掃呢頁CODE去手機

2020年3月9日 星期一

馬國明:【《On Call 36小時》重播】魚頭戀喊爆師奶 #馬國明

今晚準時開電視睇《OnCall36小時》重播喇!「情人們一呼一吸相愛到底~結局或同樣~~」2012年無綫劇《OnCall36小時》上星期啱啱開始重播, ...




今晚準時開電視睇《On Call 36小時》重播喇!


「情人們一呼一吸相愛到底~結局或同樣~~」2012年無綫劇《On Call 36小時》上星期啱啱開始重播,大家嘅回憶又番嚟喇!無錯,就係呢套集合「馬國明吐氣揚眉作」、「楊怡羅仲謙定情作」、「經典主題曲」嘅高收視高口碑劇集,當年大結局平均收視37點,成為無綫2012年全年最高收視嘅大結局,都真係幾威威㗎,當年個個睇到喊晒口嗌感動,到底佢有咩必睇位咁把炮先?


帶挈馬國明做「雙料視帝」
要數圈中白袍醫生Look,馬國明未必係最組典,不過佢喺劇中飾演神經外科醫生張一健(一件頭),佢同「魚仔」(楊怡飾)譜「魚頭戀」最Touching,暖男上身嘅佢向楊怡求婚嗰幕直頭喊到班師奶變豬頭,更憑此劇於《萬千星輝頒獎典禮2012》奪「我最喜愛的電視男角色」,又係「馬來西亞視帝」又獲演藝人協會頒嘅「電視傑出表現男演員」,成為「雙料視帝」,民心自此穩如泰山!


楊怡羅仲謙拍劇定情
劇中羅仲謙飾演嘅「楊沛聰」暗戀「魚仔」楊怡,戲內楊怡未有被打動,點知戲外二人就打得火熱!當年羅仲謙以買消夜為名,借意陪楊怡開工,更加有一次拍完《On》後二人到海邊傾偈。楊怡戲言只要佢肯游出浮台就做佢女友,羅仲謙一個轉身跳海追女,寒冬中游出浮台向楊怡示愛,得咗。姐弟戀依家修成正果,二人於2016年結婚,上個月仲宣布造人成功添。


童星變劍擊港隊奧運選手
《On》第一集除咗個「無血手術」夠Noice之外,「一件頭」喺路上向對一名被汽車撞倒嘅小學生進行急救,原來當年嘅童星吳諾弘,依家已經係香港男子劍擊運動員,喺名校拔萃男書院讀到中五就毅然休學,廿歲仔嘅佢仲與劍擊隊隊友爭取男子花劍4項奧運資格,巧叻叻唷!


一個容祖兒貫穿兩集
套劇嘅主題曲係由容祖兒主唱嘅《連續劇》,前奏一起大家就已經想跟住唱,當時網民更表示非常意外,因為當時嘅無綫劇已好耐冇搵正式歌手主唱主題曲。而翌年《On Call 36 小時II》同樣搵嚟Joey唱主題曲《續集》,嚟個首尾呼應。


《On Call II》女神雲集 韓團成員都有份
《On》咁好口碑自然就有添食續集,第二集除咗有齊岑麗香、朱千雪、王君馨等女神,加埋有闊別無綫七年回巢嘅「程至美醫生」吳啟華加入,仲同朱千雪發展「忘年戀」,不過最爆嘅係,劇中做吳啟華囡囡嘅莊錠欣(Elkie)一拍完劇,就轉眼升呢做咗韓國女團CLC成員!



來源 source: http://hk.on.cc
鍾意就快D Share啦!