2013年9月21日 星期六

古惑佬湊仔經




雖然個個 40開外,兼且做曬人夫,不過五個麻甩佬一聚頭,十足𡃁仔咁,由開場笑到落場。

媽咪姐

古惑佬湊仔經

當年名噪「江湖」嘅古惑仔,十幾年後重逢開演唱會,不過圍埋一齊,除咗一樣爛玩外,唔係再講劈友、揸𨋢囉。

媽咪姐呢日就聽到「大頭仔」錢嘉樂猛咁同「包皮」林曉峰傾仔經:「呢間好難入喎,你識唔識人喺入面做?」「山雞」小春搭嘴話:「喂!聽人講呢間好穀喎,仲要啲𡃁仔參加好多音樂同運動比賽。」呢個時候,大佬「浩南」伊健開口話:「唓!入唔到咪去外國囉!」「山雞」、「包皮」同「大頭仔」齊聲話:「唓,你都未有,知鬼咩!」古惑仔變曬廿四孝老竇,未有細路嘅浩南哥,想要同班𡃁有共同話題,真係要勤力啲至得囉!

冇老牛亦冇開山刀,當日五兄弟玩水戰,入水槍嗰陣,伊健同嘉樂仔猛話要支大 size嘅槍,入定「彈藥」,同其他人死過。

開戰前,一眾兄弟已經夾定當嘉樂仔(右一)係箭靶,肯定係佢平時衰多口得罪班兄弟啦!

幾個已經唔後生嘅麻甩,經過一輪激烈「槍戰」,身心俱疲,玩大富翁最啱啦,唔使鬱之餘又可過富豪癮。

90年《古惑仔》系列,爆出「浩南」、「山雞」、「包皮」、「大天二」、「大頭仔」等奇形怪狀名字,不過就成為港人嘅集體回憶。



鍾意就快D Share啦!
Related Posts Plugin for WordPress, Blogger...