滾熱辣
片場十級戒備 梁洛施密封第二春
25歲的梁洛施（ Isabella） 08年戀上李澤楷，雖然為李家誕下三子，可惜仍然無緣入豪門，兩人更於前年分手。息影 5年後，梁洛施在影圈仍甚為搶手，本月初更高調復出，拍攝張艾嘉新片《念念》。
梁洛施唔揀恩師徐克嘅大製作，亦放棄好友彭浩翔新片，全因戀愛大過天，同張艾嘉 23歲兒子 Oscar（王令塵）發展姊弟戀。為保愛子戀情，張艾嘉開戲如臨大敵，片場不但守衞森嚴，更安排車隊秘密運送梁洛施。不過百密一疏，周一（ 16日）梁洛施趁放假購物曝光，雖然冇 Oscar陪，但梁洛施卻心情靚爆，提起 Oscar更即時嘴角含春。
16/9連環濕平
息影前，梁洛施與李心潔因拍《深海尋人》熟稔，梁洛施退出娛圈後，兩人仍有聯絡，因而認識了李心潔師傅張艾嘉及她的兒子 Oscar。 Oscar對大過自己兩年的梁洛施一見鍾情，實行越級挑戰前「小小超嫂」，姊弟戀暗中發展了一年。
「因為 Isabella大過 Oscar，又有三個小朋友，最初張姐（張艾嘉）好愕然。不過 Oscar經歷綁架事件後，張姐咩都就曬佢，就算唔多鍾意都唔會講出口。 Oscar想媽咪接受女友，拉攏 Isabella做《念念》女主角，仲落嘴頭叫媽咪做埋 Isabella經理人，一家親之餘，亦令女友復出條路好行啲。」知情者說。
片場守衞森嚴
張艾嘉捧紅過李心潔同梁詠琪，梁洛施今次以《念念》作為復出第一炮，亦是睇中張艾嘉造星能力。張艾嘉背後發功，就連李心潔都要坐歪做女二，梁洛施得寵程度可見一斑。
有傳梁洛施與 Oscar同居於大安區的酒店式住宅，但記者連日守候，卻未見男方蹤影。而梁洛施就算開工，張艾嘉都安排車點對點接送，盡量避免她曝光，恍如天後般服侍。「 Isabella為了顧及舊愛李澤楷面子，一直想低調處理戀情。張姐亦不想 Oscar受壓，所以拍攝《念念》時現場守衞森嚴，拍攝地點以室內為主，方便 Isabella避開傳媒。其實 Oscar可能本身亦很深閨，鍾意留家睇戲。佢同 Isabella平日都係煲吓碟，好少出街。」
奏樂贈興
行完誠品，梁洛施同友人食越南湯粉。其間她一時興起玩結他，下午茶時又興奮到玩亂頭髮。
捧拍檔場
食完午飯，梁洛施同朋友去睇戲。戲名《被偷走的那五年》，由她新片拍檔張孝全主演，她亦感動到眼濕濕。
專買攞獎戲
梁洛施攞過波圖國際電影節影後，又是詹瑞文高足，自然醉心於演技，加上 Oscar亦是電影發燒友，兩人成日煲碟為樂。
周一梁洛施喺誠品買咗四隻 DVD，當中包括講述年青人追求自由的巴西片《浪蕩世代》（ On the Road）、著名攝影師的自傳式紀錄片《掌鏡》（ Anton Corbijn Inside Out）、由麥迪文主演的《心靈勇氣》（ Promised Land）及由康城影帝米基辛主演的《謊言的烙印》（港譯《誣網》）。四套戲都唔係商業片，純粹睇演技，影後不愧係影後。
結他贈兒子
周一（ 16日）早上十一時許，梁洛施趁不用開工，去了台北信義區 shopping。她先到咖啡店嘆咖啡睇劇本，再到誠品買影碟，之後又到兒童部買夏威夷結他及兒童書籍。行到接近一時，梁洛施會合女友人食越南菜，更於用膳期間彈結他，狀甚興奮。之後梁洛施買杯、買鞋，又去了睇電影《被偷走的那五年》，傍晚才返回住所休息，全日使費二千港幣有找。
記者上前詢問她和 Oscar的戀情，梁洛施全程冧爆甜笑，但回答時就顯得十分避忌，多次以「放假中」為理由拒談。反而問到三名兒子，梁洛施就有問必答。
記：傳你同 Oscar張艾嘉個仔拍拖喎？
梁：（微笑）我今日放假，唔講喇。
記：你拍戲係咪李澤楷幫你睇劇本同鋪路？
梁：唔好亂講，唔好亂寫啦。
記：你買個結他自己玩呀？見你識彈喎。
梁：唔係，係俾三個仔玩嘅。我識啲，會教佢哋彈。
記：得一個琴，佢哋咪爭玩具？
梁：唔會，我會教佢哋。
需在台北拍戲兩個月的梁洛施，對大仔李長治及一對細孖仍然關心。新歡、兒子兩邊討好，照顧周到。
買完即用
梁洛施入場睇戲時，抽空買了一隻約值二百港元的 Tiger保溫杯。翌日開工前，笑容滿面的她，帶備該新杯到咖啡店裝咖啡。
親疏有別
連日來，李心潔的戲份都是在鬧市拍攝，任影唔嬲。相反，梁洛施拍攝的地方都是點對點，外人難以拍攝，工作人員一見記者，更如臨大敵（右）。
帶子改嫁亦平常
姐弟戀愈來愈普遍，其實只要愛得深，就算女方已為人母都冇問題，例子近年亦愈見愈多。
|
鍾意就快D Share啦！
|
|
|
