2015年1月22日 星期四

[壹週刊 - 1298] 前面真係好塞車 莊思敏 莊思敏,M1,




豪語錄

前面真係好塞車 莊思敏

坐在影樓等候莊思敏到場,我開始諗:她會否塞車呢?莊思敏剛落機便趕來,專業精神無以復加了。我在此處枯等過很多藝人,藝人例遲,有時寧願他們發個短訊賴塞車,我的心總舒服啲,人與人需潤滑劑,哪管是白色謊言。

只要莊思敏別連埋自拍照片發來便好。

月前,莊思敏於 IG寫:「黃埔好塞車喎。」網民卻發現她相中的太陽眼鏡倒影——路面情況暢順,傳為笑談。件事吊詭在,莊思敏唔覺係問題,她的朋友唔覺係問題,覺得係問題的是網民。莊思敏這天說:「關佢哋咩事?」

「關你咩事」是港人口頭禪,但港人同時捍衞言論自由。於是,莊思敏繼續有講隆胸、買皮草、埋怨佔中的惹火自由,大家繼續有鬧爆莊思敏的自由,莊思敏又繼續有自由反駁大眾鬧爆莊思敏的自由……招來招往,自由得過自由搏擊?

她這天早到了十五分鐘。叮叮,回合開始——

朋友•圈

壹:為什麼發那條 IG給朋友?

莊:沒有特定發給某位朋友,自己揸車經過黃埔,黃埔掘緊地鐵,轉極轉不到左,塞的時候沒分享,塞完才寫。如果我約了人遲到,我咁寫是有目的的,但我純粹有感而發。怪只怪香港人太相信即時,在 FB寫「餐飯真好吃」,你不可能 challenge對方那段並非食飯時間嘛。

壹:也應怪自己太愛網上發表?

莊:唔講嘢好辛苦。人人收收埋埋,全球網絡經濟點發展得咁快?

壹:即是回應寸你的,並非你朋友?

莊:當然不是。

壹:問題係,那是 IG的「朋友圈」圖片,流得出去,代表至少有一個朋友洩露吧?

莊:每次發生這種事,我即時都生氣,我不是冇情緒的,曾諗過找出誰出賣我。回心一想,我這行業很需要朋友,社交網站連電話號碼也不用知,人家要求 friend,我好意思拒絕嗎?率先轉發圖片的朋友亦未必惡意,他未必看出圖片有問題,但朋友的朋友的朋友呢?一句講晒,香港人鍾意鬧人「臭咩」。

莊父莊寶馬大馬拿督,妹妹莊思明當選港姐季軍。

河童圖是轉發的,文字卻出自莊思敏手筆。

心理•冇準備

我條路,一向唔易行。

原文照錄「臭咩」,正襟危坐在做訪問的莊思敏,談吐不慍不火,並非冇情緒,但全程只講了「臭咩」——咩嘢?你以為咩呀……

壹:如果話信錯朋友,搞 model公司搞到執笠算唔算?

莊:唔係信錯,係經營下來 partners彼此信念不同。我可以做的是讓員工有心理準備,其實員工也清楚公司狀況,完全唔清楚的話,咁樣打工亦係問題。

壹:懷疑過本身的能力嗎?例如主持《爆足一週》遭腰斬。

莊:我條路,一向唔易行。每集都想做好啲,到頭來,只有監製和小欣姐(首席主持查小欣)預先知道,所以我才鏡頭前措手不及。

壹:作為老闆,你讓員工有心理準備;但作為員工,電視台沒讓你有心理準備。

莊:唔同嘅,監製話不想影響藝人情緒,個節目係當 live咁錄影,唯有如此相信。

壹:隆胸,是否也出於缺乏自信?

莊:都可以咁講,但主要怕麻煩,著晚裝用 nude bra,我皮膚敏感,黐膠紙會痕癢……

壹:好睇外表?

莊:乜有人唔睇外表嘅咩?

壹:於是嘲笑黃之鋒貌似河童?

莊:那張改圖,朋友發先的,輪到我係轉發嗰個,結果入我數,因為我是公眾人物。網上世界喜歡討論邊個似邊個,正如話鄧梓峰似巴斯光年,我冇諗咁複雜。

壹:關不關心政治?

