掃呢頁CODE去手機

2019年11月3日 星期日

我係一隻牛 李天翔 __,李天翔,

被網友封為「御用強姦犯」,李天翔說:「外間唔肯定你做得好,都唔會畀咁嘅稱號你,其實我開心嘅!」
被網友封為「御用強姦犯」,李天翔說:「外間唔肯定你做得好,都唔會畀咁嘅稱號你,其實我開心嘅!」演盡無數奸角,更有「御用強姦犯」封號的李天翔,今年5月離 ...


演盡無數奸角,更有「御用強姦犯」封號的李天翔,今年5月離開工作了24年的無綫,決心向外闖,相比起近來「被辭職」的例子,他走得自願又快樂。

李天翔說,「你唔好睇我個樣咁做咁多奸角」,實情是「其實我係一隻牛嚟㗎!你畀工作我,我咪去做,做完咪算囉,我唔會諗任何嘢!」更遑論要他埋堆送禮擦高層鞋了。

離開是為了回來?天曉得。他只知道5月之後有三個多月的日子,零工作日日在家等機會,到了8月中才有好消息,終於傾得成接拍電影,所以近月都在佛山開工。

現在最希望拍完這套電影之後,繼續有人搵他拍戲,「𠵱家對我嚟講,我唔係貪錢,但係我都要生活,我希望都有穩定收入,已經心滿意足!」

《解決師》是李天翔在無綫的暫別作,榮升男三更是他入行以來最多戲份的劇集,這個遲來的春天,遲到好過冇到。

撰文:文嘉龍

攝影:陳俊強



李天翔2010年在《誘情轉駁》演反派,以𠝹刀架舊愛陳法拉的頸。劇照 李天翔2010年在《誘情轉駁》演反派,以𠝹刀架舊愛陳法拉的頸。劇照
2007年拍《金石良緣》,劇中朱慧敏險被李天翔強姦。劇照

2007年拍《金石良緣》,劇中朱慧敏險被李天翔強姦。劇照
李天翔今年5月約滿無綫後坐了三個月冷板凳,其間只上過ViuTV《點相II破局》做嘉賓。

李天翔今年5月約滿無綫後坐了三個月冷板凳,其間只上過ViuTV《點相II破局》做嘉賓。

睇吓外面個世界係點

暫別作依然是做奸角,李天翔在《解決師》演黑幫家族第二把交椅,戲份是他入行以來最多,網民更讚他型過男一王浩信。43歲要到離開之前才得到一個最重戲份角色,總算好頭好尾。

「圓滿呀,所以我要好多謝家豪哥(監製劉家豪),其實我同佢都合作咗好多套,咁啱得咁蹺,其實冇人知㗎,連家豪哥佢哋都唔知道我拍完呢套會走,冇人知道我係last(最後一套),得我自己知。我決定拍完呢套無論點樣都好,我決定離開,所以可能真係個天畀我好好嘅結束囉!」

其實早在2016年,李天翔已經與無綫轉了合約形式改為兼職藝員約,「我口中嘅part time囉,即係有工作返去拍嘢就有收入,冇嘅就冇底薪嗰啲囉!」今年無綫找他再傾約,「都有加我人工,只不過我覺得年紀開始大,係咪應該出去睇吓外面個世界係點樣呢,我自己覺得又結咗婚,如果未結婚呢,可能我都會諗一諗(續約)。」

結婚後他反而義無反顧地想離開,博一鋪。「人大咗,開始會諗如果我今年仲唔走,我再過多幾年先出去,萬一出面娛樂圈唔接納我、唔接受我呢一個人嘅話,我去轉第二啲工作嘅時候,我又會企番去嗰啲老闆度諗,我請個廿零歲好過啦,點解要請個四十幾五十歲嘅人先,係咪?我好驚呢一樣嘢,所以我寧願今年真係決心離開,行出去外面試一試,唔知試幾耐,我未畀一個deadline自己,試一年、兩年?如果娛樂圈真係唔適合我李天翔呢個人,咁我咪要轉行囉!」

下定決心「裸辭」卻換來三個多月的徬徨無助期,完全零工作零收入,「慘㗎,啱啱一完咗約,真係冇人搵,我唔知出面啲人唔知我離開咗吖,定係點樣,我都停咗三個幾月㗎!好彩到8月中,我收到消息有人搵我拍電影,傾好晒所有嘢就OK咗,開始拍緊套電影啦(去佛山拍)!」

