網頁

掃呢頁CODE去手機
請LIKE FACEBOOK“新專頁”THANKS!
鍾意我? D 熱爆文章嗎?
即刻“讚”接收更多熱爆?!
唔要再顯示

2020年1月16日 星期四

娛刺撈飯:條脷識轉彎 好勝心穎教精正印防小三 __,小三,黃心穎,

心穎夠好勝!避得一時,避唔到一世,偷食人夫許志安嘅黃心穎,潛水8個月,始終都要𤓓住返嚟見鄉親父老,死狗咁樣爆喊認錯,驚驚青青話未諗過係咪復出。唔係未諗 ...




心穎夠好勝!


避得一時,避唔到一世,偷食人夫許志安嘅黃心穎,潛水8個月,始終都要𤓓住返嚟見鄉親父老,死狗咁樣爆喊認錯,驚驚青青話未諗過係咪復出。唔係未諗過,係驚到唔敢諗啫!咪以為匿咗咁耐大家乜氣都消,大批網民好似掉TG咁狂鬧狂炳,叫佢原機返美國、搵個有錢佬照顧,總之唔想再見到佢!


露肉「開光」𢱑復出


行到呢步,只可以照單全收,硬食冇得嬲。衰足8個月、有出冇入冇工開,一返嚟仲唔用碌柚葉沖涼兼當水飲咩?洗乾洗淨,以為佢真係三省吾身?所謂本性難移,即刻出Post整張換條短褲仔、打出個大髀,同棵聖誕樹玩「開光」儀式嘅相,博吸Like想回歸。頻頻出Post 刷存在感,仲夠膽死自揭表面喺美國懺悔,其實吃喝玩樂好Happy,晒張叉晒腰谷岩石胸、騷腹肌笑到見牙唔見眼嘅旅行相,仲話人生苦短,就算人哋攞佢嚟講、食晒花生都唔介意!好一個「好勝心穎」,想翻身可以做咩?其實佢喺演藝界、社福界甚至飲食界,一樣大有作為!


成為近廿年香港娛樂圈形象最負面嘅女星,要演玉女、女強人、專業人士,全部咪使旨意,倒不如去到盡做勾人夫、劈腿嘅壞女人角色。真情演繹,入型入格,觀眾邊鬧睇得過癮,大快人心!好似幾十年前李香琴飾演嘅奸角西宮奸到盡,經典到今日一樣有人講,黃心穎要衰過西宮,易過借火,視后都有得攞!


可以騎住筍盤馬國明體貼溫柔,同時人格分裂地為半百嘅安仔提供身心刺激,證明黃心穎維繫男女關係有一手。以佢條脷識轉彎,對人性同誘惑有咁深刻嘅了解,倒不如做兩性心理輔導專家,幫啲感情一潭死水嘅夫婦回春、重拾激情,搵番初戀;指導正印如何自救防小三、又或者輔導番小三、小四如何走出被捉姦在床後嘅陰霾,提供語言藝術、Body language,甚至兩性親密行為一站式輔導協助,拯救萬千感情瀕臨邊緣嘅男女!


望聞問切專下火


做飲食界又有咩作為?睇佢對安仔施盡渾身解數,就知佢骨格精奇,精力旺盛。話晒家業係中醫,望聞問切點都識啲啩?佢下火咁叻,開舖炮製自家涼茶湯水,幫啲男士出吓肝火、補吓腎水,女士可以美容養顏,大人細路都啱!有網民叫黃心穎不如去街市賣菜,查實佢去賣菜,都一樣有得做!雖然師奶未必幫襯,但平時水都懶得煲嘅C6(死佬),一知佢開檔,仲唔日日陪個老婆去買餸,順便𥄫嘢咩?可能自告奮勇買埋餸、煮埋飯添!斷估唔會買棵葱就婚變啩?


將來冇人知,雖然好勝心穎做緊人民公敵,行到邊畀人鬧到邊,但係近年社會咁多怨氣,畀大家發洩吓做出氣袋,都叫做幫手化解吓社會戾氣,功德無量呀!

來源 source: http://hk.on.cc
鍾意就快D Share啦!