子十分有天份,只可惜廣東話不流利,在香港很難搵食:「因為佢係混血,好多導演會有少少偏見。」



吳嘉龍跟吳耀漢一樣,10幾歲便到英國寄宿留學,父子相處少,吳耀漢坦言有隔膜,但大家都是直腸直肚,有意見會說出口:「有時好儍為好簡單嘅事,講緊去邊度食飯唔同意見都拗,有時好無謂囉。人到70幾歲時好多嘢覺得費事嘥氣,好無謂,好多嘢喺人生並不重要,好多嘢覺得唔好嘥氣,但40幾歲既覺得好緊要會執着,」



採訪:王連連

攝影:陳俊強

攝錄:馮嘉銘



-----------------------------

【撐學生】

召集有心人 撐學生全年睇《蘋果》

立即按此



(攝影:陳俊強) 吳耀漢漸覺身體機能開始退化 吳耀漢漸覺身體機能開始退化
吳耀漢談到時事不吐不快

吳耀漢談到時事不吐不快
吳耀漢形容樓價「發咗癲」

吳耀漢形容樓價「發咗癲」

鍾意就快D Share啦!