武漢肺炎肆虐，影響全球經濟，各行各業都炒人，昨日在商台工作20年的DJ細So（蘇耀宗）收大信封被解僱，連他昨晚最後一集原本在家中主持的節目《生活日常》也被腰斬，無緣在大氣電波跟聽眾講bye bye，有指被炒死因有兩大原因，一是因為防疫期間提及work from home的工作意見而頂撞上司出事，二是因為減薪問題，據聞他疑似得罪了商台行政總裁陳靜嫻（Rita Chan）。
細So慘食無情雞，不少商台同事都人間有情，森美更主動聯絡求情，曾在商台主持節目的杜汶澤昨日在facebook已出帖文撐他，留言：「支持你，細So！出面大把世界！」阿澤似乎意猶未盡，今日凌晨一點，再爆seed，爆粗鬧陳靜嫻：「條氣唔順，Ｘ多句至瞓！Rita你自己on X得咖！經濟唔好炒人，有乜理由連人哋最後一日節目都唔畀做呀？你幾多歲至學識講大話呀？唔畀人返去開咪你唔係驚人哋爆X你呀嘛？人哋真係要咁做，唔識自己出post咩？」阿澤更直指陳靜嫻不尊重聽眾，他再加多句：「我就放長雙眼睇吓你呢鑊過唔X過到骨！」阿澤言論相當火爆，帖文不夠10分鐘已有1千7百人給like，不過有細心網民發現一段時間後帖文疑已被刪除，《蘋果》就今日向阿澤了解，他表示：「自從知道細So件事之後，個心好唔舒服，除咗因為大家以前係同事，更加心痛嘅係，點解電台可以對聽眾咁不負責任。嬲到瞓唔着，所以出咗個post。你知我份人嬲完就算，所以臨瞓刪咗個post，怕人哋誤會細So周圍講電台壞話。我始終都係外人，呢啲勞資糾紛，都係等佢哋自己處理。」
此外，商台DJ阿檸亦在facebook寫千字文，分享他與細So的點滴，細So在他心中是一個好有智慧的人：「佢嘅生活方式，佢建立出嚟嘅生活日常嘅態度，我覺得一個DJ就係咁㗎啦。有生活，先可以感染大家嘅生活。細so係一個生活家。」阿檸更指細So作為前輩，他會搵對方討教，細So教他做music show，他入行想拍片冇錢買電腦，細So借錢給他，帶他去做舞台劇，而細So在他屋企有事、失戀、停職時亦精神上支持自己。阿檸指細So認為正確的事會據理力爭：「我見過佢做員工，佢認為正確嘅事，佢據理力爭，就算唔係為自己，係為同事，佢永冇手軟。我見過佢做老竇，喺公司鬥一大餐，幫個仔整套halloween服裝，豪華到喊。我見過佢做人，喺饑饉三十入面流過嘅眼淚。細so係我嘅一個role model，學做男人，承擔責任嘅一個老師。」
-----------------------------
【武漢肺炎】專頁
全民自救 抗疫資訊盡在《蘋果》
來源 source: http://hk.entertainment.appledaily.com
|
鍾意就快D Share啦！
|
|
|
