【頭條獨家】獲外父老婆力撐 陳志健唔怕冇咗大台遮蔭
市道唔好，唔少TVB藝人，好似鄭敬基、東張小花林泳淘、林子博等約滿都被無線裁走來減磅，今年5月約滿TVB的2006年香港先生亞軍陳志健（Otto）雖然受重用有得留低，但他卻偏偏要求轉簽部頭合約，未來主力向外發展。現年38歲的Otto坦言就算現階段個市「兵荒馬亂」，但喺外父羅樂林及老婆羅苡之的力撐下，即使少咗大台遮蔭，仍然有安全感，無後顧之憂。 採訪：方騫平 場地：24/7fitness@觀塘駿業街
陳志健喺無線13年，在《仁心解碼》、《拳王》等劇集都有好表現，直至去年播出的《是咁的，法官閣下》中，飾演殺掉雙親陰沉罪犯阿鬼，演技層次豐富，更獲網民大讚。剛播完的《解決師》他扮演殺手S，後來被王浩信用軍刀插盲隻眼，激動得咬牙切齒，也相當好戲：「其實演出時加埋手勢係林文龍教路，老婆都驚到唔敢睇。不過，唔少網民鬧爆呢個奸角，但我反而覺得好有趣，哈！喺呢個劇有機會毒殺真正嘅外父喎？拍攝時劇組都取笑我：『你死呀你，咁大膽！』外父好好，拍前叮囑我要大大力咁撞埋去，唔使就住佢嚟拍，但我咁大隻，又怕無情力，梗係有顧忌。」
除此之外，拍呢套劇又試過因為出拳有偏差，打到王浩信流鼻血，鼻樑又紅又腫，令他驚到震：「當時所有人都好驚，但浩信明白大家都拍到好攰，冇怪過我失手，反而補拍時我壓力更大，外父同浩信咁專業，都係我欣賞嘅藝人之一。」
Otto選擇現階段外闖，可感生不逢時？他卻堅持不後悔：「同TVB簽part time約自由度高啲，𠵱家係時候去睇吓個世界，想試多啲嘢，發掘大隻佬拍打戲以外嘅另一面，而且爸爸有病，係時候多啲陪吓屋企人。就算做正職，人工都唔叫得係好，慶幸我仲可以做健身教練搵到生活費。(叫黃宗澤上多啲堂幫補你生活費囉？)佢經已好勤力，喺香港時一周會操足三日㗎。」
來源 source: http://hd.stheadline.com
|
鍾意就快D Share啦！
|
|
|
