2019年11月6日星期三

【過年咁樣】好姊妹紅衫賀壽胡杏兒攬老公過40歲生日 __,胡杏兒,

【過年咁樣】好姊妹紅衫賀壽胡杏兒攬老公過40歲生日

胡杏兒40歲牛一，至愛嘅老公同老友都喺身邊。

今日係胡杏兒嘅40歲生日，尋晚佢個靚仔老公李乘德（Philip）已經幫老婆喺酒店搞咗個生日Party，老婆一班好姊妹「胡說八道會」嘅成員胡定欣、胡蓓蔚、黃智雯、姚子羚及李施嬅着到靚靚出席。從一眾索女打扮可見，生日Party嘅Dress Code係紅色，過年一樣咁喜慶。

踏入四字頭，壽星女好感觸，「時間過得真係好快，眨吓眼就踏入4字頭，真係好幸運好幸福，有一班好姊妹每年一定陪我過，有個錫我嘅老公加兩個健康活潑可愛嘅BB，加上身體健康，感恩感恩，踏入4字，要更加努力做好自己各個身份，多謝家人支持和愛護，我會努力。」

而李施嬅就祝超級媽媽杏兒，「踏入新的人生階段，更加大紅大紫，更加美麗，再生多啲B’sssss。」黃智雯就咁講，「踏入美麗的40，一定要跳番隻Happy Dance，你係我心目中的role model，型格又得，優雅又得，做媽媽又得，有咩你唔得! 祝您願望成真，繼續散發自信自在從容的氣度～love u forever 。」而胡定欣就祝杏兒20對生日快樂!「我成日都話你有一張好好的人生時間表，無論工作上或是家庭上，一切都來得剛剛好，轉眼間你已經成為人妻還是兩子之母，呢個20對係非常美滿！接下來，不用急慢慢行，好好享受每步，大家一齊行！WE LOVE U。」

最好笑係杏兒老公，佢喺微博咁樣講，「老婆，歡迎你踏入四字頭！40歲的成就， 18歲的樣貌，真係正。」