現年52歲嘅魏駿傑2008年迎娶細19歲重慶嫩妻張利華，兩人婚後育有現年9歲女兒Jessica。不過噚日有報道指張利華同一老外新歡搭的士到灣仔食日本料理撐枱腳，之後更雙雙去到老外新歡寓所，兩人情到濃時又拖手又掃背又攬，逗留至凌晨才返歸。據報道，張利華背夫偷食嘅老外新歡Banker，住喺灣仔市值2,000多萬嘅豪宅。
分房5年
張利華噚日接受本報電話訪問時，佢先話：「唔好意思，冇嘢回應，一早處理緊。」被追問「處理緊」所指為何事？佢回覆話：「遲啲會知。」講到佢被指背夫偷食，佢話：「是但，我唔係靠呢個圈食飯，多謝關心，大家為小朋友好，希望畀多啲空間我哋，放過我哋。」佢又透露5年前已同魏駿傑分房瞓，因為唔想女兒有破碎家庭，兩人早有共識，和平解決婚姻問題，兩人分開嘅原因係性格不合，緣份已盡。佢又好感激魏駿傑對自己嘅照顧，讚佢係一個好人，兩人再見亦是朋友。張利華亦承認已搬離西貢屋企，女兒同爸爸生活，自己有空會多探女兒。
屢傳婚變
魏駿傑同張利華屢次傳出婚變，2015年曾影到張利華兩次約會前港隊單車手鄧宏業，摸黑撐枱腳同攬腰散步，兩公婆婚姻問題早露端倪。魏駿傑不時身兼母職湊女，由買書包、校服準備開學用品到拖囡囡行超巿買餸，都由男方一腳踢，反而老婆張利華則不見蹤影。上星期五魏駿傑喺FB留言：「從此與你相依為命。」又將頭像換成黑色，似有所指。兩日前魏駿傑又喺社交網晒愛女成績表：「So proud of you.」看來已接納婚變事實，決意斬纜。
撰文：馮仁昭
|
鍾意就快D Share啦！
|
|
|