2019年11月16日 星期六

【抗爭喚醒幾代人】袁彌明有個70歲「衝衝爸」 袁父:啲後生仔好偉大 __,袁彌明,

攝影:沈健程
這天跟袁彌明(Erica)父女做訪問,也決定由維園出發。父女政見一樣,支持反送中,他們於6.16一齊上街遊行。70歲的袁爸爸在內地出生,7歲來港,他說 ...






這天跟袁彌明(Erica)父女做訪問,也決定由維園出發。父女政見一樣,支持反送中,他們於6.16一齊上街遊行。



70歲的袁爸爸在內地出生,7歲來港,他說:「因為做生意,我住過20年大陸,20年美國,30年香港。」他理解三地不同的政局,袁爸爸愛自由民主。



一個平靜的閒日,沒有抗爭活動的維園,沒有防暴警硬闖,沒有催淚彈,袁彌明父女走過足球場,在公園的木凳坐下,享受公園的鳥語花香,「一切由呢度開始,(遊行集會時) 呢度就係戰場,但你今日睇睇,幾太平,有人一家嚟行吓,亦有老人家喺度享受緊寧靜,而家係天堂,當時係戰場。」袁爸爸講出對維園的兩種感受,他認為應該在維園建立一個烈士紀念碑,「六四又好,今次都死咗好多人,遲啲冇人記得佢哋,有個碑更加好。」Erica也說:「維園應該係咁,每個社會都有訴求,有遊行集會好正常,你睇六四集會,到反送中遊行有200萬行出嚟,差唔多過三分一人都出咗嚟,證明香港而家唔係一個安寧嘅社會,維園都係一個指標。今次傷亡人數太多,最嚴重,以前咁多次遊行都仍覺得香港仲係一個和平、安寧嘅地方,但最近連維園都射催淚彈,裏邊啲人完全冇防避,而家全香港都係催淚彈,催淚彈係唔會分解,只會到處分散。」



社運已持續了5個月,Erica感受很深:「本來好有希望....佢起碼喚醒咗幾代人,知道我哋喺乜嘢情況,一定要反抗,但代價實在太大,好多年輕人又要俾人拉,受傷甚至...(死亡)不過,香港人好犀利,周一到周五,朝早着西裝返工,周六周日就變身,好似Superman,咁樣冇得唞,日日都打仗,都冇辦法,我哋要守住自己價值,必須要咁。」



這星期逆權運動變得嚴峻,警方日前向守護中大的學生,一日射出近千枚催淚彈,令人心傷,袁爸爸訪問當日未發生「暴大事件」,他已很欣賞前線的抗爭者:「我覺得啲後生仔好偉大,好了不起,當日發生辛亥革命、六四,個個都話啲後生仔做得啱, 而家變咗,大陸媒體話佢哋唔啱,國際媒體同大陸媒體說法唔同,不過時間耐咗,會有好多新聞滲透入大陸,全世界都會支持,講老實話,(大陸)政權係唔講道理,所以唯一要靠美國唔畀佢使用武力,先有機會成功,如果冇美國力量,佢遲早都要鎮壓。」銀髮族的袁爸爸明白事理,體諒年青人,他說:「我同普通後生仔諗法一樣,唔係我明白佢哋,係其他啲人唔明白,我至覺得奇怪,點解咁簡單都唔明白。好多人為權力同金錢,蒙蔽咗良知,仲變咗直覺,覺得對佢哋權同利都有好處,就走咗去嗰方面。」袁爸爸到位的論點,連囡囡Erica都認同他是一位「衝衝爸」:「佢係由世界角度出發。」Erica認為這就是「Thinking fast and slow」的思維,「慢想」思量較仔細,「快思」直接想到目下前途和社會安寧,未會有長遠想法。



Erica與爸爸年齡雖相差31年,彼此間沒有代溝,政見也一致,她更讚父親是一本百科全書。對於有一些「衝衝子」不被父母諒解,甚至被父母經濟封鎖,袁爸爸嘆氣:「冇辦法,佢哋父母嘅想法,改唔到,惟有等佢哋呢一代過,下一代上嚟,好多人一世唔思考,實際呢班父母就係反動分子。」沒有生兒育女打算的Erica卻體諒年青人:「好難想而家後生一輩去抗爭,父母不但唔支持,仲要經濟封鎖佢哋,成個家觀念唔同晒,呢啲父母,唔好做人父母喇,父母口講想細路健康開心,實際要畀子女一個安全網,呢啲係小朋友最基本,要佢哋返屋企有飯食,有基本經濟支持。父母話生佢出嚟想佢快樂追尋夢想,冇晒喇,子女去追夢,父母就唔畀佢返屋企。」



兩父女都會理性分析討論,袁爸爸說:「冇得拗,道理就擺喺枱。」Erica也說:「真相同事實喺同一平面,拗乜啫!我哋唔係感性出發,我哋乜都用理智邏輯解釋,全部好科學、好數據。」袁爸爸尊重子女思想自由:「細路唔係父母財產,細路大咗會變朋友,你尊重我,我尊重你,你愛護我,我愛護你,大家開心咪夠。」Erica說:「你唔會控制或逼你嘅朋友 。」



袁爸爸指東方人價值觀與全世界脫節,「亞洲人冇傳統猶太思維同common law,好彩我哋受過殖民地統治,而大陸一直未見過自由,又未試過法治,佢哋嘅『法治』係邊個惡啲,即係你同個未飲過咖啡嘅人講,講一百次都係冇用。大陸冇普世價值,只有強權嗰套。」袁爸爸數出中國五四運動時很開明,但一行共產主義便大倒退。若然抗爭膠着,香港沒將來,袁爸爸會考慮移民:「再咁都住唔落去,實玩完。」Erica則說:「我會留守到最後一秒。」





撰文:比華利

攝影:沈健程

攝錄:廖達燊

髮型:Nelson@Hair

場地:Eat Darling Eat



攝影:沈健程 袁彌明有個「衝衝爸」。 袁彌明有個「衝衝爸」。
袁彌明大讚爸爸是一本百科全書。

袁彌明大讚爸爸是一本百科全書。
兩父女沒有代溝。

兩父女沒有代溝。
70歲的袁爸爸支持年青人爭取民主自由。

70歲的袁爸爸支持年青人爭取民主自由。
袁彌明不屑很多父母反持孩子抗爭追夢。

袁彌明不屑很多父母反持孩子抗爭追夢。
袁彌明為爸爸拍照 。

袁彌明為爸爸拍照 。
兩父女的政見一致。

兩父女的政見一致。
袁彌明6.16 曾一齊上街遊行。(資料圖片)

袁彌明6.16 曾一齊上街遊行。(資料圖片)

鍾意就快D Share啦!
Related Posts Plugin for WordPress, Blogger...