掃呢頁CODE去手機

2013年5月8日 星期三

轉口味 轉食陀地妹 吳卓羲糖水攻陷傅嘉莉




吳卓羲對第一次拍劇的傅嘉莉特別照顧,《衝Ⅱ》開拍外景初時,羲哥唔知有狗仔偷影,即刻出招,用紙巾幫傅嘉莉抹汗。《忽然 1周》圖片

真面目

轉口味 轉食陀地妹 吳卓羲糖水攻陷傅嘉莉

與國產乳牛張馨予分手後, 33歲吳卓羲唔愁冇女,先後同內地女星唐嫣和擁有驕人 38D的莫小棋傳緋聞;上年 9月去到三亞拍劇,連人妻梁靖琪都唔放過,被拍到水戰連場埋身肉搏,真係食得唔好嘥。

雜食成性,吳卓羲最近突然回歸港女懷抱,搭上《衝上雲霄 II》拍檔傅嘉莉 Kelly。據知羲哥在拍劇期間出手,晚晚親自揸車買糖水冧女, 2個月前終於成功將 28歲傅嘉莉私有化。不過新女身材只得 34B,比起幾個重量級前度非常輸蝕,唔知羲哥會唔會好快玩厭呢?

拍《衝 II》睇日落戲分,吳卓羲知有多間傳媒探班,表現得一啲都唔冧。圖片

拍完《衝 II》後未有新劇開的吳卓羲,近月長駐內地拍大陸劇,早前拍《格子間女人》時例牌與同劇女星唐嫣及莫小棋傳緋聞。雖然一個行氣質路線、另一個則賣 D級身材,但吳卓羲接受訪問時講明兩個都唔吼,「我同唐嫣冇感覺,我連佢電話都冇;同莫小棋拍完之後都冇傾過電話,亦冇見面!」

晚晚唔同款

唔騷國產妹,原來吳卓羲早已名草有主。據聞年初拍攝《衝 II》時,飾演機師的唱 K與機場咖啡店職員傅嘉莉撻着,兩人秘密拍拖已有 2個幾月。「 Ron(吳卓羲)知道 Kelly(傅嘉莉)鍾意食糖水,晚晚借啲意萬歲叫外賣,但點都留一碗畀 Kelly,晚晚唔同款,一時木瓜雪耳、一時又楊枝甘露,不過 Ron好神秘,連微博都唔敢關注 Kelly,見有記者探班,仲同 Kelly扮唔熟,寧願黐實杏兒同 Toby玩!」知情人士透露。

戀情啱啱開始,情聖都要特別小心保護,近日在深圳與江若琳拍緊新劇《待嫁十年》,吳卓羲在片場刻意與對方保持距離,避免傳出緋聞令新女唔高興。

明明有感情線,但唱 K同傅嘉莉喺人前扮唔熟,影張合照都硬曬軚!

除咗吳卓羲,傅嘉莉亦愛黐胡杏兒爭取曝光。

女方蜜認:佢拍咗段 video畀我

上週五( 3日),傅嘉莉做完活動後,與助手到時代廣場附近的平價餐廳醫肚,期間撳電話多過食飯,亦甚少同其他人傾偈,食飽後拿拿臨同助手行路返屋企,之後再冇外出。

據知長期留在國內的吳卓羲,一返港就會撲上傅嘉莉位於大坑的唐樓單位,爭取時間見面。「之前 Kelly同屋企人住太古城,今年 2月先搬去大坑自己住,啱啱拍拖,梗係想二人世界啦!」

週一( 6日),記者致電 Kelly,她在電話笑住回應︰「你問佢啦,你問佢啦,(係咪拍咗拖 2個幾月?)我哋係好好朋友,之前我生日,佢仲拍咗段 video畀我,話同我食生日飯!(燭光晚餐?)哎吔!我唔講喇,(佢拍劇時成日請你食糖水喎!)佢個個都有請,有風度,問我鍾意食咩糖水啫。(最近搬咗去大坑?)係呀,𠵱家自己住。(吳卓羲有冇嚟探過你?)我唔講咁多喇,唔該曬。」

3/5返大坑秘竇

男友唔喺身邊,傅嘉莉上週五做完嘢收工,全程嘟曬嘴冇厘心機。

入到餐廳,企喺度都狂篤電話,唔使審肯定係同唱 K WhatsApp啦!

傅嘉莉兩手 fing fing行返大坑屋企(右圖),所有嘢都由工人拎曬,夠曬港女!

去年 9月 TVB拉大隊飛三亞拍《衝 II》,當時吳卓羲與傅嘉莉仍未撻着,所以夠膽同 Toby摸黑喺酒店泳池喪玩。《忽然 1周》圖片

《忽然 1周》圖片

混血徐子淇

現年 28歲、中德混血的傅嘉莉, 03年出道時有「翻版徐子淇」之稱,曾拍過多齣港產片,包括《無間道 2》、《人約離婚後》等,亦與唐詩詠等拍過《當四葉草碰上劍尖時》。出道以來傅嘉莉甚少緋聞,只與組合 Square成員 Brian拍過拖。

在《衝 II》與吳卓羲有結婚戲, Kelly話拍攝時會投入真感情,潛意識愛上佢,唔怪得一撻即着!

出道多年的 Kelly(左)一直想跳入電視圈, 03年她曾與唐詩詠(右二)、戴夢夢(右)和 Race(左二)為《當四葉草碰上劍尖時》試鏡。《蘋果日報》圖片

專攻國產女

近年專向內地發展的吳卓羲,連食女口味亦變得大陸化,連食 3個 made in China女星,睇嚟羲哥唔怕食到假嘢喎!

張馨予

拍拖 1年期間發生過「潛行微博」事件,但吳卓羲反而公開戀情,更多次被影到與張馨予拍拖,直到去年尾突然分手。

唐嫣

有傳吳卓羲介入唐嫣與邱澤的戀情,雖然兩人否認撻着,但唐嫣與邱澤不久後宣布分手,夾都冇咁啱!

莫小棋

拍劇期間,有傳吳卓羲以教廣東話為名借故親近;為爭取與莫小棋見面,又肯屈就住劇組酒店。



鍾意就快D Share啦!