後悔離開?「行咗喇條路,係咪先,即係決定離開咗,後悔都冇(用)囉!驚,梗係驚啦,因為我又唔係一個好識去social嘅人,我唔係嗰種周圍『𢱑』,喂,我離開咗喇,可以搵我喇,我唔係咁嘅人,我又唔識做呢啲嘢,咁就坐咗喺屋企真係兩、三個月,只係得友台ViuTV請過我去一個節目度做嘉賓,跟住之後冇喇,乜都冇,真係開始驚!」



1995年加入《閃電傳真機》,當年的李天翔一臉稚氣。

1995年加入《閃電傳真機》,當年的李天翔一臉稚氣。

爆咗騷三、四萬一個月

零收入期間得靠積蓄過活,「TVB人工唔高但都好過冇吖嘛,以前full time形式嘅時候,每個月都有份底(薪)畀你,雖然唔高但起碼有,但係當你冇嘅時候,就真係冇啦嘛!好在之前有啲積蓄囉!」

李天翔1995年參加無綫藝訓班而入行,由兒童節目《閃電傳真機》做起,到加入戲劇組以做奸角彈起,多年來獲得不少網民畀like;但在無綫,不是「親生仔」的他,做得再好,連男配角提名入閘的機會,也輪不到他。他說自己性格似隻牛,一味得個做字,但總會做到心淡。

多年來都不受重視?「以前冇諗㗎,其實我係一隻牛,你畀工作我,我咪去做囉,做完咪算,唔會去諗之後有啲乜成績、有乜回報,但係自從,唔記得邊一年喇,有一年就係幾線嘅劇集都有我,我身邊開始好多聲音,身邊朋友就會講,話你今年咁多套劇,會唔會有提名呀,我就由嗰一年開始有留意,點知嗰一年都冇提名,跟住一年一年咁過,我每年都有劇出,每一套劇feedback都係好嘅,係喎,今年又有劇出,但係又冇提名嘅,過多幾年開始算數喇!你問我有冇心淡,梗係有啦,正如好似你讀書讀得好好,老師都會獎勵吓你!唔好話畀個獎你吖,但係乜都冇,心灰意冷係有嘅,但係過咗咁多年好似已成定局,算啦,唔諗啦,即係又做番隻牛囉,不停咁樣做、不停拍嘢,唔好諗個結果,個人咪會舒服啲囉!」

職場打工仔只求一句讚賞。「我由訓練班入行,其實我做過一年閒角,入咗兒童組跟住之後就做咗《K-100》主持,《K-100》之後就開始拍劇,一路拍到𠵱家,其實我係冇停過㗎喺TVB,20年都係咁樣,所以公司其實係對我好嘅,只不過對我好好之餘,我唔係話奢望獎項,而係一啲讚賞囉,但係冇,讚賞我嘅全部都係外間啲網民呀粉絲呀!」

當年第八期訓練班的同學,蓋世寶、湯盈盈、姚瑩瑩、滕麗名和盧慶輝等人,大多已離開無綫;他出身的兒童節目《閃電傳真機》、《至Net小人類》更早已壽終正寢。回想兒童節目的歲月,望見個個月爆騷的收入最開心。

「其實係有啲矛盾嘅,做嘢方面呢,唔開心嘅,但係講收入呢,係開心嘅!安排我入兒童節目嘅時候,我係入去頂替蔡子健個位,嗰時蔡子健哥哥要兼顧旅遊節目,所以監製覺得佢冇乜時間兼顧兒童組,要搵一個人去頂佢個位,就搵咗我入去。最慘嗰時蔡子健哥哥,佢係一個大哥哥角色,喺兒童節目度講一啲好學術性好資料性嘅item,咁我就大鑊喇,我讀書又唔多,跟住又要講啲科學嘢,嗰時我係唔想返工㗎,因為啲對白我要死背,我講完都唔知自己講乜;但係收入方面係好好,因為我哋計爆騷,基本上係做半年嘢,半年之後嗰啲就係爆騷錢,你諗吓有半年嘅爆騷錢喎,如果爆咗騷都成三、四萬一個月㗎,收入係好㗎!」



