掃呢頁CODE去手機

2013年5月22日 星期三

馬運亨通 澳洲買馬仔 馬德鐘 180萬做馬主




馬場齋睇

馬德鐘同老婆都算係馬場常客,好在馬德鐘唔好賭錢,只係至多睇多啲攞經驗,相信馬太放心佢玩馬仔多過上大陸拍劇囉!《蘋果日報》圖片

真面目

馬運亨通 澳洲買馬仔 馬德鐘 180萬做馬主

「馬神」馬德鐘早前與無綫改簽部頭合約,主力搵「人仔」,內地拍劇一年已傳穩袋 4千萬「人仔」,賺到笑。

曾經講過:「我自細就好鍾意馬,一直有個夢想係開牧場養馬。」馬神如今水頭充足,當然可以達成夢想。據知馬神去年先陪老友去法國揀馬兼偷師,月前趁有假期更親赴澳洲落訂買馬,下一步將入紙香港賽馬會申請做馬主。不過養馬絕對係高消費玩意,睇嚟「馬神」要狂拍大陸劇先得喇!

其實「馬神」拉頭馬係佢一直以來嘅夢想,如今已成為馬主,距離呢一日應該不遠矣!(設計圖片)

44歲馬德鐘( Joe)自決定跟無綫改簽部頭合約後即全力在國內發展,事業一帆風順,內地劇集一套接一套,早前更有報道指他在短短一年就吸到 4千萬「人仔」,難怪馬神最近在北京置業,月前仲靜雞雞飛澳洲揀靚馬。

齋睇唔賭

馬德鐘除了姓馬之外,其實還對馬情有獨鍾,馬神曾在訪問中提到:「我自細就好鍾意馬,一直有個夢想係開牧場養馬,但呢個夢想應該幾難達成。我希望可以放兩、三年時間做馬主。其實之前有個朋友去法國買馬,我都有跟住去當參考做準備。因為買馬之後仲要養,所以一定要識(揀)馬。」

為了夢想,馬德鐘不時現身馬場,不過齋睇唔賭。馬德鐘身邊好友說:「佢鍾意睇馬但唔鍾意賭馬,有時成班朋友賭馬,佢都好少落注,但就比任何人都留心馬匹狀態。」平時做足功課,月前馬德鐘便親赴澳洲揀馬。

木馬照殺

連微博張 cover相,馬德鐘都要放隻木馬仔喺度,中曬「馬」毒。

去年馬德鐘夫婦曾約未散嘅超雲同山聰見面食飯,諗住成功埋到大碼頭,可惜山聰已被飛,唔知超雲仲識唔識「馬神」呢?

揀馬睇樣

直至今年初,馬神又再放風,「其實做馬主係我好多年心願,太太都好支持我,佢話做馬主唔緊要,最重要係唔好玩物喪志,掛住隻馬唔做嘢,但當興趣去養就絕對冇問題,所以我好多謝太太咁支持我。養馬始終係為興趣,唔係為贏比賽,有得贏當然係好,但冇亦冇所謂。」

去年馬德鐘陪友人到法國揀馬,順便偷師,返港後即問准老婆,計掂條數, 3月便與友人飛往澳洲黃金海岸一年一度的拍賣會「 Magic Millions Gold Goast Yearling Sale」揀馬,最後豪擲 180萬港元,買入一隻 2歲雄性馬匹。知情者說:「 Joe其實自己都識睇,而且佢主要係想養馬,到時唔會穀隻馬去比賽,所以佢冇睇父系或者母系之前嘅戰績。佢揀中呢隻係因為隻馬胸夠橫夠大,望落又夠靚仔(健康),同 Joe一見鍾情。」本刊曾聯絡馬神,惟至截稿前仍未聯絡得上。

搏命吸「人仔」

現於橫店拍緊大陸劇《匹夫英雄》嘅馬德鐘,即使三十幾度大熱天都要 full gear上陣,唔係一年邊得 4千萬落袋呀?

下月飛虎見

下月馬德鐘便回巢拍《飛虎Ⅱ》,到時佢就有多啲時間留喺香港搞愛駒來港嘅事啦!

養馬年花 50萬

「火燎腚」馬主鄭龍敦

據知馬德鐘於 3月份曾遠赴澳洲黃金海岸參加一年一度的「 2013 Magic Millions Gold Coast Yearling Sale」馬匹拍賣會。當日馬神睇中 2歲雄性馬匹 Miraposa,並即場以 23萬澳幣(約 180萬港幣)撲槌買下。現已開始為帶愛駒返港而做準備。若馬德鐘要將 Miraposa運返港,運費和保險費預計約 40萬,每年亦需花近 50萬飼養。

本地資深馬主鄭龍敦表示,買馬主要分 2種, PPG即係未出過賽嘅馬,而 PP即係比賽過嘅,通常都會搵練馬師一齊去揀,一嚟幫吓眼,二嚟衰咗都有人賴嘛!鄭生仲話喺澳洲同新西蘭買嘅馬較適合香港天氣,而且雄馬會更好。買嘅時候就要決定埋想隻馬跑長途定短途,因為短途適合胸大,長途就要揀瘦長,「澳洲馬一般由幾萬至幾百萬都有,所以佢𠵱家呢隻馬,因為唔知道佢父系係點,好難講佢有冇俾人搵笨。香港賽馬會每年 3月入紙申請, 6月就抽籤,一般人大約抽 3年先會抽中,個個郭富城咁好彩咩?」

「星」級馬主

名人明星除咗鍾意買車玩車,愈來愈多開始想買馬做馬主,最緊要威水。

郭富城

郭富城自 2011-2012馬季開始成為香港賽馬會會員馬主,是香港競賽馬匹「愛的呼喚」馬主,也是 2012-2013年度馬季自購新馬進口許可證中簽會員(與張智霖、周文曦、陳汝安合養), 2012年 9月 23日,郭富城馬匹「愛的呼喚」首次出賽,以兩個半馬位之先贏馬,為他帶來約 28萬元獎金。

鄺美雲

養狗又養馬嘅鄺美雲名下馬匹包括「甜蜜福星」、「祿寶」(個人名義)及「千江映月」(團體)等。「千江映月」仲係現役最出色嘅明星馬,二十五戰獲四冠三亞成績!

許晉亨

09年 6月新婚冇耐嘅許晉亨同李嘉欣抽中,一嘗做馬主知味,仲幫馬仔改名「一寶」。今年 3月再喺澳洲買多隻 3歲馬「二寶」。

點做馬主?

馬德鐘愛駒 Miraposa

1.準馬主要先抽籤(免費),抽唔中下年再嚟過。馬匹擁有權都分 3種,個人( 1人)、合股( 2-4人)同埋團體( 5-50人)都有。

2.馬匹進口前要接受 21日體格檢查,到港都要喺沙田檢疫馬房進行 14日隔離檢疫。

3.馬仔改名的話,英文名最多 18個字,中文名就唔可以多過 4個字。

4.出賽前,馬主要填報名表兼畀 2千至 6千不等嘅報名費。



鍾意就快D Share啦!