掃呢頁CODE去手機

2013年5月22日 星期三

燭光談心 李詩韻試食薛凱琪舊愛




李詩韻跟 Reggie Martin在等攞車期間,出名熱情的 Reggie仍然不停口,更氹到李詩韻開懷大笑,相信 Reggie應該堅吹得。

封面

燭光談心 李詩韻試食薛凱琪舊愛

無綫新劇《情越海岸線》上週首播,一場同陳展鵬激吻戲,即令 32歲的李詩韻升呢做 BB,除成為網站熱門搜尋外,更帶挈《情》劇首周收視高開 25點,算係近期 TVB回勇之作。

劇中李詩韻飾演勢利港女,為向上爬不惜放棄男友陳展鵬,現實中李詩韻亦一樣努力向上流進發,除之前傳過同富商吳守基等有錢人拍拖外,上週四( 16日)本刊發現李詩韻竟然搭上薛凱琪前男友、澳門威尼斯人高層 Reggie Martin,在中環高級餐廳燭光晚餐。詩韻 BB原來食得好雜吓喎!

因《情越海岸線》而被網友激讚索過陳豪嫂陳茵媺的李詩韻,其實 03年已選港姐出道,入行 10年承認的男友得黴友鄧健泓一個,眼見同屆港姐曹敏莉都成功嫁畀金融才俊, 32歲李詩韻唔心急就假。

32歲的李詩韻,勝在皮膚保養得好,高登仔盛讚佢為熟女極品。

《情》劇上週首播收視平均 25點,第一集李詩韻咀陳展鵬一幕,更令收視衝上 27點。

上流靠自己

其實李詩韻出身自身家過億的大富之家,含住金鎖匙出世的她, 04年時父親卻不幸破產,冇得靠父蔭,李詩韻要繼續維持富裕生活方法惟有靠自己。除了試過做生意外,更努力於上流界搵男友,知情人士說:「李詩韻圈中冇乜朋友,叫得 friend嘅都係得鍾嘉欣,雖然佢家陣要靠自己,不過佢仍未搣甩啲大小姐生活習慣,佢好鍾意去旅行,一有時間就去,之前飛完歐洲又飛去杜拜,不過唔知佢同乜嘢人去喇!」

曾因被雜誌影過醉蒲蘭桂坊,被指轉性爛飲兼愛夜蒲的李詩韻,曾自言因怕再遭偷拍而「一入黑便不敢出街」、「如果有朋友在酒吧搞生日會一定不會到」,但上週四( 16日),本刊卻發現她跟薛凱琪前黑人男友、澳門威尼斯人高層 Reggie Martin一齊在中環國際金融中心( ifc)的高級意大利餐廳 Isola秘密幽會,兩人撐枱腳食燭光晚餐夠浪漫之餘,其間二人談笑不斷,狀甚啱傾,之後黑人 Reggie更坐李詩韻的 Audi TT跑車走人。

上週四( 16日),李詩韻約埋 Reggie在中環 ifc Isola食意大利餐,兩人食足兩粒鐘。

介紹朋友

食飽意大利菜後, Reggie跟李詩韻並肩行到四季酒店攞車時,黑人 Reggie撞到另一外籍朋友, Reggie亦大方介紹畀李詩韻認識。

18/5獨返美孚

上週六( 18日)出席完慧妍雅集活動後,李詩韻獨自返回美孚新邨單位。

車埋走

過慣大少姐生活的李詩韻,在 ifc食飯仍把車交畀四季酒店代客泊車,攞完車後李詩韻用 03年買落的 Audi TT載埋 Reggie(箭嘴)去信德中心搭船返澳門。

要識半年至拍拖

據知近年頻頻跟香港女星扯上關係的 Reggie Martin,現時為威尼斯人集團旗下的金沙酒店 Playboy Club的話事人,知情者說:「 Reggie份人好熱情主動,加上工作關係,佢要經常招待啲 artist過澳門玩,佢又係美國商會副主席,來頭唔小㗎!」而近年甚多霧水情緣的李詩韻,對於忽然搭上薛凱琪前男友,李詩韻上週六( 18日)出席「慧妍雅集」活動時,例牌否認這段關係。

F:《 FACE》 李:李詩韻

F:最近係咪拍緊拖?

李:拍拖隨緣啦,啲男仔初初識就好好,後尾會變㗎!起碼要識半年至會拍拖,唔想拍完就分。

F:之前受過情傷所以咁諗?

李:咁又唔係,唔想玩玩吓啫。

F:前幾日見你同薛凱琪前黑人男友撐枱腳喎?

