2020年4月29日星期三

為受疫情影響的基層兒童籌款徐子淇召喚圈中老友講故事 #徐子淇

為受疫情影響的基層兒童籌款徐子淇召喚圈中老友講故事

徐子淇召喚一眾圈中好友齊講故事為受疫情影響的香港基層兒童籌款。

恒基新抱徐子淇今日在ig出咗兩段片，一段係以香港救助兒童會贊助人身份宣佈一個籌款活動「Save with Stories」，透過活動可以幫助到受新冠肺炎影響嘅弱勢兒童，佢表示香港有100萬名兒童，當中有四份一生活喺貧困之中，未必得到最好嘅教育資源，而受疫情影響，亦好需要幫忙，所以Cathy就請咗一班圈中朋友講故事畀大家聽，等留家覺得悶嘅小朋友可以聽佢哋講故仔，同時亦希望善心人士可以捐款幫助香港基層兒童作為教學支援。

貼文Tag咗好多圈中人，包括甄子丹夫婦、古巨基、黎姿、鄭秀文、林嘉欣、容祖兒及方力申等，但暫時只有前四者有拍片講故仔，當中以兩位爸爸講得最好聽，宇宙最強的子丹講得生動之餘仲有英文字幕同聲效，而新任爸爸亦都講到變晒聲，表情仲好豐富，而黎姿同鄭秀文就講故仔講得好舒服，而發起活動的徐子淇喺另一段片更叫埋8歲長子李俊熹（Triston）一齊講故仔。眾人精精神神呼籲為香港弱勢兒童出分力及助他們渡過難關，並希望大家聽完故仔可以嘅話就去捐款。