汪明荃與趙雅芝相隔三十四年再碰頭鬥戲，兩人繼《倚天屠龍記》後，這次在《風雲天地》繼續爭仔。
探熱針
宿命難違 三十四年後 汪明荃趙雅芝再鬥
在 78年的《倚天屠龍記》及 79年的《楚留香》合作後，各自有一班死忠粉絲的汪明荃與趙雅芝，便開始傳不和，沒有合作。三十四年後，二人在王晶監製的新劇《風雲天地》中再碰頭，兩個熟女繼續爭仔，同場更加鬥巴閉。
繼續爭仔
七十年代中期，汪明荃、趙雅芝同是無綫的當紅花旦，在《倚天屠龍記》中，飾趙明的汪明荃與飾周芷若的趙雅芝，跟由鄭少秋飾的張無忌有一段錯綜複雜感情關係，令兩位花旦的肉緊粉絲勢不兩立，兩位阿姐亦傳鬥到你死我活，少有合作。
事隔幾十年，二人在《風雲天地》中再鬥。宿命難違，劇中阿姐含辛茹苦養大三子及一養女，其中一個兒子原是趙雅芝所生，引致多年後二人為爭仔而糾纏。
上週日（十月二十七日），劇集最後一天開工，兩位阿姐都要埋位。
早上十時，先拍飾演大律師的趙雅芝，在高等法院打贏官司出來給記者包圍的戲份。晨早流流，「趙大狀」未到，二十多名粉絲已一早到場守候，當中包括有為見偶像一面，淩晨五時從佛山及深圳出發來港的同胞。
粉絲做老臨
半小時後，化好妝的趙雅芝到達高院門外，粉絲蜂擁而上，趙雅芝亦有問必答，影相簽名有求必應。「癡纏」了超過半個鐘，趙雅芝要埋位，一班人仍不停為偶像影相，現場工作人員順水推丹，叫粉絲做埋老臨扮記者。
中午放飯時間，老公黃錦燊揸車來到，接趙雅芝食飯。
「跟住場戲佢冇份，所以嚟接埋老婆去食 lunch，食完再送佢返嚟再拍。」
一 take過
之後劇組轉位到沙田西林寺拍汪阿姐戲份，她要在一排骨灰龕前，對住劇中死鬼老公黎耀祥張相做戲，兩頁紙的對白加眼淚鼻涕，接近兩分鐘的戲，阿姐一 take過搞掂！導演 cut聲一響後，現場工作人員均忍不住拍掌送 like，無得頂！
導演鄭偉文原本諗住讓阿姐分開幾段拍，但阿姐反對，要求導演一次過，「呢啲情緒一次過好啲。」阿姐說。
要一次過背兩頁紙對白，阿姐不以為然說：「拍咗咁多年劇，作為專業演員，好多人都應該做到。」
好驚喜
下午四點半鐘，兩位阿姐和飾演養女的童菲同場，這場戲講兩人多年後相遇，為了親生仔一事針鋒相對。
和趙雅芝相隔三十四年再合作，阿姐說：「我一向少拍內地劇，今次王晶搵我，角色啲戲都好重，我又想玩吓啦！趙雅芝都係好 last先俾我知，係一個 surprise；其實我同佢淨係合作過一套《倚天屠龍記》，《楚留香》我哋都冇乜撞過。我覺得佢成熟咗、淡定咗啦，同埋 keep得好好囉。」
至於趙雅芝亦稱與阿姐合作愉快。「我覺得好似見番個好耐冇見嘅朋友一樣，合作得幾開心。」
天有不測風雲
《風雲天地》早前在西貢北潭湧拍重頭戲，主要演員加埋臨時演員，場面墟冚。其間雖然落雨，但阿姐同做她兒子的黃德斌、劉愷威、蕭正楠有講有笑，未有掃興。
|
鍾意就快D Share啦！
|
|
|
