大耍太極
上周五（ 13日）林峯出席牙膏活動時，對自組公司一事雖沒親口承認，卻表示開公司會收穫多些。同時他亦說：「如果齋講打工，我一定只會考慮 TVB，因為我只打過 TVB一份工。」語帶雙關。
娛樂喧
揼千萬自組公司 林峯撬埋楊怡走
林峯自今年 2月公開與千語 BB拍拖以來，人前人後打得火熱。有傳最疼錫他的無綫高層樂易玲一直反對二人拍拖，並多番勸告他要以事業為重，但林峯不時請假與 BB外遊，無心戀戰。
適逢林峯尚有大半年便約滿無綫，既然與樂小姐意見不合，他索性不再續約。本刊收到消息，林峯已決定投資千萬搞經理人公司及電影製作，與他共事超過十年的無綫經理人 Candy，已率先向樂小姐遞信，為林峯的新公司預先打點。至於一心做娛樂大亨的林峯，近日更積極遊說楊怡、徐子珊等花旦加盟，以壯大聲勢。
其實林峯離巢是遲早的事，其父林華國乃有「廈門李嘉誠」之稱，涉足房地產及建築材料等，身家逾 20億。林峯身為長子嫡孫，曾揚言 30歲前會返去打理家族生意。不過林父愛錫兒子，見今年 33歲的他仍眷戀娛樂圈，加上近年樂小姐一直有約林父飯局，向他匯報兒子工作狀況，林父才讓他繼續演藝事業。
義工助興
林峯七愛 BB，連帶其老闆公子亦成為自己人。在黃子桓婚宴上，林峯在沒收酬勞之下唱情歌〈愛很簡單〉娛賓，更是唯一台上獻唱的嘉賓。
唔俾拍拖致反面
林峯入無綫以來，一直對樂小姐言聽計從，即使拍拖亦從不高調。直至年初，林峯與吳千語公開戀情後，林、樂關係就大不如前。據知情人透露：「阿峯同千語拍拖咁耐，樂小姐就反對咁耐，不斷同佢講拍拖會影響事業。不過阿峯真係好愛 BB，分手當然冇可能。阿峯同樂小姐以前好 close，就算佢開完劇十幾粒鐘，都會同樂小姐傾下電話。依家梗係唔會啦，阿峯仲有大半年就約滿，樂小姐幾次搵佢傾約，佢都唔肯聽電話！」
經理人過檔新公司
月前林峯向友人透露，自己反正再過幾年，都要返屋企幫手，與其俾人抽傭，索性自己揼千萬自組經理人公司，涉足電視、電影和廣告製作，實行肥水不流別人田。
據知表面掛住拍拖懶懶閒的林峯，早已有曬全盤計劃，他首先遊說在無綫藝員部打工、跟隨他十多年的經理人 Candy辭職。據知情人透露：「 Candy媽（林峯經理人）入 TVB之後就一直照顧阿峯，兩人情同母子，阿峯另起爐灶， Candy媽義不容辭劈炮去幫手。兩個禮拜前， Candy媽向樂小姐遞信，樂小姐留佢，仲俾時間佢考慮清楚。不過做 TVB藝員部經理人好蝕，因為無論經理人幫藝人接幾多工作，都係硬掘一份糧，所以 Candy媽走嘅成數好高。」
擸埋花旦走
除了搵經理人為新公司鋪路，據知林峯亦向同樣不夠一年便約滿的楊怡，和屬同一經理人的徐子珊及黃智雯等花旦埋手。皆因他知悉三人恨返大陸拍劇，偏偏無綫唔放人，因此她們早已對公司有離心。知情人續說：「峯仔本身同阿怡（楊怡）、子珊 friend底，加上 Candy媽幫口，拍心口話會幫佢哋接大陸劇同廣告。楊怡上年攞咗視後，今年未必可以冧莊，而且佢都開到口搵錢行先，所以走嘅意欲好大。其實樂小姐由上年五月已經同阿怡傾續約，不過佢拖到今時今日都仲未傾，睇嚟過檔事在必行啦。」
樂小姐：會教佢點開公司
對於約滿另起爐灶，上周五（ 13日）林峯出席牙膏活動時不欲多談。「公司未搵我傾約呀，但我唔會主動傾，等公司安排。（唔心急？因為決定開公司？）自組公司的確收穫多啲，不過好辛苦，要顧慮嘅嘢好多，我會諗清楚。打工始終會揀無綫先。」
樂小姐上周五（ 13日）出席無綫飯局時，對於林峯開公司卻表示贊同。「我哋同阿峯未正式傾約，始終仲有一年先約滿，不過，若果阿峯打算開公司，佢可以搵我，我一步一步教佢點開公司都仲得。（驚唔驚佢挖埋其他花旦走？）……呢啲嘢遲啲先講啦！」說罷匆匆離開。
挖自己友
林峯效力無綫 14年，與同事關係不俗，他另起爐灶，自然首選自己友。
楊枱：想試吓！
有傳楊怡一直恨返內地拍劇𢱑銀，但偏偏無綫唔放人，令她早有離心。對於好友自組公司，她表示：「係咪真㗎？係都想試吓！其實好多藝人都自己開公司，市場咁大，我覺得無可厚非。但佢係咪俾朋友價我先？哈哈……我同 TVB係就嚟約滿，不過一直有傾緊。」
黃智雯：係好事！
與林峯屬同一經理人的黃智雯坦言與無綫還有幾年合約，但對於「阿哥」林峯搞公司表示支持。「未嘗唔係一件好事吖，俾多個機會自己多方面發展，當轉個形式同 TVB合作囉！我自己都想多啲發展。」
|
鍾意就快D Share啦！
|
|
|