2017年10月10日,李天翔與拍拖6年的圈外女友BoBo簽紙結婚。

2017年10月10日,李天翔與拍拖6年的圈外女友BoBo簽紙結婚。

走咗出嚟好似打游擊

2017年李天翔與拍拖6年的圈外女友譚寶怡(BoBo)結婚,婚後兩人都有共識不生小朋友。男人有頭家會多了顧慮,但對李天翔來說反而更放膽向外闖。身為老闆級有自己的資訊科技公司的老婆,對李天翔所做的決定都無限量支持。

「工作上講到有心灰意冷就係覺得,如果一個人做得好,係咪應該要有啲稱讚呢,我冇同我太太講過呢啲嘢,但係佢有陣時好醒目,唔會講太多,但係講嘅時候就會話,咁冇辦法啦,觀眾buy你咪OK囉!因為我太太自己開公司,所以佢算係老闆,可能佢喺老闆嘅角度就會覺得,公司就係咁㗎啦,有咁多個員工,如果個個都做得好,我咪要日日走去讚佢一句呀,我邊有咁多時間呀,即係佢會用一個老闆嘅心態去解釋畀我聽,我咪會舒服啲囉,係喎,算囉!」

自己知自己事,李天翔如此性格,在娛樂圈難免蝕底。「其實我身邊唔係呢一行嘅人,我唔知佢哋講笑定認真,成日都會話,你唔好做啦,你做嚟做乜箒,你想唔想做主角吖,我都係咁答佢,冇諗過,所以有時我自己都諗,其實我咁嘅性格係唔應該做呢行㗎,其實係蝕底㗎!我入行咁多年,有時都睇到某程度上,唔係話你有實力就一定得,有陣時你懂交際嘅,可能比你有實力更加好囉!」



即場操肌有姿勢有實際。

即場操肌有姿勢有實際。

另一條後路也鋪定好,就是一早考了健身教練牌的李天翔,隨時準備做個全職教練。「其實我一直都有做開(教練),不過就冇話公開話畀人聽箒,健身係自己鍾意嘅一樣活動,我好耐之前已經考咗健身教練牌。適逢我離開咗TVB,睇吓會唔會另外殺出一條血路囉,你話係後路又好,一個生財工具又好囉,除咗演戲,起碼都有第二樣嘢先啦,萬一呢個娛樂圈唔接受我呢個人嘅時候,我都要食飯都要搵嘢做㗎嘛!」

李天翔說,現在行每一步都像打游擊戰,「尤其是𠵱家走咗出嚟,好似打游擊咁樣,即係今日唔知聽日事,𠵱家唯一希望就係呢個圈仲有人用我,我𠵱家拍緊套電影啦,希望完咗呢套電影再有人搵我拍嘢,希望唔好停囉,不斷有工作,冇諗其他嘢㗎喇,因為𠵱家對我嚟講,我唔係貪錢,但係我都要生活,我希望都有穩定嘅收入,已經心滿意足。」

小人物性格天生易滿足。「我係好易滿足,你唔好見我拍嗰啲劇成日做反派,其實我係一個好小朋友嘅人,我好簡單,其實我哋做演員好簡單㗎咋,呢個角色好嘅,譬如監製或者高層見到你,讚我一句,我已經好開心㗎喇!」

但係都冇?「監製有!」李天翔說。



網民念念不忘的「認字特警」。電視圖片

網民念念不忘的「認字特警」。電視圖片

【後記】問號超人

在酒店的訪問現場,有個小型健身區,開正李天翔嗰瓣,叫他即場操肌示範冇難度。

有難度考起他的,是說起在《閃電傳真機》的一個未完的故事,原來「認字特警」之外,還有這個……「有個叫『問號超人』呀,即係着住條底褲喺外面,跟住又要梳個有個圈嘅頭髮,大鑊喇,講啲科學嘢,唔係一句兩句,係一段兩段,睇住啲稿真係喺屋企喊,頂,我嗰時真係唔想返工,『問號超人』仲要拍住譚玉瑛姐姐,我NG咗三十幾四十次呀,啱啱入去仲要拍住個老前輩,壓力幾大呀,嗰時真係唔想返工,好慘㗎!」

真係牛都玩謝!

髮型:Ringo of Salon Nova

場地提供:富薈旺角酒店




鍾意就快D Share啦!