掃呢頁CODE去手機

2019年12月24日 星期二

【為養家棄讀演藝】張文采公屋妹搖身一變TVB首席主播 離巢後即被片商睇中 __,TVB,張文采,

離開TVB,張文采轉行做醫療界公關,跳到另一範疇。但話晒新聞系畢業,主播又是她畢業後第一份工,一做十年,人退了,心仍在新聞從業員模式。「例如當日報導區 ...






離開TVB,張文采轉行做醫療界公關,跳到另一範疇。但話晒新聞系畢業,主播又是她畢業後第一份工,一做十年,人退了,心仍在新聞從業員模式。

「例如當日報導區議會選舉,我會諗到下年又要做立法會選舉,然後先至記得自己其實已經離職。例如台灣大選、美國總統選舉、立法會選舉,又有奧運,點知全部嘢已經唔係好關我事,嗰種感覺而家仲未好習慣,仲未可以放低。」

未放得低,還包括以前一件又一件突發「戰況」,張文采都不禁要唞啖大氣:「有一次印象好深刻,早上做《香港早晨》,慣常會有兩位主播,其實平時會有字幕機,我哋會照住嚟講,但點知當日嘅字幕機喺直播前五秒壞咗。因為平時會用腳踩制控制,但踩極都無反應,先至發覺原來壞咗。其實枱下面係一部電腦,可以睇番晒所有稿,我哋唔想一開始原本好輕鬆講早晨,然後就垂低頭讀稿,覺得咁樣唔好睇,於是兩個人好有共識,即時垂低頭背好份稿。當時係對話形式,我講完然後輪到佢講,我哋即時各自背好自己嘅稿,好自然咁交談,觀眾係完全睇唔出。」

成為港人熟悉的主播之前,將軍澳寶林邨長大的張文采,跟好多年青人一樣,考不入大學,無目標、無理想,唔知自己想做乜,兼職當售貨員,曾經以為一世做sales,幸而母親「指點迷津」,提議她報讀珠海學院,多一張文憑,女兒前途多一個保障。母親勸導啱聽,全因由細到大都鍾意電視撈飯的張文采,覺得新聞跟演藝同樣不是刻板工作,於是認定這條路。

畢業後寄信幾間電視台,只得亞視有回音,張文采:「其實第一次試鏡係喺亞視,當時完全無上鏡經驗,入到廠坐低之後無人理你,唔會同你講要做啲咩嘢,會俾份稿你睇,但唔會教你點樣做,同時我哋要自己踩制控制字幕,當時咩嘢都無教我,但我坐低之後又識得自己戴咪、踩字幕。如果你問我係咪天生食呢行飯?可能真係啦,原來自己喺呢方面都有啲天份。」

在亞視新聞部工作了9個月,TVB挖角。從此張文采踏上青雲路,是無綫新聞部少數升職神速的主播。

「我覺得自己算係平步青雲,因為工作四年就已經升為senior,當時自己都好愕然,因為我唔係嗰種希望升職,要去到咩嘢位置嘅人,只求順其自然,因為我覺得上天已經安排好一切,唔應該強求,我係屬於呢一種人。但當得到一個機會到嘅時候,就會努力把握,所以升職之後我要做得更好,話俾其他人知,坐上senior呢個位,就要做番senior嘅工作表現。再相隔三年,就升上首席主播,有更大嘅壓力,因為對下有十幾位同事需要管理,同埋老闆對你嘅要求會更高。」儘管歷歷在目,但已成為過去。

離開主播生涯,她最意想不到,是有導演向張文采敲門,邀拍電影。唔講唔知,中學畢業時這位「電視精」曾考慮報讀演藝學院,向演員進發。但在家人極力反對,出埋經濟封鎖下,唯有屈服。

這個幕前機會,竟在十多年後剎到!但估不到,她竟然一口拒絕:「已經有人搵我拍電影,不過我都推咗,因為呢樣唔係我依家想做嘅工作,再加上我結咗婚,希望有穩定嘅生活,老公又係一個好低調嘅人,所以都想更專注自己嘅家庭生活。早十年嘅話我可能會接受,而家就真係唔會喇。往後做嘅醫療公關工作,其實可能都會接一啲司儀或者主持工作。」夢想與timing不符,夢想就會成為過去。

中學時她參加過歌唱比賽,仲要係寶林女高音嚟㗎!問她可否即場唱兩句,張文采的反應:「唔好獻醜喇,因為本身其實好鍾意唱歌,但有時候覺得鍾意唱歌唔代表唱歌好聽。」失望。

採訪:Sukey

撰寫:Ethan

攝錄:LL Production house

場地:Amelia@Harbour City

-----------------------------

【壹週刊直播平台 ChannelNEXT】

立即睇

全城抗暴 區區論壇同你深度剖析

-----------------------------

【升級壹會員登記站 為你解疑難!】

親臨旺角、銅鑼灣做升級壹會員,即送「香港人:抗爭之夏」限量明信片

詳情地址


鍾意就快D Share啦!