掃呢頁CODE去手機

2018年1月7日 星期日

上海開騷遇飛機停飛!黎明12粒鐘狂轉車紀錄 __,黎明,

黎明將12個鐘由襄陽出發去上海過程拍攝下來。貴為香港天王黎明到上海舉行演唱會,大家一定以為坐飛機就可以舒舒服服,話咁快就到達啦,咁你就錯喇。今日黎明就 ...


黎明將12個鐘由襄陽出發去上海過程拍攝下來。


貴為香港天王黎明到上海舉行演唱會,大家一定以為坐飛機就可以舒舒服服,話咁快就到達啦,咁你就錯喇。今日黎明就喺官網上載咗佢由襄陽經南京再到上海開演唱會嘅行程,由襄陽早上8點冒着天寒地凍出發就足足用咗超過12個鐘時間,大家冇睇錯,係12個鐘,且因落大雪關係搞到周圍大塞車,為咗趕時間,黎明唔介意坐完飛機又坐火車、高鐵,之後又再搭地鐵,趕頭趕命,轉車都轉到暈,真係要同黎明講句:「辛苦晒」。不過黎明喺片度,似乎相當享受做平民搭公車嘅樂趣,仲拍低沿途所見所聞,不如家陣大家就同黎明一齊展開逾12小時旅程啦。

片中顯示,黎明喺1月5日上午8時喺襄陽出發,因為地下有厚厚嘅積雪,坐喺車嘅黎明見到前面有巴士同另一架私人車行唔到要停低,啲巴士乘客仲走出車外睇吓咩環境,幾時架巴士先郁得呀,斷估人人都唸唸有詞:「點呀,大佬,趕返工,返學呀。」黎明又話因為太大風雪關係,佢搭嗰部飛機好不幸咁宣布要停飛添,不過天無絕人之路嘅,冇飛機坐,咪搭火車囉,黎明就展示咗佢嘅往南京嘅火車票,因為依家大陸買車飛係實名制,所以張車飛都印有黎明個名,有專屬車飛喎,黎明梗係要攝入鏡啦,本來搭火車去南京都係7粒鐘,但又係大雪惹的禍,要坐足9粒鐘,咁呢9個鐘車程有乜好做啦,除咗瞓覺,吹水同打機外,黎明就選擇咗視察民情,佢遇到一位唱歌老師帶領學生練習唱歌,咁佢哋又唱成點呢?睇戴cap帽、戴口罩,全身黑嘅黎明點頭動作,就知道黎明覺得佢哋唱得唔錯,八完人哋唱歌,黎明又影吓車外嘅雪景,坐咗咁耐車,等到最開心嘅時間,就係開飯啦,黎明冇去包廂歎大餐,就揀咗喺原位試食四餸便當,睇啲餸個樣就…,不過肚餓乜都係美食啦。

坐完火車下一站坐高鐵,由於火車車程延誤了一粒鐘,黎明搭高鐵就要重新買過張新火車飛啦,由下午5時上車,由六時起程搭三粒鐘,去到浦西,又係交通問題,黎明知道晚上8時前由浦西去浦東,如果坐私家車一定又受塞車之苦,於是乎佢又揀咗去搭永無塞車嘅地鐵,佢買咗張單程車飛後,就好似我哋日日返工返學搭港鐵咁,拍卡入閘,再行樓梯去月台,黎明好好彩搵到個位坐,唔使同人逼,因為要趕住去綵排,黎明急急腳落車趕去另一月台轉車,佢由人民廣場上車搭五個站先到中華藝術宮嘅場館,喺車程中,因為個個都忙住做低頭族睇手機,咁就錯過咗同黎明集郵嘅天大機會,相信喺片中嘅朋友們見到呢條片時,一定好揼心,到晚上8時半,千辛萬苦,黎明終於到場館嘞,可以順利開演唱會,黎明喺台上唱《傻癡癡》,好在佢仲好精神好清醒,冇搭車搭到傻癡癡。


來源 source: http://hk.on.cc
鍾意就快D Share啦!