熱爆娛樂: 【狗仔出更】城城一家四口行沙灘過聖誕超萌囡囡黐婆婆多過Daddy _

2019年12月26日星期四

【狗仔出更】城城一家四口行沙灘過聖誕超萌囡囡黐婆婆多過Daddy __,城城,郭富城,

四大天王個個都生女，最近盛傳郭富城有意「追多個仔」，欲以名牌手袋加100萬現金利誘太太方媛再生，但城城否認，表示有兩個囡囡已經好sweet，自己不是舊思想的人。

城城絕非空口講白話，今日聖誕節，城城帶住老婆方媛(Moka)、兩個女、外母和工人一齊去赤柱行沙灘，晚上再去香港仔遊艇會歡度佳節。今日下午3時許，城城駕駛新款波子Jeep到赤柱正灘，由於是假期，車位早已泊滿，城城無奈亦要「跟大隊」違泊。未滿1歲的細女Charlotte未有落車，一直留在車上，由工人抱住o氹瞓覺。城城與家人去到附近一間餐廳，直上二樓的露天位置，揀選一個靚位睇風景，其間都有手指指四圍望。大約5分鐘後，城城表示想帶囡囡落沙灘玩，怎料一落樓已撞到相熟朋友，傾到雞啄唔斷，而老婆Moka和外母就陪住2歲大女Chantelle落沙灘，但見Chantelle似乎不太好動，只是站着望海，沒有和其他小朋友般落手玩沙。見Moka都好擔心囡囡吹風，見她流鼻涕，立即用紙巾抹乾淨，又幫囡囡戴上帽子，並好有耐性和囡囡傾偈及用手機玩自拍。Chantelle眼仔睩睩超精靈，一隻手拖實媽媽，另一隻手拖實婆婆，場面溫馨。

其間有後生仔不太認識郭富城，細細聲說：「咁熟口熟面？」身邊友人即畀反應：「郭富城都唔認得？」當然亦有不少人認得城城邀請合照，城城亦有跟一、兩位朋友合照，表現親民。約下午4時15分，外母突然收到電話指有交通警趕車，城城一家即匆匆離開，見他想抱起大女，但大女不願，走去婆婆身邊扭抱，見城城全程以普通話跟囡囡交談。之後，城城載住屋企人轉場去香港仔遊艇會，估計是食晚飯，歡度聖誕佳節。

攝影：徐錦池、吳耀輝

城城放低天王身份，與家人一齊去沙灘歡度聖誕節。	 未滿1歲的細女留在車內睡覺。	 三代同堂，一落車就影張大合照，大女Chantelle超萌。
 一家三口從二樓遠望風景。	 Chantelle開手指指。	 城城撞到朋友，傾到雞啄唔斷。
 Chantelle一邊拖住媽媽，一邊拖住婆婆一齊行沙灘。	 Chantelle不算好動，只是站着望海。	 Moka怕囡囡冷親，為她抹鼻涕兼戴上帽子。
 城城與囡囡的對話主要都是國語。	 城城欲抱囡囡，但被拒。