無綫處境劇《愛‧回家之開心速遞》中，由盧偉文飾演嘅曹總兒子念華，戲份唔多，但好搶鏡。剛有多啲人留意，不過去年尾佢已離開大台，返回美國居住，並已簽美國經理人，殺入荷里活發展，坦言：「TVB份糧喺香港生活唔到，交租之後就無錢食飯。其實我覺得自己一世都會繼續做演員，只係睇吓喺邊度發展，同埋可以有幾大成就!」
在大台7年，拍超過150套劇嘅盧偉文，於《公公出宮》飾演徐大富手下龍虎豹之一嘅阿虎，演技搞笑浮誇得嚟又幾突出。最近在《愛‧回家之開心速遞》客串做曹總個仔，角色一樣搶鏡。可惜，呢部已經係佢喺無綫嘅「遺作」，因為傾續約時，公司一蚊都唔肯加，佢冇癮走人。「嗰一刻感覺其實好沉重，好似整個世界塌落嚟一樣。我曾經嘗試爭取，問過原因，睇吓有冇機會可以保持薪酬水平，但對方只係講咗一樣嘢，話我今年工作量比較少，達唔到公司要求，依家唔需要償還，但可唔可以保持呢個show rate？我覺得真係生活唔到，交租之後就無錢食飯，咁點樣可以生活。」 盧偉文本身於美國Houston Baptist University修讀vocal percussion，現難得獲美國經理人睇中。
「依家返美國發展演藝事業，希望演到一啲比較重要嘅角色。而且公司因應財政決定，令我哋比較難喺香港生活，喺美國嘅屋企人亦擔心我喺香港嘅狀況。」
喺大台日子，佢最難忘做視帝黎耀祥替身，仲得祥仔讚賞。
「呢七年，我覺得自己有三位伯樂，第一位就係黎耀祥，佢喺我未入行之前，做臨時演員嘅時候已經讚過我，我亦有一星期時間成為佢嘅替身，因為當時佢正拍攝《巾幗梟雄3》，要自己同自己對戲，我就好離奇地，當時有位PA將劇本交俾我，然後叫我嘗試背熟呢場戲，同祥仔對戲，唔使等FM幫手。當時有十頁紙，我好努力去背，結果又成功背到。到我入行後，黎耀祥同我傾偈時，都會畀好多提點我，教我點樣做一位更好嘅演員。第二位要多謝嘅人，係拍《公公出宮》遇上嘅李成昌先生，昌哥付出好多心思，叫我度一啲有趣嘅橋段，然後我哋三個人就不斷思考，之後佢就走去同導演商討。打後每場戲我哋都會咁樣度橋，最後出嚟嘅效果就吸引好多人注意。我聽過網民或者朋友對《公公出宮》嘅心聲，就係話我哋每次都好搞鬼、好惹笑，我感覺自己做到少少成績。」 除咗演戲，盧偉文精通多國語言，兼且唱得兩嘴。
「訓練班面試時，最初我以西班牙文發言，然後用英文，期間旦哥突然阻止我，問我讀邊一科？我話本身讀音樂嘅，然後佢叫我唱兩首歌聽吓。我問應該唱咩？佢話隨便我揀，然後我就唱咗一首德文歌畀佢哋聽，唱完之後佢哋都覺得唔錯。我以為佢哋會話我有咁多專長，又做過好多動作演出，又識跆拳道、吹笛、彈結他、唱歌，我以為會被收錄，但最後好可惜，我諗好多百般武藝於一身嘅藝人，都未曾喺自己嘅演藝生涯中發揮過，所以我覺得呢方面有少少可惜!」
機會永遠留畀有準備嘅人，希望盧偉文去到美國唔好放棄夢想，有一日可以耀武揚威返嚟香港 -----------------------------
【壹週刊直播平台 ChannelNEXT】
全城抗暴 區區論壇同你深度剖析
立即睇
-----------------------------
【升級壹會員登記站 為你解疑難！】
親臨旺角做升級壹會員，即送「香港人：抗爭之夏」限量明信片
詳情地址
來源 source: http://nextplus.nextmedia.com
|
鍾意就快D Share啦！
|
|
|
