掃呢頁CODE去手機

2020年3月15日 星期日

【選港姐落敗獲導演恭喜】《二月廿九》吳海昕屢敗屢戰:一百個當中 遇上一個欣賞我已足夠 #吳海昕 #港姐

剛剛播完的ViuTV熱爆劇《二月廿九》,女主角吳海昕憑此作吐氣揚眉,30歲被網民封為女神。其實吳海昕已入行六年,令人印象深刻,是14年參選港姐時,被網 ...






剛剛播完的ViuTV熱爆劇《二月廿九》,女主角吳海昕憑此作吐氣揚眉,30歲被網民封為女神。

其實吳海昕已入行六年,令人印象深刻,是14年參選港姐時,被網民封做「民選港姐」,三甲大熱,當選的話,順理成章必是力捧姐仔,銀色旅途贏在起跑線。

不過世事往往出乎意料,最後由維他奶後人邵珮詩爆冷勝出,民意在電視台冇作用,吳海欣大熱倒灶,三甲不入,得一個不能安慰的安慰獎《旅遊大使》,在任期不受重用。

「我都曾經幻想,如果當選,發展可能會好唔同,但事實就係落選,所以就要搵第二條出路。人生無得後悔,我係一個會向前看嘅人,順住命運前行,作出決定。」吳海昕說。

「民選港姐」四個字,她覺得太沉重。

「其實我唔係咁鍾意人哋咁樣稱呼我,因為做咗咁多年演員,但仍然被介紹係『民選港姐』,我好想大家用演員介紹我。

當時背上呢個稱號壓力好大,因為當大家都覺得你可以攞到冠軍嘅時候,就會有一種恐懼感,擔心落選的話會點面對!如果令大家失望又會點呢?我係一個會俾自己好大壓力嘅人,而家回想番,覺得自己選港姐時好缺乏自信。」立志當演員,本想借港姐做跳板,大熱倒灶不時最傷,由大熱變冷板,才是未夠自信的吳海昕重創。為免坐以待斃,御任後她即離開大台,飛去紐約進修演藝,為增值,也為逃避。

「完成比賽後,都離開咗香港一段時間,去沉澱自己。去紐約除咗讀書外,都想離開一下原本居住嘅環境,因為覺得第一次面對幾百萬觀眾,赤裸裸咁企喺台上,原來最缺乏嘅就係勇氣,之後點樣企番起身,都經歷咗好多年扎掙同矛盾。」

落選當晚,網民失望,自己失落,但有一個人,在facebook恭喜她,寫道:「落選了,可幸還可以把人保住,免於墮落….她是一個有潛質的演員。」此人,是導演兼影評人舒琪。

吳海昕至今感激他的「祝賀」。「呢啲大人物點解要花咁多時間寫一篇文(在專欄寫一篇關於落選的吳海昕),或者特登搵你試鏡,同你講呢番說話,其實就係俾你少少嘅鼓勵,我就係為咗呢個少少嘅鼓勵而努力,直至現在。因為佢呢幾句鼓勵,喺唔容易堅持嘅過程,我繼續行落去。」

選港姐前,她是一名空姐。但目標清晰,要做演員,趁不用飛的日子,她常為大學生的電影功課客串演出,磨練演技,導演舒琪就在此時已留意到,這位藉藉冇名的女孩,相當耀眼。

吳海昕說,她不時身在機場,心在片場。「當時做空姐,派餐時已經好無心機,每次派餐嘅時候都會諗,如果每日返工唔係去機場,而係去片場就好喇!有一次我幫佢哋拍攝,喺法蘭克福返香港落機,飛完十幾個鐘,就拖埋行李喼趕去片場埋位,連工作人員見到都話:『嘩,你使唔使咁呀!』,但做自己真正喜歡嘅事係唔會覺得辛苦,就算之前三十幾個鐘無瞓覺。」

她熱愛演戲的程度,揀去紐約讀書,是受電影《秋天的童話》影響。

「我真係好鍾意《秋天的童話》,當時我就係同鍾楚紅、發哥一樣,抱住少許落泊嘅心情,去到當地尋覓新方向。」

在紐約識唔到船頭尺,花光積蓄求學,一年後決定重返娛圈,由零開始。去美國進修完的民選港姐, 可一帆風順?

「返香港之後,我參加過好多次試鏡,頭一兩年基本上九成試鏡都係落選,仲要只係特約演員角色,唔係主角。次次都落空,會質疑點解對方唔揀我,後來發覺唔應該太執着成功與失敗,因為有時候只係你唔適合角色,而唔係你表現唔好。」

不放棄,因她相信一百個人當中,總會遇到一位欣賞自己。除了舒琪,仲有這一位……

「有一次參加麥兆輝導演嘅試鏡,佢突然問:『知唔知點解搵你試鏡?』,原來佢睇咗我演出嘅劇集《賤民》,無全部睇晒,只係睇咗少少,啱啱開電視見到,覺得我OK。我當初仲以為套劇無人會睇,不過佢話只係咁啱睇到,所以我覺得呢啲就係運氣,呢種運氣你未必掌握,但可能相隔一兩年,甚至一個不經意嘅時刻,就會出嚟俾驚喜你,所以我唔會放棄每一個機會。」

《二月廿九》裡她穿越,想改寫命運。如果現實真的可讓她重新選擇,會一樣選港姐入行嗎?

「如果俾我穿越時空,我諗都會行番同一條路,因為要有呢個過程嘅自己,先會成就而家嘅我。」

採訪:Sukey

攝錄:吳斯金

場地:神經餵飼

化妝:Fiona TO

髮型:ZapTang@Essensuals.hk

服裝:agnes b.



----------------------------

【壹週刊 武漢肺炎專頁】

緊貼防疫資訊!口罩訂購情況、確診個案、病徵潛伏期、封關國家名單、保險點賠?

與你遠離瘟疫 睇清官謊!

立即睇

-----------------------------

【壹週刊直播平台 ChannelNEXT】

專家教你自保攻略|口罩點揀|防疫點做

立即睇

-----------------------------

疫情追蹤,最新消息,Follow 壹週刊Telegram:

點擊追蹤


鍾意就快D Share啦!