莊:我唔敢話完全不關心,佔中時我擔憂過股市(於是又俾網民鬧),但問我有幾多個立法會議員,冇乜人會知喎。

超•港女

潑佔中冷水的莊思敏唔配做香港人?可能真係唔配,馬來西亞華僑拿督女,這天剛從祖家拉行李喼趕到影樓,沒有塞飛機。莊思敏不怕坐馬航,還坦言愛它親切感。事有湊巧,這天,某名工作人員在另一邊廂埋怨上次被迫轉乘馬航,擔驚受怕兼嫌隔籬左右盡皆包頭族……倒沒有夾定的。

壹:罵你是港女,但有些事你比人包容。

莊:討好唔晒全世界,即使我天天寫 blog祈願世界和平,一樣會被鬧——虛偽!這樣說吧,我五歲來港,怎不算?

壹:四川地震翌日,你寫買鞋心得,內地網民鬧,那次反過來輪到香港有人撐你了。

莊:別諗得太複雜,我鍾意購物啫。

壹:人做港女你做港女,你比杜如風更惹火,例如皮草言論。

莊:我有些朋友已經怕事到只敢話件皮草係屋企留低,唔敢認新買。畜牧一隻動物攞皮,同畜牧一隻動物嚟食,我看不出分別。唔著皮草唔會死,愛斯基摩麻煩啲;唔食肉都唔會死㗎,我本身戒牛肉,但不用逼人陪我食齋。

壹:有分別的。食肉的人多,買皮草的人少,再深究下去,部分原因出於仇富。

莊:香港人一天比一天仇富,貧富懸殊,但咁樣諗得愈多,愈會忘記要靠自身努力。

壹:莊思敏不如開解自己——人家仇視我等如代表我富有?

莊:李生都唔會咁諗。就算咁諗,講埋出嚟盞聽鬧。

壹:我懷疑天生鍾意俾人鬧,以增加知名度。

莊:你估 SM咩?梗會嬲。

從不•

可惜

《小姐誘心》慶功,工作人員問女配角莊思敏 prefer哪天,莊答:「邊日都得,反正我日日都約了朋友食飯,我改期便好。」

壹:從不喜歡孤單一個?

莊:在家時畢竟會一人晚餐;但出街,我真不習慣,會被認定很寂寞。

壹:可惜偏偏孤獨一個?

莊:《小姐誘心》講我老公養小三;感情路上,我也遇過小三,只是我未結婚而已。又曾經遇上一個男仔,我向他傾訴工作壓力大,他竟然說:「你哋做明星唔係淨識玩嘅咩?」喂係咁意敷衍吓我都好吖!也多謝他夠坦白,令我知道彼此唔夾。我入 TVB做主持要經過 casting,說出來冇人信。朋友勸我留長頭髮睇落溫柔啲,但無謂呃人啦,呃唔得耐。

壹:如可收回一些言論,能補救形象嗎?

莊:歷史不容改寫,我自己亦把口唔收。一定要說的話,還是《爆足一週》吧,節目中傷害過蘇永康,後來我碰見阿公(蘇暱稱)曾親口道歉——不能靠網上,網上有時靠不住。

壹:我還以為關於《爆足一週》是最後一集你曾預告播勁料?點知係腰斬……

莊:不會啦,嗰次太𤓓。人可以唔怕人鬧,但應該怕𤓓。

莊自言並非頭頭碰着黑,導演葉念琛便是事業上的貴人,但不是感情上。

莊思敏公開的圈中男友是吳浩康,吳後來移情胡定欣。

後記

《豪語錄》的後記,通常寫寫人生智慧。

真正大智慧能寫嗎?太上老君曰:「知者不言,言者不知。」至理名言!但這至理名言,畢竟要靠寫出來。

莊思敏說:「今後少說話多做事。」但呢句,她提過唔只一次。

太上老君不寫五千字《道德經》,世上沒有道家哲學;莊思敏如果封嘴,本地少了很多八卦談資。

所以,我還是寫下這篇後記。



鍾意就快D Share啦!
Related Posts Plugin for WordPress, Blogger...