李:我哋只係朋友,佢亦唔係 Fiona男友,之前拍劇,打拳啲人識佢咋,唔係男朋友。

F:佢想追你?

李:我唔覺喎!我鍾意中國男仔,我係好傳統嘅女仔,外國人唔啱我㗎!

詩韻 BB唔使咁快落閘嘅!

前年薛凱琪開生日 party時認識 Reggie,據知男方出盡力追 Fiona, 2人不時密會。

在《情越海岸線》中扮中學生演回憶片段,她則於週日( 19日)上載短片中教人紮學生馬尾,李詩韻解釋:「有時有劇播,我都拍吓片當宣傳囉。」

識做宣傳

李詩韻自 09年起擔任 Vaseline代言人,近期拍攝了新一輯廣告,難怪在護膚短片中,亦識做經常拿出 Vaseline的產品來示範啦。

釣金龜

李詩韻 03年選港姐雖然五甲不入,但獲得「最上鏡小姐」及「才藝小姐」兩個獎項,入行以來同鄧健泓拍拖 5年,之後傳過唔少緋聞,當中不乏城中富家子弟。

圖片

拖鄧健泓

04年與鄧健泓拍《老婆大人》撻着,被多次拍到往男方住所過夜,至 10年 1月李詩韻突然在公開場合宣布兩人已分手,近 5年情結束。

《忽然 1周》圖片

傳吳守基

11年李詩韻要在《萬眾同心金益金》與仁濟主席吳守基淩空合舞而擦出愛火花,吳守基更常駕車到李詩韻美孚新邨住所接載她。

圖片

撬李彩華

本是李彩華男友的富貴男友潘啟翀( Derek),去年轉追李詩韻,在夜場太獻殷勤;不過 Derek愛蒲又花心,這段感情好快就不了了之。

一年 date 4女星

黑人 Reggie Martin因工作關係認識不少女藝人。去年先後與薛凱琪、宣萱、 Race黃婉佩等傳過緋聞。

撩宋芝齡

去年陳冠希新店開張,當時同薛凱琪傳緋聞的 Reggie竟孖住宋芝齡到賀,宋芝齡稱與對方相識約 4年,但只是普通朋友,而 Reggie當晚被多名熟女搭訕,好有女性緣。

搭 Race

去年 9月, Reggie又被影到同黃婉佩( Race)在中環行街, Reggie更不時搭住 Race膊頭。

約宣萱

42歲的宣萱早前跟外籍獸醫 Ruan分手,去年底被拍到她與 Reggie在中環約會,有傾有講在商場內玩自拍,似足熱戀中的男女。

沖涼自磨片流出

李詩韻除了忙於宣傳《情越海岸線》外,在 5月頭私底下還拍攝了幾條教女士護膚的短片放上 YouTube,其中一條指導完美肌膚秘訣的短片,她扯高底衫示範擦腹部及擦長腿引死唔少宅男,李詩韻則說:「純粹拍片教人護膚,唔好諗太多!」好難唔諗囉,仲加埋英文字墓,俾 Reggie睇?

扯高底衫

李詩韻教人沖涼前用擦擦去死皮,一手掀起上衣,一手打圈係咁擦,非常性感。不過條片上載 2星期只得 2萬 7千人睇過,可能冇乜人知囉!

擦完腹部又擦大腿再磨 pat,更不時用把勁溫柔聲線提醒觀眾要除曬衫至好擦。問到佢個浴室咁靚是否她屋企時,她則避忌說:「喺好多地方拍過嘅,唔一定喺屋企。」

同人分享吓心得啫!(真實對白)

李詩韻曾經開辦美容學院,如今又再在網上教人護膚心得,但上週六( 18日)出席慧妍雅集活動時卻表示,沒有打算再搞生意:「暫時冇諗喎,只係想同人分享吓心得啫!」

父女生意都失敗

李詩韻同爸爸李光輝都喜歡搞生意,可惜分別因公司糾紛及清盤被迫退出;本來熱愛名牌的李詩韻更曾因爸爸欠下巨款而戶口只剩下一蚊,極之慘情。

退股避嫌

10年李詩韻投資過百萬開設巧容化妝學校,但涉嫌以層壓式手法推銷美容產品上報紙 A1,李詩韻回應時稱,對推銷公司的手法及管理並不知情,已即時退股停止合作關係。

《蘋果日報》圖片

《蘋果日報》圖片

李父清盤

李詩韻生於富裕家庭,爸爸李光輝經營專門生產計算機的雅達家電,可是 04年底被迫清盤,李父欠下巨債破產,李詩韻當時剛選完港姐一年,便要肩負起養家責任。



鍾意就快D Share啦!